ئەندامەو دەسەی فەرماندەیی یەژاستاری باتوفا چەکدارە ئەرەیاۋناش، کە هرووژمەکۍ دۆڵەتو تورکی و پەدەکەی بە تایبەتی پەی سەرو مېڎانو مەتینای بەردەوامێنۍ و واتش، "ئەرەگیر و خیانەتکارۍ ۋەرا ۋەر بە هەڵوێسی شکۊمەندانەو کورڎی مەحکومێنۍ بە شکس و تێکشیەی".
دەوڵەتو تورکی ئەرەگیری سوورا سەرو درێژەدای بە سیاسەتوو جینۆسایدی و قڕکەردەی و جەنگی جە کورڎەسانەنە. گرڎ ڕوۍ و گرڎ ساتێ هرووژمە ئەرەگیریەکاش جە کەشەکا کورڎەسانینە فراوانتەرۍ مکەرۆ، ئا پا گیریە پانەیرە دیارا. سوپاو تورکی ئەرەگیری جە ١٦و نیسانوو ٢٠٢٤یوە گەرەکشا جە جموجۆڵی ئەرەگیرینە جە هەڕێموو مەتیناینە بلۆ وەڵێوە.
ئەندامەو دەسەی فەرماندەیی یەژاستاری باتوفا چەکدارە سەبارەت بە هرووژمە ئەرەگیریەکا دەوڵەتو تورکی نرخنایش کەرد.
باتوفا چەکدارە ئەرەیاۋناش، کە دەوڵەتو تورکی جە ساڵەو ٢٠١٩یۆ پەی ئانەی بەتەمامی هەرێمەکەی ئەرەگیر بکەرۆ پلانەی درێژخایەنە جابەجێ مکەرۆ و پی جۆرە بەردەوامە بیە: " دژوو کوردی ئازاڎیی و ژەنەی ئازاڎۍ، دوژمنی ئەرەگیر پەنا پەی گرڎ ڕاو و رێبازێوە مبەرۆ.
تیرۆر، گێرتەی، ئەشکەنجەی و گرڎ جۆرە هرووژمێوە جە ۋەرا ۋەروو گەلەکەیمانە بە رەوا مزانۆ. هەرپۊکەی ئارۆ جە سەرنیشت تا هەرێمەکاو پارێزنای مەدیای ئا هجوومۍ مکریا سەرو مېڎانەکا گەریلای، بەشێوەنۍ چا حەقەتینەیە. هرووژمەکۍ سەرو گەلەکەیما و سیاسەتوو قەیومی، فشار پەی سەرو گەلەکەیما و پەی سەرو هامڕاکاما جە زیڼانەکایچەنە بەردەوامیی ئا سیاسەتە قڕکەرییەینە. حەرپاسە سیستموو ئەشکەنجەی کە دژمن جە ئیمراڵینە ۋەرا ۋەر بە رابەرایەتیما جابەجێش مکەرۆ، ئەنجاموو ئا ئەقڵیەتەینە. جە خواکورکۆ تا هەفتانین، ئاڤاشین، زاپ و مەتینا جە ماوەو ٦ ساڵی ۋییەرڎەینە دژوو هرووژمە ئەرەگیریەکا مڎرامان و ئەرەکۊشای گۊرە ئەنجامدریان. ئا مڎرامانە هەڵای بەردەواما.
یۆ جە مەیدانەکا کە دەوڵەتی تورکی ئەرەگیرکەر بەتایبەتی قورساییش وستەن سەر و سەرەمڕ هجوومەکاش پەی بەردەوامێنێ، هەرێموو مەتیناین. هەڵبەت هجوومەکێ پەی سەروو هەرێموو مەتینای تازێ نییەنێ، ٤ ساڵێن ئا هجوومێ بەردەوامێنێ. هەمان وەختەنە هجوومەکێ پەی سەروو مەتینایچ بەشێو جە پلانەو دەوڵەتی ئەرەگیرکەری وەراوەروو هەرێمەکاو پارێزنای مێدیاینە. وەروو ئانەیە هەرێموو مەتینای بەینوو هەرێمەکاو پارێزنای مێدیاینە و سەرنیشتوو کوردستانینە پێسەو پردێوەن. هەرپاسە ئامانجێ فرێ ئینێ پەشتەو هجوومەکاو سەروو مەتینایوە هەنێ. یانێ هجوومە ئەرەگیرکەرییەکێ پەی سەروو هەرێمەکەیما، کە پێسەو بەهەشتین، ساڵەو ٢٠٢١یوە بە هجوومێ پەی سەروو قاشورایێ دەسش پەنە کەرد. ئا دۆخە چوار ساڵێن سەرەمڕ بەردەواما.
هەرێمەکاو پارێزنای مێدیای هێزی سەرەکینێ پەی پارێزنای خاکوو پانیشتی
ئەندامەو دەسەو فەرماندەیی یەژاستاری باتوفا چەکدارە وستش ڕووە، کە بەتایبەتی هجەەمەکێ پەی سەروو مەتینای فرەلایەنێنێ و پێسە درێژەش بە قسەکاش دا: "تەنیا دەوڵەتوو تورکی هجووم نمەکەرۆ سەروو مەیدانوو مەتینای. هەرێمێوە کە زیاتەر جە تەپ یاگێوی ئەرەگیرکەری و خیانەت دلێشەنە یۆی مگێراوە، مەیدانوو مەتیناین. ساڵەو ٢٠٢٠ دەوڵەتوو تورکی بە هامکاری پەدەکەی ئۆپراسیۆنێوی ئەرەگیرکەرییش دەس پەنە کەرد. پەدەکە گەرەکش بێ کە بواروو تەپ جۆرە هجوومێوە پەی دەوڵەتوو تورکی بڕەخسنۆ. زیاتەر جە ٣٠ ساڵان گەریلا ئینێ چا مەیدانانە، سنووروو پانیشتوو کوردستانی و خەڵکوو مەتینای مپارێزنا، بەڵام پەدەکە و بنەیانەو بارزانی ئینێ شۆنەو زیاتەرکەردەی سامانوو وێشاوە. یانێ پەی پارێزنای خاکوو پانیشتوو کوردستانی، هیچ هەوڵێوەشا نییەنە. نەک پارێزنایی خاکوو پانیشتوو کوردستانی، بەڵکوم وردە وردە مداش دەسوو دەوڵەتوو تورکیوە. ئارۆ پانیشتوو کوردستانینە سەدان بارەگێ دەوڵەتوو تورکی ئەرەگیرکەری هەنێ، بەڵام ئینەیچ دەوڵەتوو تورکیش تێر نەکەردەن، دەوڵەتی ئەرەگیرکەر مزانۆ کە چندە پانیشتوو کوردستانینە بنێ بوزۆ، تا ئا وەختە هێزەکاو گەریلای بانە نمەتاوۆ بەتەمامەتی خاکوو پانیشتی ئەرەگیر بکەرۆ، پەوکای دەوڵەتوو تورکی و پەدەکە دەسشا بە هامکاریی کەرد و قەرارشا دا هەرێمەکاو پارێزنای مێدیای ئەرەگیر بکەرا.
ئا ڕاسییە لاو تەپیماوە ئاشکران؛ هەرێمەکاو پارێزنایی مێدیای هێزی بنچینەیینێ، کە خاکوو پانیشتوو کوردستانی مپارێزنا. پەدەکە ڕایەکاو مەتینایش وستێرە و دماو ئانەیچە دەوڵەتوو تورکی ئەرەگیرکەری وەهاروو ٢٠٢١ ێنە دەسش بە هجوومی کەرد و سەروازاو وێش کەشوو زەندورای، خەتەو قاشوراو کەشوو کۆردینە، کەشوو ستونای و ئازادی بنێشا وستە. دەوڵەتوو تورکی ساڵەو ٢٠١٩ێنە دسش ملوو چند تەپ و کەشێنە سنووروو قاشوراینە گێرتەبێ. بەڵام وەروو ئانەیە چی ساڵانە گەورەتەرین مدرامان هەفتانینەنە ڕووە دێ وەروو ئانەیە وەڵتەریچ هجوومی ئەرەگیرکەری چاگە بێ، کەشە سنوورییەکاو خەتەو قاشورای فرە نەبێنێ بە پەرسەو ڕۆی. بەڵام ئانە بە ماناو ئانەیە نمێ، کە دوژمن چا ئۆپراسیۆن نەکەرۆ. پێسە ئەگەر ئێمە خەتەو قاشورایچ پەی زیاد بکەرمێ، دەوڵەتوو تورکی ئەرەگیرکەری چا شش ساڵەو دماینە ئۆپراسیۆنی ئەرەگیرکەریش مەیدانەکەنە بە پەنج قۆناغێ درێژە پەنە دان.
قۆناغوو ئەوەڵی، چند تەپ و کەشێوەش سنووروو قاشوراینە بێنێ، قۆناغوو دووەمی، هجووم پەی سەروو سەرتاسەروو خەتەو قاشورای. قۆناغی یەرەم پەی سەروو کەشوو هەکاریی بێ، قۆناغی چوارەم کەشوو ئۆرتێ و کەشوو چارچەلی، سەروو گۆلکای و سەروو مەتینایچ. بەڵام گەریلاکێ قاشورانە تا چارچەل و دەوروبەر، کەشوو ئۆرتێوە تا سەروو مەتینای و سەروو گۆلکای مدرامانشا درێژە پەنە دا. گرد ساڵێوەیچ بە سەدان چالاکیێ دژوو هێزەکاو ئەرەگیرکەری مکریانە و بە سەدان ئەرەگیرکەرێ سزا مدریانێ، ئاشکران کە چێولای ئا مدرامانە بە شێوەی گەریلایەتی پرۆفیشناڵ بەردەوام مبۆنە و مدرامانی درێژخواین بەردەوام مبۆنە.
بە مدرامانێوە، کە بە سەرمەشقایەتیی هامڕا وێگیرەکاما پێسەو ڕابەر، هەژار، سەما، ئازێ، نوری، سۆزدار، ماردین، باگەر، حەکیم، جەسور، رۆژین، رۆزا، زیلان و رۆستەمی کریا، گورزی دژوار وەنەو دوژمنی دریا، ئا جەنگ و مدرامانە بڕێو جارێ گەرمای تاقەتپڕووکنوو هامنی، بە ئاورایی و بێئاوی و بە سەرمەشقایەتیی هامڕا گەشمەردا کریا. گەریلا چندین ڕوێ ڕاشا بڕیە و دژوو ئامانجەکاو دوژمنی چالاکییشا کەرد و ئا گورزێشا وەنەو دوژمنی شانێ، کە نەتاوا ویرشا بشۆوە".
خەڵکوو مەتینای سەرباروو گردوو هجوومەکا سازششا سەروو هەڵوێستی شکۆمەندانەیشا نەکەردەن،
باتوفا چەکدار یادش ئاردۆ، کە چەنی فەرماندەکا پێسەو هێژار و ڕابەری بە فرسەتی کەم تونێلەکاو زەندوراینە ٥٢ ڕوێشا ویەرنا و واتش: "لایێوە بریندارەکا دەرمان کەرێنێ، لاێوە تەرۆ جەنگو مدرامان و. بە گردوو هێز و وزەیشاوە گەرەکشابێ پەرە بە مدرامانی بدانێ و ئەرەگیرکەرا دلێنە بەرا. پەوکای ئا قارەمانێ، کە داراو ئیرادێوی پێسەو کەشەکاو زەندورانی بێنێ، مۆرەو وێشا وەنەو قۆناغی تارێخیی دا. تارێخشا نویستۆ، کەشوو هەکاریینە کۆشیای بە سەرمەشقایەتی فەرماندە ئازێ، نوری و حەکیمی کریا، کوبرای دوژمنی وزیارە واری، جەنگوو تیمی گێڵیاری و تونێلەکا پێوە کریا. بڕێ جارێ تاریکی و سەرداو زمسانینە، بە سەرمەشقایەتیی فەرماندە رۆزا ئامەد، بنەفش و بارانی چالاکییێ چانێ کریێ، کە دوژمن شۆک بێ و تووشوو شڵەژیای و سێندرۆمی ڕۆحیی بێنێ. دۆخوو ئیساتێنە مدرامانوو مەتینای تونێلەکاو جەنگینە، هەم سەروو زەمینیوە لاو تیمە نیمچەگێڵیارەکاوە پەیڕەو مکریۆ و چالاکیێ فرێ مکریانێ.
سەرباروو گردوو هجوومەکاو دەوڵەتوو تورکی ئەرەگیرکەری ڕاسیینە هێزێو، کە مەتیناش گەمارۆ دان، دەوڵەتوو تورکی نییەن. یانێ جە ئەرەگیرکەردەی مەتیناینە ئانە کە دەوری سەرەکی مگێڵنۆ خیانەتوو پەدەکەیا نەک دەوڵەتوو تورکی ئەرەگیرکەری. پەدەکە گەرەکش بێ لاو گردوو ڕایەکاو هاموشۆیوە بوزۆرە و جووڵەو گەریلاکا قۆرتاوی بکەرۆ، لایێوی تەرۆ بە گردوو توانای لۆجستی و بیناسازییوە قۆرتش پەی وەش مکەرۆ و دلێشانە بەرۆ. لایێوی تەریچۆ دەزگاو پارێزنای(پاراستن) و میت گەرەکشابێ دلێ خەڵکینە سیخوڕی پەرە پەنە بدانێ. پا ڕا و ڕێبازا گورز وەنەو هێزەکاو گەریلایما بدانە. خیانەتوو پەدەکەی فاڕیا پەی پارچێوە جە هجوومەکا پەی سەروو هەرێموو مەتینای و فشارێوی گەورەش وست سەروو گەلوو هەرێمەکەی.
تا دژوو ئەرەگیرکەریی دەوڵەتو تورکی نەمرداوە، یاردەی ماددی و مەعنەوی نەدانە بە گەریلای پیسە گەرەکشابێ گردوو گەلوو هەرێمەکەی و عەشیرەتەکا بەدیل بگێرانە. فشار مکەرانە سەروو خەڵکوو مەتینای تا دەگا، یاگێ، زەمین، باخ و دەگایەکاشا، کەشەکاشا چۆڵ بکەرا و کۆچبەرێ بانە. پێسەیچ گەرەکشانە هەرێمەکەی پەی بۆ ئەرەگیرکەرا بازا جیا، مەتینانە بڕێو خائینێ هەنێ کە پەی زەڕی نامووسشا مورەشانێ و بڕێو کەسێچ هەنێ کە خزمەت بە سیاسەتەکاو پەدەکەی مکەرانە. جگە چانیشا خەڵکوو مەتینای و گلێرگەو ئاگەیە کەسایەتیی پەدەکەینە نەفرەتە وەنەو خیانەتی و نەفرەتە وەنەو ئەرەگیرکەری دەوڵەتوو تورکی مکەرا. شکۆ و کەرامەتشا نەورەتەن، خاک و زێدوو وێشانە مەنێنێوە. سەرباروو گردوو هجوومەکاو دەوڵەتو تورکی، فشارەکاو پەدەکەی و گێرتەی خەڵکوو مەتینای دەستبەردارێ هەڵوێستی شکۆمەندانەی نەبیێنێ. هەڵوێست دژوو خیانەتی، هەڵوێستوو کوردی ئازادین. هەڵوێستوو ئینسانی ئازادین، ژەنێ ئازادێ، پیای ئازادی و گلێرگەی ئازادین. هەڵوێستوو خاوەنداریین جە شکۆمەندیی وێشا".
