ڕەزا ڕەسایی زیندانیی سیاسی و کوردی یارسانی، دریا قەنارە
ڕەزا ڕەسایی جە گیرایایاو سەرەوردای ژەنی، ژیوای، ئازادی سەرسەعبوو ئارۆی بەبێ هاگاداریی بنەیانەکەیش و بەبێ وەرەچەمگێرتەی مافوو دماین دیداری کرماشانەنە دریا قەنارە.
بەپاو هەواڵیوی تۆڕەو مافەکاو ئینسانوو کوردسانی سەرسەعبوو ئارۆی یەرەشەممە ڕەزا ڕەسایی، ٣٥ ساڵ، جە گیریایاو سەرەوردای ژەنی، ژیوای، ئازادی، جە زیندانوو دیزڵئاواو کرماشانینە دریا قەنارە.
قەنارەدای ئا بەندکریا سیاسییە بە بێ هاگادارکەردەیوە بنەیانەی و پارێزنەرەکەیش بییەن و مافوو ئانەیشا نەدان پەنە، پەی دماین جاری چەمش بگنۆ بە بنەیانەکەیش.
وەرپەرساو زیندانی جە پەیوەندیێوی تەلەفۆنینە بنەیانەو ڕەساییشا جە قەنارەدایش هاگادارێ کەردێنیوە و ناستەنشا جەنازەکەیش بفاڕاوە پەی شاروو سەحنەی و حەر جە کرماشانەنە جەنازەکە بە چەمداریی هەسوو هێزە ئەمنییەکا قەبرسانوو مینائابادی ئەسپەردەو خاکی کریان.
١٨و تشرینوو دووەموو ساڵەو ٢٠٢٢ و هاموەخت چەنی سەرەوردای ژەنی، ژیوای، ئازادی مەراسیموو یادکەردەیوەی گیانجەدەسدانی سەید خەلیل عالی نەژادی جە کەسایەتییە دیارەکاو یارسانەکا سەحنەنە کریا، وەلێ مەراسیمەکە فاڕیا پەی وێنیسانەدای دژوو کوشیای ژینا ئەمینیێ و گرژی کەوت بەینوو بەشداراو مەراسیمەکەی وهێزە ئەمنییەکا، بی بایسوو ڤەردەوامیی ناڕەزایی چا شارەنە پەی چند ڕوا.
ڕۆی دماین هەواڵوو کوشیای نادر بەیرامی سەرۆکوو ئیتلاعاتوو سوپاو پاسدارا سەحنەنە وەڵا کریاوە و ڕۆو ٢٤و تشرینوو دووەمی ڕەزا ڕەسایی بەشداروو مەراسیمەکەی شەهریاروو پارێزگاو تارانینە گیریا و فاڕیاوە پەی شاروو سەحنەو کرماشانی و تۆمەتەو کوشتەی ئا ئەفسەرە هەواڵگێرییەو سوپاو پاسداراشە وزیا پاڵ.
دماو نزیکەو ساڵیوە مەنەیوە زیندانەنە و ئەشکەنجەی دژوار، ٧و ئۆکتۆبەروو ٢٠٢٣ێنە ڕەزا ڕەسایی لەقوو دادگاو کرماشانی سزاو قەنارەیش دا و کانوونو یوەموو هەمان ساڵێنە دیوانوو باڵای دادەوەری سزێکێش پەسەندە کەردە و شوباتوو ئێساڵیچەنە داواکاریی لوایۆپۆرەو سزێكێ ڕەت کریاوە.
سەپنای سزاو قەنارەو ڕەسایی ئینا وەختێوەنە، کە ئا زیندانە سیاسییە ئەرەنیشتەی دادگاینە واتەبێش " چێروو هەڕەشاو ئەشکەنجەی و دەسدرێژینە" ددانش نیان پۆرە و ئادیچ تاوانبار نیا و نەکەردەنش.
حەر هەمان دۆسیەنە شش کوردێ تەرێ یارسانێ بە فەرهاد بەیک گەڕوسی، سەید ڕەسوڵ ڕەزەوی، سەید مەعسوم ڕەزەوی، ئارمین حەقی مەنجەق، پوریا مێنەتی مەنجەق تەپە، شجاع مێنەتی مەنجەق تەپە کە بەشدارییشا مەراسیموو یادکەردەیوە سەید خەلیل عالی نەژادینە کەردەبێ، بە تۆمەتەو 'نیایۆ پەشێوی و تێکدای ئاسایشی گردینی' سزاو ساڵێوە زیندانی و ٧٤ قامچیاشا ملەرە سەپیێبێ.
بە پاو ئاماروو تۆڕەو مافەکاو ئینسانوو ئێرانیچ ئەوەڵوو سالەو ئێساڵیوە ٣٠٩ کەسێ زیندانەکاو ئا وەڵاتەینە دریێنێ قەنارە کە فرێشا کوردێ و بەلووچینێ.
