بەرلینوو پایتەختوو ئەڵمانیاینە، وەردەموو کونسوڵخانەو عێراقینە دژوو هجوومە ئەرەگیرکارییەکاو دەوڵەتی فاشیستوو تورکی و خیانەتوو بارزانیینە چالاکی کریا. وەڵێ چالاکییەکەینە شاندێوی ناڤ-بەرلین دۆسییێوی نویسیێ تایبەت بە داواکاشا دێ دەسوو کونسوڵخانەکەیوە و تاجەولینێ سیاوەشا وەردەموو کونسوڵخانەکەینە نیارە.

ئاماژە پانەیە کریا، پەدەکە ڕێککەوتەی ئاوڕووبەرانەش چەنی تورکیای کەردەن و دژو بەرژەوەندییەکاو گەلوو کوردی مدرانۆ، جیای پارێزنای گەلوو کوردی، هامکاریی ئەرەگیرکەرا مکەرۆ، وچیا: "پەنەوازا دەمودەس دمایی پی خیانەتەیە بێ! جڤاکی کوردی ڕا نمەدۆ پەدەکە بەرژەوەندیی وێش سەروو ئازادی و ئاسایشوو گەلەکەیماوە بەدەس بارۆ. حکومەتوو عێراقی بە نەرمی‌ئرمانای وەراوەروو هجوومە سەروازییەکاو تورکیایوە پەی سەروو خاکوو عێراقی، سەروەریی وێش وەرەچەم نەگێرت، ئی سەرەشۆڕکەردەیە پەی تورکیای قبووڵ نمەکریۆ، داوا جە حکومەتوو عێراقی مکەرمێ وەرپەرسی وربگێرۆ و سەروەریی عێراقی بپارێزنۆ".

هەرپاسە جەخت کریاوە، جە ئەوەڵوو ئەرەگیرییەکاوە ٣٨١ بۆردومانێ کریێنێ و زیاتەر جە ٨٠٠ هێکتارا زەمینی کشتوكاڵی سۆتەن و هەزارا کەسێ جە یانەی دوورێ کەوتێنێوە، وچیا: "پەنەوازا حکومەتوو عێراقی دژوو ئۆپەراسیۆنە سەروازییەکاو تورکی ڕا بگێرۆرە وەر و سەروەریی وێش بپارێزنۆ".

چالاکییەکەنە جەخت کریاوە سەروو، وەنەپەرسایوە جە خیانەتوو پەدەکە/بارزانی، ئاماژە کریا، ڕەنگای ئیساتێ پەی دەوڵەتوو عێراقی پێسەو هەڕەشێوە نەوینیۆ، وەلێ سەبای مبۆنە بە قۆرتێوی گەورە پەی ئی دەوڵەتەیە.

تەماموو چالاکییەکەینە درووشموو "بەڵێ پەی هامپەشتیی میاننەتەوەیی" و "بمرۆ خیانەت"ی بەرز کریاوە.