ئەندامەو کۊنسەی ڕاوەبەری کەژەکەی زێڕین ڕوکەنە پەیوەس بە گرنگی چالاکی فیداییانەو گەشمەرڎە زیلانۍ (زەینەب کناجی) قسېش کەردۍ کە جە ٣٠ی حوزێرانو ١٩٩٦ی جە دێرسیمەنە ئەنجامش دا.

ڕوکەنە جە ٢٨ەمین ساڵوەگەڕو گەشمەرڎەبېیەیشەنە یاڎو گەسمەرڎە زیلانېش کەردۆ و واتش: "زەینەب کناجی بە شېوېوی تەمام و ئەنەیاوای جە فەلسەفەو ئازاڎی ڕابەر ئاپۆی یاوانە، پېسە ژەنېوە بە ڕوحێوە ئازایانۆ دژو سیاسەتوو قڕکەرڎەی چالاکیۍ فیداییانەش جە ٣٠ی حوزێرانو ١٩٩٦ینە ئەنجامدا. پی چالاکیەیشە دلۍ ئەرەکۊشای ژەنا کورڎینە بېیە بە نامېوە درەوشاوۍ.

هەڤاڵ زیلانە پی چالاکیەیشە بیە بە مانیفیستۆو خوڎاوەنڎو ئازاڎیی و نامونیشانوو ژیۋای ئازاڎیی. فەرماندارەی سەرمەشقە هامڕا زیلانە دژوو پیلانگێڵنی کە ساڵەو ١٩٩٦ی جە دژوو ڕابەر ئاپۆی ئەنجامدریا بە چالاکیەکەیش هەڵوێسێوە هەمیشەییش نیشانەدا. ئارۆیچ نوێنەرا هێڵۊو زیلانۍ بە سەرمەشقایەتی یەژا ستاری جە گرڎ شۊنێنە جەنگ مکەرا. جە گرڎوو پارچەکا کورڎەسانینە چالاکی ئەنجام مڎا و جە زیڼانەکانە مڎرامان مکەرا. جە مېڎانی کۆمەڵایەتیینە پېسە کەسایەتی بنیاڎنیای مۆدێرنێتەی دیموکراتیکی سەرمەشقایەتیوە گەورە هۊرسوڕنا.پاڵنەرو زیلانۍ پەی چالاکیەکەیش عەشقش بۍ پەی ژیۋای ئازاڎیی. تەنیا ئانۍ عاشقۍ ژیۋای ئازاڎینۍ متاوا چالاکی فیدایانە ئەنجام بڎا. بە عەشقۆ سڵام جە گەریلاکاو ئازاڎیی کورڎەسانی مکەرو کە ئارۆنە بە فیداکاریی جە هەر چوار پارچەو کورڎەسانینە جەنگ مکەرا.

زیلانە بە چالاکیەکەیش بیە بە هەڵوێس و دڵوازەو ئازاڎیی ژەنا. ئارۊنە ئی هێڵۍ فاڕیێنە پەی هەزاران فەرماندارا پېسە زیلانۍ. هامڕا زیلانە نامونیشانوو ۋۍ یاۋناینە بە بەرزتەرین ئاست جە هێڵۆو ڕابەرایەتینە. هەنگامنیای سەرو هێڵۊو فەرماندە زیلانۍ، پەی گرڎوو ئا ژەنا کە دڵشا پەی ئازاڎیی مڎۆ ۋنە، هەڵوێسوو قەرارداری ئازاڎییا. ئارۊیچەنە جە هەنگامنیای بەرەو شۆڕشوو ژەنی ژیۋای ئازاڎیی پېسە شۊنپا هۊرگیرتەی فەرماندە زیلانۍ، پەنەوازا مەرامی گەورەو ئازاڎیی پێكبارمۍ و بەشێوێوە قەوەت بەشدارۍ بیمۍ. جە هەمانوەختەنە یاڎوو زیلان پەپولۍ مکەرمێوە کە جە ئەرەکۊشاینە جە ۋەرکۊت گەشمەرڎۍ بییە. جە ۋەرکۊتەنە فاڕیا پەی قۆناغێوە گەورەو کۊشیای و جە شۆڕشوو ژەنی ژیۋای ئازاڎیینە فاڕیا پەی سەرمەشقی."

ڕابەرایەتی هیواو ئازاڎیی ژەنۍ و گەلان

زێڕین ڕوکەنە سەرنجش وست سەرو هەڵمەتەو ئازاڎیی جەستەیی ڕابەرو گەلوو کوردی عەبدوڵا ئۆجالانی و چارەسەری پەی پەرسو کوردی و واتش: "پیمانەو سەروستەی هەڵمەتەکۍ ئانەنە پېسە ئەرکی بنەڕەتی ۋێماش بوینمۍ و بە شێوەو زیلانۍ بەشداری هەڵمەتەکۍ بیمۍ. جە گرڎوو شۊنەکانە بۍ گۊشدای بە ئاستەنگیەکا پەی ئازاڎیی ڕابەر ئاپۆی بەشدارۍ بیمۍ. ئارۊنە جە زاپ، ئاڤاشین، مەتینا، بادینان بە هەزاران زیلانۍ، ڕۆژهاتۍ، ئەرداڵۍ، ئاخین موشۍ، بێریتان چیایۍ بیەیشا هەن. پۊکەی جە هێڵۆو فیدایەتینە بیۍ بە فەرماندارۍ گۊرۍ ئازاڎیی. ئێرش، ئاندۆک، دۆغا، زنار، ئەیلەم، ڕوکەن، سارا، ئەرداڵ و رۆژهات بە هەزاران فەرماندارۍ فیداییما پېسە شۊنپاهۊرگیێرۍ میراتوو زیلانۍ، سەما،ی و گوڵانەکا چالاکی گەورەشا کەرد و بیۍ بە فەرماندارۍ سەرکۊتێما.

زیلانە جە دژوو پېگەو دلېنەبەردەی و نکۆڵیکەردەی، جە ۋەرا ۋەر بە پیلانگێڵنی و جەنگوو قڕکەردەی گەورەتەرین جوابا. ئارۆنە پەنەوازا جە هەنگامەی ئازاڎیمانە بە شێوەو زیلانۍ ئەرەکۊشمۍ پەی ماڕای گۆشەگیری سەرو ڕابەر ئاپۆی و ڕژێموو فاشیستی ئاکەپە-مەهەپەی هۊرشێونمێوە. ڕابەر ئاپۆ پەی ژەنۍ و گەلوو کوردی پەنەوازیێوە ژیۋاین، جە دژوو هێزە هەژموونوازەکا پەنەوازا ئانەی دیاری بکەرمۍ کە بیەی و ئازاڎیی رابەر ئاپۆی چنی ئازاڎیی و بیەو گەنجا، ژەنا و گەلی یەکانگیربیەن. ئارۊنە جە گرڎوو شۊنەکانە بە هەڵوێسی چالاک دژوو هرووژم و هێزە سەروەرەکا متاومۍ هەڵمەتەو ئازاڎیی جەستەیی ڕابەر ئاپۆی ۋەرفراوان بکەرمۍ. چی جەنگەو ئازاڎینە متاومۍ سەرو بنەماو ستراتیجی و ئەرەکۊشای هامبەشی جە گرڎ شۊنېنە بەرەی دژە کاپێتاڵێستی ئەرەمەرزنمۍ و بیاومۍ بە سەرکەووتەی.

ڕابەرما هیواو ئازاڎیی ژەنۍ و گەلان. گرڎ کات و ساتێوە ئی هیوا زیڼەن. جە حەقیقەتوو ڕابەر ئاپۆینە کەسایەتی زیلانۍ حەقیقەتوو سەرکەوتەی خوڎاوەڼەو ئازاڎیینە. حەقیقەتوو خوڎاوەڼەو ئازاڎیی زیلانۍ ئا هێڵېنە بە عالتەرین شێوە فەلسەفەو ئازاڎییش قبوڵکەردەن و بیێنە بە حەقەتینەتەرین هامڕایی چنی ڕابەر ئاپۆی. جە ٦و گوڵانوو ١٩٩٦ینە دژوو ڕابە ئاپۆی هەوڵێوە تیرۆرکەردەی ئەنجامدریا. هامڕا زیلانە جە ۋەرا ۋەروو ئی هرووژمەو سەرو رابەر ئاپۆینە بێچارە و بێدەنگە نەمەنۆ، بەچالاکیەکەیش کە دووژمنش شۆک کەرد، گورزێوە گۊرێش جە دووژمنی شانا.

زیلانە جارێوەتەر چاندو خوڎاوەڼیش جە کورڎەسانەنە زیڼەکەردۆ

ڕوکەنە ئاماژەش پانەیە کەرد کە زیلانە جارێوەتەر چاندوو خوڎاوەڼیش جە کورڎەسانەنە سەرجەنۆ زیڼەکەردۆ و واتش: "نیشانۍ ئشناسنامێوەنە کە ۋێش میاونۆ بە ڕێخە و ڕیشەو وەڵینگەو ۋێش. هەڵوێس بۍ کە نیشانەش دا کەس نمەتاوۆ هرووژم بکەرۆ سەرو ڕابەریما، کە ئازاڎیما پنە بەخشۆ، دەوڵەتو فاشیستی تەرسنۊما و بۆ بە ڕاگیر ۋەروودەموو ئانەینە سەرجەنۆ ۋێما بنیاڎ بنیەیمېوە. ئارۊنە فاشیزموو ئاکەپە-مەهەپەی کە هۊرگیروو ئی عەقڵیەتەینە دلێنە مشۆ. ژەنی و گەل سەرۍ گنا. هەڵوێسوو زیلانۍ هێڵێوە بۍ ئانەش نیشانەو گرڎ لێوەدا کە حەقیقەتوو ڕابەرایەتی دەرفەتێوە تاریخیا پەی جەنگکەردەو ئازاڎیی ژەنۍ جە کورڎەسانەنە."