قەومێ زیندانییا چوارچوەو کەمپەینوو "ئازادی پەی عەبدوڵا ئۆجالانی، چارەسەر پەی پەرسەو کوردی"ینە چند شارێوەنە  چەند چالاکیی "دەنگیتب بوزە پاڵوو ئازادی"یشا کەرد. چالاکییەکانە تیشکە وزیا سەروو گۆشەگیریی سەروو ڕابەروو گەلوو کوردی عەبدوڵڵا ئۆجالانی و پاشێلکەردەی مافوو زیندانییا.

ئەزمیر

چالاکییەکەو ئەزمیری وەردەموو زیندانوو کرکلاروو ئەزمیرینە کریا، پانکارتێ و درووشمەکێ بەرزێ کریێوە.

هامسەرۆکوو دەم پارتی ئەزمیر، ڤەزان کارابولوت واتش، گۆشەگیریی ئیمراڵی  تەماموو زیندانەکاو تورکیاینە وەڵا بییەنۆ و هۆشدارییش دا ڕێکوزیایەکاو مافوو ئینسانێ وەرەچەم نمەگێرا. واتش:" تا گۆشەگیری و پاشێلکەردەی مافەکا دماییش نێ، چالاکییەکێ وەردەموو زیندانەکانە بەردەوامێ با".

دمایی چالاکیی ئەرەنیشتەی کریا

ئەدەنە

قەومێ زیندانیا و چالاکێ و پارتێ و ڕێکوزیێکێ گەرەکشابێ وەردەموو زیندانوو کورکچولەروو ئەدەنیەنە جەمێ باوە بەڵام پۆلیس دەوروو زیندانەکاش تەوقە دا و ڕاش نەدا خەڵک بلا وەردەموو زیندانەکەی، پەوکای خەڵک نزیکوو زیندانەکەینە وەستێرە و بە بەرزکەردەیوە درووشمی بەرەو زیندانەکا ڕاشا پیما، دلێ تەوقەو پۆلیسەکانە ئەرەیاونای ونیاوە.

هامسەرۆکوو دەم پارتیی ئەدەنەی سەیفەدین ئایدەمیر واتش بناغەو گردوو قۆرتەکا گۆشەگیریی ڕابەروو گەلوو کوردی عەبدوڵا ئۆجالانین و داواش کەردە دەمودەس گۆشەگیری هوربگێریۆ.

دماو چالاکیی ئەرەنیشتەی  ڕاپیماێوی کوڵ کریا.

مێرسین

چالاکییەکەو مێرسینی ئینا حەفتەو ١٦ەمینینە وەردەموو زیندانوو تاراسوسینە کریا.

هامسەرۆکوو دەم پارتی مێرسین ڕەشاد ئاشان داواش کەردە دەمودەس گۆشەگیری و پاشێلکارییەکاو زیندانی دماییشا بێ، ڕا پەی چارەسەری دیموکراتیکوو پەرسەو کوردی بکریۆوە.