فەرماندەو قەرارگەو ناوەندی پارېزناو گەلی (نەپەگە) موراڎ قەرەیلان بۆنەو جەژنەو ژیۋایۆ ١٥و ئابیۆ پەیامێوەش وەڵاکەردۆ و ئەرەیاۋناش، "ئێمە نەبەزیای و نە مەڕیای گەلوو کورڎی و گەریلاکا ئازاڎیی کورڎەسانی بە گرڎ لێوە نیشانە مڎەیمۍ".
فەرماندەو قەرارگەو ناوەندی پارېزناو گەلی (نەپەگە) موراڎ قەرەیلان ، گەریلاکاو ئازاڎیی کورڎةسانی جە ساڵەو ٤١ەمین و هەڵمەتەو ١٥و ئابینە بە زېڵۍ عەگیدەکا، زیلانەکاوە جماوە و ئی پەیامەشەدا: " جە چوارچێوەو تاکتیک، پێرسپێکتیڤی ئێمەنە، ئێمە جەنگوو سەرو زەمینی، چێروو زەمینی و جەنگی ئاسمانی زیاتەر پەرەپنەمڎەیمۍ. نەبەزیای و نەمەڕیای گەلوو کورڎی، نەمەڕیای گەریلای بە گرڎ کەسۍ نیشانە مڎەیمۍ، ئینە ویست و پاگیری ئێمەن ".
پەیامو فەرماندەو قەرارگەو ناوەندی پارېزناو گەلی (نەپەگە)ی موراڎ قەرەیلانی بۆنەو جەژنەو ژیۋایۆ ١٥و ئابیوە پی جۆرەنە:
"گەلە بەقیمەتەکەما، هەڤاڵە شکۆمەنڎەکا
سڵامتا ۋنە بۆ. جەژنەو ژیۋایۆی جە گرڎیتا پیرۆزە بۆ. ئێمە بەنامۍ تەمامو گەریلاکاو ئازاڎیی کورڎةسانیۆ ٤٠ەمین ساڵیاڎو هەڵمەتەو ١٥و ئابی، جەژنەو ژیۋایۆی جە رابەر ئاپۆی پیرۆزە مکەرمۍ و رێزو ۋێما پێشکەش مکەرمۍ. ئێمە ٤٠ەمین ساڵیاڎو هەڵمەتەو ١٥و ئابی جەژنەو ژیۋایۆی جە گرڎوو گەلاو کورڎەسانی گەلا هەرێمەکەی، دۆساو گەلوو کورڎەسانی کۊششکارا، ۋێبەخشا و هەڤاڵا، جە گەریلاکاو ئازاڎیی کورڎەسانی پیرۆزە مکەرمۍ. جە ساڵەو ٤١ەمینینە ئێمە هیواو سەرکۊتەی پەی گرڎ لێوە موازمۍ.
٤٠ ساڵۍ سەرو هەڵمەتەی تاریخیۍ، هەڵمەتەو ١٥و ئابیرە ۋییەرد. ئا ٤٠ ساڵە جە تاریخو گەلوو کورڎەسانینە داستانێوەن، بە پیتەی ئاڵتونیە نویسیانۆ. بە ۋنەو گەشمەرڎە قارەمانەکا رازیانۆ. گرڎو گەشمەرڎا شۆڕشی جە کەسایەتی فەرماندەی نەمریما هەڤاڵ عەگید (مەعسوم کۆرکماز)ینە بە رێز و پنەزانایۆ یاڎۍ مکەرمێوە. جە ۋەرا ۋرە یاڎو ئاڎیشانە سەرەما منامنمێرە. ئا قەولەی پاڎیشاما دان جارێوەتەر واوەیش مکەرمێوە. ئێمە پابەڼێنمۍ پا قەولەیۆ کە بە هەڤاڵاما دان. ئێمە یاڎو ئاڎیشا جە بەرزکەردەیۆ ئازاڎی کورڎەسانینە بە زیڼەیی ڕاگێرمۍ.
گەلە شکۆمەندەکەما، هەڤاڵا بەقیمەتی؛
بێ گومان هەڵمەتەو ١٥و ئابی هەڵمەتێوە ئاساییە نەبۍ. جە تاریخو کورڎەسانینە جە ئەڎابیەیۆین. گرڎ چێوێش فاڕا. رەوتی تاریخیش جە کورڎەسانەنە فاڕا. ئا تاریخەی بەرەو نەمەنەی لوۍ، سەرڕاسش کەردۆ. شۆڕشوو ژیۋایۆیش ئارد ئاراوە. شۆڕشوو ژیۋایۆی بی بە سەرەتاو شۆڕشۍ هزری، کۆمەڵایەتی، کولتوری، شۆڕشوو ژەنۍ، پی جۆرە گلێرگەو کورڎی، کورڎةسانی سەرجە نۆ بنیاڎ نریاوە. ئانەیچ بە ئاسانی نەبۍ، بە هزر و رامانو رابەر ئاپۆی بە رەنجی بێهامتاو رابەر ئاپۆی و حەرپاسە رەنج و مڎرامانوو هەڤاڵا زیڼانو ئامەدی ئامادی.
چا ٤٠ ساڵەی ۋییەرڎەنە، مڎرامانۍ داستانیۍ فرۍ ڕووەشا دا و ژمارێوە فرۍ عەگیدۍ و قارەمانۍ وەشۍ بیۍ. ئانۍ سەرەتای هەڤاڵ عەگید، ئەرداڵ، بەدران، جەمشید، ماهیر هەرپاسە هەڤاڵا بێریڤانە، بێریتانە، زیلانە، عەزیمە، زەلال بۆتان، پڵنگ کچی، حسێن ماهیر، جەمال ئامەد، رۆژهات بلوزەری، جومعە بلیکی و هەرپاسە ژمارێوە فرە قارەمانۍ بەقیمەتۍ پېسە خەلیل دێرک، کەمال سپێرتی چی تاریخەنە دەوری گرنگشا گێڵنا. بە هەمان شێوە جە سەردەمو هەڵمەتەو ١و حوزەیرانینە هەڤاڵا فەرماندەی ئەرداڵ، عادل بلیکی، نودا کارکەر، رەشید سەردار، رۆژین گەودا، رۆستەم جودی، چیچەک کچی، عەلیشێر کۆچگیری و دماو ئانەی پرۆسەکە کۊتڕا ئازاد سیسەرەکۍ، بەرچەم جیلۆکۍ، دەلال ئامەد، بۆتان هەکارییەکۍ و هەرپاسە بە سەڎان قارەمانۍ چی ڕێنە وەشۍ بیۍ. قارەمانا پېسە چەتین سێوەرەکەکا، خەبات دێرکەکا، دۆغان زنارەکا، عەگید جڤیانەکا، وڵات هەرینکی، لەیلا سۆرخوێنەکا، ئاخین موش، دڵگەش گوزەرەشیوکا ئا تاریخە بە قارەمانی و پاڵەوانی رازیانۆ. جارێوەتەر جە سەردەمو مڎرامانو مەڕەکانە، ئا داسانۍ نویسیێوە بە سەرمەشقایەتی شۆڕش بەیتوشەباب، رێبەر و هێژارەکا، نوری یەکتاکا، بە سەرمەشقایەتی جومالی چۆرومان، بۆتانەکا، زنارینەکا، بە سەرمەشقایەتی باگەر و ئاڤزەم، مزگین رۆناهیەکا حیماسەکا خوڵقیا. جە ۋەرنیشتوو زاپینە چڼین ساڵێن داستانۍ منویسیاوە، بە سەرمەشقایەتی دەلیل زاگرۆسەکا، نالینەکا، زەمانیەکا ئارۆ جە ۋەرا ۋەرو دژمنینە مرداوە. بە هەمان شێوە گیانبازا سەردەمی پېسە سارا گۆیی، هەڤاڵ روکەنۍ، هەڤاڵ رۆژهات، ئەرداڵی و گەشمەرڎا ئی دماییەیما جە سەرنیشت شێخموس مەلازگر، بێریتان نورحەقە، هەرەکۆل شیار گەڤەر. بروسک کاتۆ، بەندا ئامەد و هەرپاسە سەڎان قارەمانۍ سەرمەشقایەتی تاریخیشا کەرد. جە سەیەو ئاڎیشاوە ساڵەو ٤٠ەمینی چی ئاستەنە بەردەواما.
گەلە بەقیمەتەکەما، هەڤاڵا ئێژا و شکۆمەنڎی؛
ئێمە پېسە گەریلاکاو ئازاڎیی کورڎةسانی قەولما دا کە ئێمە تەمامو کورڎەسانی پارێزنمۍ، ئێمە واتما، ئێمە پېسە پەکەکەی، پېسە سەروازا رابەر ئاپۆی گیانبازاو کورڎەسانی، پەی پارێزنای تەمامو کورڎەسانی ئەرکدارۍ کریێنمۍ. تا ئیساتۍ پابەڼۍ ئا قەولەی بیێنمۍ کە دانما. . ئانە حۊت ساڵێن، تورکیای یەرەگیرکەر گەرەکشا پانیستوو کورڎەسانی ئەرەگیر بکەرۆ. ئێمە ۋەرا ۋەرشا مردێنمێوە، ئێمە قوربانیما دا، ئێمە جەنگ مکەرمۍ و ۋێڕاگری مکەرمۍ. ئێمە خاوەنداری جە قەسەمەکەیما و قەولەکەیما مکەرمۍ و ئی چوار ساڵەو دمایی جە هەمان سەنگەرەنە مڎرامان درێژەش هەن. جە ۋەرا ۋەرو چەکی قەڎەغەو کیمیاویی، گرڎ جۆرە چەکۍ مۆدێرنی، تەکنەلۆژیای مۆدێرنینە جە هەمان سەنگەرەنە ئارۆ جە مەتینا، جە ۋەرنیشتوو زاپی، جە سەرانسەرو زاپی مڎرامان ئینا ئارانە. سڵام پەی ئا قارەمانا. چڼین هەزار جارۍ سڵامشا ۋنەبۆ. ئاڎۍ ئارۆ جە ۋەرا ۋەرو دڕندایەتی ئەرەگیرینە جە ۋەرا ۋەرو قڕکەردەینە، نوێنەرایەتی ئیراڎەو گەلوو کورڎی مکەرا.
گەلە ئێژاکەما؛
ئارۆ ناوچەو ۋەرکۊتوو مېیامینی گریۆ. قەیرانە زیاڎش کەردەن. بەڵام ئێمە موینمۍ تورکیای ئەرەگیر، ڕژێمی فاشیستی ئاکەپە-مەهەپەی هەوڵمڎۆ ئی قەیرانۍ فاڕۆ پەی جەنگێوە ناوچەیی. ئاڎۍ گەرەکشانە جە مابەینوو دەوڵەتا سەروەری و دەسەڵاتدارینە سەرو کورڎەسانی هامپەیمانیێوە وەڵۍ وزا. جە ۋەرا ۋەرو دۆزو ئازاڎیی کورڎی، جمیەرەکەیمانە، گەرەکشانە پی جۆرە هامپەیمانیێوە وەڵۍ بوزا. دیارا وەردەممانە قۆناغەی چامنۍ مەترسیڎارە هەنە، ئێمە پېسە جمیەری جە ۋەرا ۋەرو ئینەینە خەبات مکەرمۍ، جەنگ مکەرمۍ. پەی ئانەی جە ۋەرکۊتوو مېیامینینە، کورڎەسانێوە ئازاڎ، سەربەخۆ وەش بۆ، ئێمە جەنگ گەش مکەرمۍ. ئی جەنگە جەنگو شەرەفیا، جەنگو نیشتمانپەروەرییا، جەنگو شەرەفی و نامووسیا. ئێمە ئی جەنگیە بەرز مکەرمێوە. ئێمە جە ۋەرا ۋەرو ۋێورەشانە، جە ۋەرا ۋەرو ئەرەگیرینە هەنگامێوە پەی دمایی نمەنیەیمۍ. هەتا مۍ ئێمە قەوەتتەرەش مکەرمۍ. بەڵام پەنەوازا گەلە نیشتمانپەروەرەکەما جە ۋەرا ۋەرو دوژمنانە پەشتگیریما بکەرا. ئێمە بانگەواز جە گرڎوو نیشتمانپەروەرا کورڎی، حزبەکا، ئەرەمەرزیا، کەسایەتییەکا مکەرمۍ، پەنەوازا ئی حەقەتینەیە بوینا و پەشگیری گەریلاکاو ئازاڎیی کورڎەسانی بکەرا.
ئێمە داوا جە جوانا کورڎی مکەرمۍ، جوانا عەرەبی پەنەوازا بەشدارۍ ئی ڕاپیما پیرۆزەیە با. بەشدارۍ با. ئارۆ سەرو گەلوو کورڎی سیاسەتوو دلێنەبەردەی، سەرو گەلوو عەرەبی، ئاشووری، سریانی مەترسی هەن. پۊکەی جە مابەینوو گەلانە، گەلوو کورڎی، عەرەبی، ئاشووری، سریانیە سەرو بنەماو پارادایمی نەتەوەیی دیموکراتیکی یۆبیەی گەلا وەش بۆ، یۆبیەی زەحمەتکێشاو تورکیای و گرڎو ناوچەکەی وەش بۆ. تورانیزمو تورکیای گەرەکشا جە گرڎوو ناوچەکەینە تاریکیێوە وەڵۍ بوزۆ. بەڵام وەڵۍ گرڎ چێوێنە پەنەوازا جە گەلوو کوردینە یۊبیەی نەتەوەیی وەش بۆ، ستراتیجیێوە هامبەش بنیاڎ بنریۆ. ئێمە پېسە جمیەری پەی ئینەی هەوڵ مڎەیمۍ و ئینە پەنەوازیێوە فرە گرنگا.
گەلە بەقیمەتەکەما، دۆس و هەمڕایا وەشەسیای؛
ئارۆ سەرو ڕابەرایەتیما ڕابەر ئاپۆی گۆشەگیریێوە قورس، ئەشکەنجەی دەروونی هەن. سەرو گرڎوو شکۆمەندی گەلەکەیما، سەرو کولتووریما، هۊرپڕایما، گرڎو شێوەکاش بەهاکاما هرووژم هەن. پەنەوازا گەلەکەما جە ۋەرا ۋەرو ئی هرووژمانە، جە چوارچێوەو هەڵمەتەی جیهانیێنە بەشدارۍ هەڵمەتەکەی با. هەر کەس لاو ۋێشۆ فیداکاری بکەرۆ. بە ۋەرپرسیاریۆ هەڵسوکەوت بکەرۆ. پارێزنای جەوهەری پەنەوازا وەڵۍ بوزیۆ. جە ۋەرا ۋەرو هرووژمەکانە پەنەوازا ئێمە پارێزنای جەوهەری گەلی وەڵۍ بوزمۍ. ئێمە پېسە گەریلاکاو ئازاڎیی کورڎەسانی چی سەردەمەنە، واتە جە ساڵەو ٤١ەمو هەنگامەو ١٥و ئابینە ئێمە بە زېڵۍ عەگیدەکا، زیلانەکا، بە زېڵۍ ١٥و ئابی هەڵسوکەوت مکەرمۍ. جە چوارچێوەو تاکتیکی، پێرسپێکتیڤی ئێمەنە، ئێمە جەنگو سەر زەمینی، چێر زەمینی و جەنگی ئاسمانی هەوایی زیاتەر گەش مکەرمۍ. نەبەزیای و نەکەوتەی گەلوو کورڎی، نەکەوتەی گەریلاکاو ئازاڎیی بە گرڎ کەسۍ نیشانە مڎەیمۍ، ئیدیعا و قەرارو ئێمە ئانەبۍ.
ئێمە چی چوارچێوەنە پېسە فەرماندەیی قەرارگەو ناوەندی پەی گرڎوو گەلەکەیما، گرڎوو دۆساما، پەی گرڎوو خەباتکارا و هەمڕایاما سڵام و ڕێزداری ۋێما پێشکەش مکەرمۍ. چی سەردەمە تاریخیە گرنگەنە، گرڎ کەسی خوڵقە مکەرمۍ پەی ئەرکوو ۋێشا و ئێمە پەی گرڎ کەسۍ جە سەرەتانە پەی گرڎوو هەمڕایا، گرڎوو گەلەکەیما، گرڎوو دۆساما چی سەردەمە گرنگەنە بە دڵ و گیان سەرکۆتەی موازمۍ. جە ڕاپیمای ئازاڎکەردەی فیزیکی ڕابەر ئاپۆینە، جە ڕاپیمای ئازاڎکەردەی کورڎەسانینە، جە ڕاپیمای ئازاڎکەردەی گەلوو ناوچەکەینە، ئێمە پەی گرڎ کەسۍ سەرکۊتەی موازمۍ و ماچمۍ سەرکۊتەی، سەرکۊتەی، سەرکۊتەی.
مرۆنە ئەرەگیری و خیانەت!
بژیۋۆ جەنگوو گەلی شۆڕشگێڵنی!
بژیۋۆ سەرۆک ئاپۆ!"
