واران و ژەنێ ھۆرامانی: عوسمان محەمەد هەورامی میراتی میللی-ن

ڕێکوزیاو وارانی و یانەو ژەناو ھۆرامانی کۆچکەردە عوسمان محەمەد هەورامی-شان بە ھەسارێو جە ئاسمان و شیعرێ و ئەدەب و زوانو ھۆرامانی و میراتی میللی بەنامێ کەردەن.

سەرسەبای پەنج شەممەی، جە شارو سلێمانیێ، شاعیر، نویسەر، پەیجورکار، میدیاکار، زوانشناس، پەروەردەکا و مامۆستا (عوسمان موحەمەد ساڵح فەرەج ئەشناسیا بە عوسمان موحەمەد هەورامی) بەنەوشی کۆرۆنا کۆچی دماییش کەرد.
بە ئی بۆنەوە ڕێکوزیاو وارانی و ڕێکوزیاو یانەو ژەناو ھۆرامانی، پەیامی سەروەشی هامەششان دان و جە میانشەنە، کۆچکەردە عوسمان محەمەد هەورامی-یشان بە ھەسارێو جە ئاسمان و شیعرێ و ئەدەب و زوانو ھۆرامانی و میراتی میللی بەنامێ کەردەن.
تەمامی پەیامو سەروەشی ڕێکوزیاو وارانی و ڕێکوزیاو یانەو ژەناو ھۆرامانی:

مامۆسا عوسمان محەمەد ھۆرامی کەسایەتی ڕۆشنویر، ئەدیب و دانا ناوچەو ھۆرامانی بە ڤایرسو کورۆنای ژیانئاوایش چنە کەردێمێ. قەڵەم و دەسڕەنگینی ئی کەسایەتییە چەندین ساڵین خزمەت بە بوارو ئەدەبی و فەرھەنگی ھۆرامی و میدیاو زاوڵاو کوردستانی مەکەرۆن. کۆچکەردە، پەیجۆرکار، زوانشناس و مەولەوی شناس بێ کە مەتاوانش چەندین وشێ ڕەسەنێ ھۆرامیی و سۆرانیی زینێ بکەرۆوە. ھەمیشە ھەوڵش دان ڕەسەنایەتی و زوان و کەلتورو فەرھەنگ و میللەتەکێش پارێزنونە و جە ئی بوارەنە چەندین پێجورێش ھەنێ، پەیجورێچش پەی چەندین بابەتا کەردێنێ کە بە جۆرێو بیێنێ بەسەرچەمەو چەندین نوسیتێ و بابەتێ کەنویسەرە دیارەکێ کوردی کەڵکشان چنە هۆرگێرتێنێ.
سەرەڕاو ھام خەمی ویێما پەی جەدەستدای ئی کەسایەتییە زانا و بەتوانایە و سەرەوەشیما جە خانەوادەکێش، 
پیسە ڕێکوزیاو وارانی ئاشکراش مکەرمێ: امادەیی تەمامما ھەن تا چەنی خانەوادەکێش سەرجەم بەرھەمێ و نوسیتێ و یادگاری و دەسنویسەکێش کە بەچاپ نەیاونیێنێ کۆبکەرمێوە و ھامکارێ تەماممێ بێمێ  پەی تەمامنای وەرم و خیاڵەکا مامۆسای.
واران و یانەو ژەناو هۆرامانی  کەسایەتی مامۆسا عوسمانی بە میراتی میللی نەوەتەوەکێما مزانمێنە و سەرو خەت و خولیاو ئامانجەکاو ماموسای بەردەوامی بەکارەکاما مڎێمێ و کار مەکەرمێ تا ئاواتەکاو ڕەوانشاد مامۆسا عوسمان ھۆرامی بەیاگێ بیاونمێ.
دووبارە سەرە وەشی جەویماو ھامڕێ و رەفیقێ و خانەوادە موحتەرەمەکەیش مکەرمێنە.

یاگێ یادئاوەرییەن، عوسمان محەمەد هەورامی، ساڵەو ١٩٤٠ی جە شارچەو تەوێڵێ سەر بە هەرێمو هەورامانی جەڎێ بییەن و ساڵەو ١٩٤٨ی یانەشان لوان شارو سلێمانیێ.
کۆچکەردە، قۆناخەکێ وانایش جە تەوێڵێ، سلێمانییە و بەغداد تەمامنێنێ و دەرەنجام بییەن بە مامۆستا و فێرکار و پەروەردەگار و نزیک بە نیم سەدە جە ئا بوارەنە خزمەتش کەردەن. هامتەریب چەنی ئانەیە، شیعرێ، نویستێ، پەیجۆرێ فرێش هەنێ و بە تایبەتی گرنگی فرەش بە دنیاو زارۆڵان دابێ. بەگردی زیاتەر جە ٢٥ کتێبێ و نامیلکێش چاپێ یاونێنێ و وەڵاوێش کەردێنێوە و ژمارێوی فرێ کتێبێچش ئامەدێ چاپیەنێ.
هاوەخت ڕۆچنامەنویس و میدیاکاریێوی بەتوانا بییەن و جە چەندین ڕادوینێنە چوون، (دەنگی گەلی کوردستان، بەغداد، خاک و مەدەنیەت) بەرنامێش بە هەورامی و سۆرانی ئامادێ و پێکەشێ کەردێنێ.
هەورامی، ساڵەو ١٩٦٠ی چەنی خاتوو گەلاوێژ ئیسماعیل مەلا بەکر تەوێڵەیی هامسەرگیریشان کەردەن کە بەرهەمەکەش ٦ کناچێ و ٤ کوڕێ بییەن.