کەلارنە دژوو هەموارو یاساو باری کەسی، ژەنە چالاکێ ئەرەیاوناێوەشا وەڵا کەردۆ و واتشا؛" دەسەڵاتی تازەو عێراقی ئینا حەوڵێ تازەکەردەیوە یاسا کۆن و جیامەنەکاو بەعسینە، ڕاو مەزهەبی و عەشرەتیوە،پیسە هەمیشەی سینەو ژەنا کەرا بە نیشانێ".
ئارۆ شارو کەلاروو ناوەندوو ئیدارەو گەرمیانینە، ناوەندی هامبەشوو ڕێکوزیایەکاو ژەناو گەرمیانی، دژوو هەمواروو یاساو باری کەسی ئەرەیاوناێوەشا وەڵا کەردۆ.
بەهار ئەحمەدە ئەندامەو لەقوو گەرمیانوو کۆمەڵەو ئافرەتاو کوردسانی واتش:" دەسەڵاتدارە تازاو عێراقی هامشیوەو ڕژێمەکاو وەڵێ بەردەوام ڕا جیا جیاکاوە، چینەکاو گلێرگەی سەرکوتێ مکەرانە و مافشا موەرا، ئی دەسەڵاتە تازە بەردەوام ئینا حەوڵێ لوایۆپۆرەو دەسووری و یاسا ئەوەمەنەکاو بەعسینە، چا بارەنە کە دماکەوتەیی مەزهەبی و عەشیرەتی دەسوپلوو خەڵکینە تندێ بکەراوە و گلێرگەی بەرەو دما بگێڵناوە،بەتایبەتی بە نامێ مەزهەبی و شەریعەتیوە چندین چێوێشا فاڕێنێ".
واتیچش: " چی بەینەنە پێسەو هەمیشەی سینەو ژەنا مکەرانە بە نیشانێ، چی گلێرگەنە زیاد جە نیم سەدەی چێوەڵتەر و شارستانیەت و یاسا مەدەنییەکێ دەسشا بە نەشونمای کەردەن، جارێو جە ڕاو کەمپەینە کۆنەپەرسانەکاو ڕژێموو بەعسیوە بە نامێ، فتواو کوشتاروو ژەناوە بە بەهانێ پیسەو شۆرتەیوە شەرەفی و هاندای فرەژەنیوە، یانی پەی ئانیشا کە بەهانێشا هەنە کە مێردەکێشا جەنگی یانەوێرانکەروو عێراق و ئێرانینە کوشیێنێ.
ئیسەتێ شەپۆلێوە کۆنەپەرسی باڵێش ملوو ئی گلێرگەیرە کێشتێنێ و لایەنە دەسەڵاتدارە ئیسلامییە شیعەکێ گەرەکسانە چا ڕێوە یاساکو باروو ژەسی بفاڕا و بە نامێ مەزهەبی و شەریعەیوە ملشارە بسەپنا.
ئینە تا سەروو پێشەی سووکایەتین بە ژەنا و دژوو ئینسانینو نەعلەتەش وەنە کریێنە، چانەی زیاتەر بەیاساییکەردەی دەسدرێژییی جنسین پەی سەروو کناچێ (٩) ساڵێ کە هەڵای ڕاس و چەپوو وێش نمەشناسۆ، کە جیای فێرەو ئەلف-بێ بکریۆ و خەریکەو یانەقۆڵا بۆ، تاوانیوە فرە گەورەن و تەرسێنە تا هەنە یەخێش وەرمەدۆ و کەرۆش بە نەوەشیی دەروونی.
ئێمە ئا ژەنێ کە ئی ئەرەیاونیەما یاونان، وەختێوەنە کە قەرارما دان گردوو قوەیماوە دژوو ئی هەرمانە نائینسانانێ بمدرمێوە، داوا وەنەو خەڵکی ئازادیوازوو دنیێ مکەرمێ، جمیەری یەکسانیواز، ورسوڕیایاو ژەنا، جمیەری کرێکاریی دنیێ، ئەرەمەرزیایەکاو مافوو ئینسانی و گردوو حیزب و لایەن و کەسایەتییەکا مکەرمێ کە ڕاددەو تەرسەو ئی هەرمانێ چڵاکنۆتارە و دەنگوو ناڕەزایەتیتا بەرز بکەردێوە و تا پەیتا مکریۆ دژوو ئی سووکایەتییە بمرددێوە و پەشتیوانیی جە خەباتیما بکەردێ، فشار بوزدێ سەروو لایەنە وەرپەرسەکاو عێراقی و پەرلەمانی و دەزگای قەزایی تا ئی هەرمانێ بمدرنمێ و یاگەکێشەنە یاسایوە بمجمێرە کە سایسێ خەڵکوو ئێراقی و ئینسانی وەڵێکەوتەی و هامچەرخی بۆ."
