فەرماندەیی گرڎین و یەکینەکاو مڎرامانوو شەنگالی (یەبەشە) جە ساڵوەگەڕو گەشمەرڎەبیەو مام زەکی شەنگالینە بە ئەرەیاۋنێوە گەشمەرڎۍ مانگەو ئابیش یاڎۍ کەردێوە و جە کەسایەتی ئا گەشمەرڎانە قەولوو قەوەتکەردەی ئەرەکۊشایش واوەی کەردۆ و ماچۆ: "مانگەو ئابی جە تاریخو گەلی و جمیەرەکەیمانە سەنگەو ۋێش هەنش. چی مانگێنە چڼین ڕووەدایۍ و مەرگەساتۍ بە ئێشۍ پېسە؛ فەرمانەو ٣ۍ ئابی، ئەوەتەقای ١٤و ئابی جە دەگاو تلعزێڕی و سیبای، کۆمکوژی ١٥و ئاب و کۆچۆی، ئەوەتەقای ٢٩و ئاب و سنونۍ، هرووژموو فرۆکەی جە ١٧ ئابی پەی سەرو خەسەخانەو سکینی،  گەشمەرڎەبیەو مام زەکی جە ١٥و ئابینە و گەشمەرڎەبیەو سەڎان هەڤاڵا تەریما کە جە مانگەو ئابینە یاوۍ بە کارەوانو نەمرا و پی جۊرە مانگەو ئابی جە هۆش و ۋیرو گلېرگەکەیمانە یاگۍ ۋێش گێرت. هەرپۊکەی دووژمن ویستوو ئانەیش بۍ جە سەیەو ئا ڕووەدایانە گلېرگەکەیما دلێنەبەرۆ، بەڵام بە پێچەوانۆ ئی ڕووەدایۍ بیۍ بە سەرچەمەو مۆراڵی، وزە و ۋێڕکوستەی ئیراڎەو گەلی و گلېرگەی."

'هرووژم دژ بە مام زەکی پلانەو تەمامکاری فەرمانۍ بۍ'

جە درێژەو ئەرەیاۋناکەینە ئاماژە پانەی مکەرۆ جە کەسایەتی کادری ئەرەمەرزنەریمانە، ڕابەرو ئەرەکۊشایما مام زەکینە هۆشی تاریخی و تۆڵهەڵدانو تاریخی ئێزیدخانی، گەلی چێر دەس و گلېرگەی ئازاڎیوازی وەڵێکۊت و ئەرەیاۋنانیچش: "پلانەو سەرو مام زەکی، پلانەی تەمامکاریەو فەرمانی بۍ. چونکی کەسایەتی مام زەکی مردایۆ بۆ ڕووەو فەرمانینە. مام زەکی خاوەن تاریخێوە شۆڕشگێڵنانەی ٤٠ ساڵەی بۍ."

جە دمادمایی ئەرەیاۋناکەینە قەولوو بەیاگێ یاونای وەرموو ئازاڎیی گەشمەرڎا مانگەو ئابی ئامان و ماچۆ: "پېسە یەبەشەی و یەژەشەی حەقەو ۋنەپەرسایۆ گەشمەرڎا مانگەو ئابی، دلێشانە گەشمەرڎەبیەی مام زەکی، سەعید، کۆمکوژی کۆچۆی، ئەوەتەقایۆ سیبا و تلعزێڕی...هتد جە دووژمنی ئەرەگیری و هێڵۊو هامکاری مکەرمێوە. ئەرەکۊشای و مڎرامانوو ١٠ ساڵەیما نیشانەش دا هەر قەترێوە ۋنەو گەشمەرڎا گۊرەتەرێما مکەرۆ و هەنگامە بەرەو وەڵۍ منیەیمۍ. هەر قەترێوە ۋنەو گەشمەرڎا بیێنە بە کۊڵەکێوە پەی یۆبیەی گەلیما و گۊرەبیەی یەبەشەی و یەژەشەی. سەرو ئی بنەمایۍ جە کەسایەتی گەشمەرڎاو مانگەو ئابینە بە ڕێز و پنەزانایۆ تەمامو گەشمەرڎاما یاڎۍ مکەرمێوە."