ژورو ڕەوەندی کوردیی ژڵېوەو فاڕیای ئەرەیاۋنێوەش پەی ڕای گرڎیی وەڵاکەردۆ و ئاماژەش پانەیە کەرد کە؛ لەشکرکێشیەکا تورکیای پەی سەرو ھەرێموو کورڎەسانی شەرمەزار مکەرا، وە بە ئەرکی نیشتمانی ۋێشا مزاناش کە بێدەنگۍ نەبا .
ژورو ڕەوەندی کوردیی ژڵېوەو فاڕیای ئەرەیاۋنێوەش پەی ڕای گرڎیی وەڵاکەردۆ و ئاماژەش پانەیادا؛کە لەشکرکێشیەکا تورکیای پەی سەرو ھەرێموو کورڎەسانی شەرمەزار مکەرا، وە بە ئەرکی نیشتمانی ۋێشا مزاناش کە بێدەنگۍ نەبا .
ئەرەیاۋناو ژورو ڕەوەندی کوردیی ژڵېوەو فاڕیای پەی ڕای گرڎیی
ئێمە جە ئۆرگانەکا ژڵېوەو فاڕیای جە دیاسپۆرا، ئیڎانەو لەشکرکێشیەکا تورکیای و جەنگی و بۆردومانکەردەی ھەرێموو کورڎەسانی مکەرمۍ، وە بە ئەرکی نیشتمانی ۋێماش مزانمۍ بێ دەنگۍ نەبیمۍ .
بێدەنگ نەبیەیچما عیلاقەش بە پیلانگێڵنیێ گەورەی و مەترسیڎاریۆ هەن سەرو قەوارەو دەستوریی هەرێموو کورڎەسانی، جە ۋەرا ۋەریچەنە، حزبە دەسەڵاتدارەکۍ ھەرێمی به بێدەنگی و بێ ھەڵوێسیشا جە ۋەرا ۋەرو لەشکرکێشی و پاشێلکاریەکا دەوڵەتو تورکینە، بانۍ بە هامکارۍ ئا پیلانگێڵنیە ۋەر فراوانۍ،
هامکات لاوازی هەڵوێسو حکومەتو هەرێمی شیاوو ڕەخنەیا، کە نەتاواش جە ۋەرا ۋەرو ئەرەگیریەکا دەوڵەتو تورکینە بێنە دەنگ و ڕاش پەی ئاماو بنەوستەی هێزەکا عێراقی کەردۆ، چنی ئەرەگیرکەردەی و سنوربەزانایەکا تورکیای قبوڵ مکەرۆ بە درێژای (٤٠ ) کیلۆمەترا پەی دلۍ خاکو هەرێمی؟ چنی شۊنەماو ۋێش چۆڵ مکەرۆ پەی سوپاو تورکیای؟ چنی سەنگەرو تورکی پارێزنۆ دلۍ خاکو ۋێشەنە؟
چا ڕوانگۆ ، داوا جە گرڎوو هێزە سیاسییەکا مکەرمۍ، پێوەرە ھەڵوێسی جدیما بۆ و با جە ئیساتۍ بە دماوە ڕا نەڎەیمۍ فەزاو خیانەتکاری و داردەسی پەی دوژمناما فراوان بۆ، چونکی یۊ جە ئەگەرە مەترسیڎارەکا هرووژم و تورکیای بۆ بە مایۍ سەرجەنۆ ژیۋنایۆ داعشی و زیڼەبیەیۆ گەراو تیرۆری و مەتەرسی زیاتەر سەرو ئاسایش و ئارامی هامنیشتمانیا، چا حەقەتینۆ نیگەرانی ۋێما نیشانە مڎەیمۍ چانەی کە ۋەرپەرسو هەواڵگرى توركیای مێنە عێراقو سەردای لایەنەکا مکەرۆ و قەرار جە چارەنویسوو عێراقی مڎۆ و هێز و لایەنە سیاسیەکۍ بێدەنگېنۍ، هەرپۊکەی هەر ھێز و لایەنێوە عێراقی کوردی جە پانیشتەنە ئاسانکاری و ھامکاری ئا ئەرەگیریەو دەوڵەتو تورکیای بکەرۆ، ملۊنە چوارچێوەو خیانەتی و تاریخ جە یاڎش نمەکەرۆ. ئێمە تەماموو ئۆرگانەکاما ڕامسپارمۍ کە تەماموو دەسدرێژی و تاوانەکا ئەرەگیرا بەگرڎیی و دەوڵەتو تورکیای بەتایبەتی بیاونا بە گرڎوو دامودەزگا حکومی و مېیاندەوڵەتیەکا و ڕێکوزیاکا مافو مرۆڤی.
ژورو ڕەوەندی کوردی
٢٨/٧/٢٠٢٤
