جەمۊ ڕۊنامەوانا ژەنۍ (ڕۆژین) پێوەس بە قەرارو جە قەنارەدای دەوڵەتو ئێرانی، ئەرەیاۋنێوە نویسیاش وەڵاکەردۆ و داواو هەڵوێس هۊرگېرتەیش کەرد دژو جە قەنارەدای.

جە ئەرەیاۋناکەینە ئامان: "بە مەڵامەتو سیاسەتەکا جەنگیوە کە زیاتەرۍ بیێنۍ، گلېرگە جە گرڎ کاتێ زیاتەر پەنەوازش بە هۆشیاربیەیۆ هەن. فشارو ڕژێمە تۆتالیتارەکا سەرو ڕۆنامەوانا زیاتەرۍ بیێنۍ."

هەر جە ئەرەیاۋناکەینە ئاماژە پانەی کریان یۆ چا وڵاتا کە فشار و گێرتەیش ئینا چنە، وڵاتوو ئێرانیا و واتشا: "دماو سەرهۊرداکاو 'ژەنی، ژیۋای، ئازاڎیی' جە ساڵەو ٢٠٢٢ێنە، هرووژمەکۍ سەرو ئازاڎیی زیاتەرۍ بیۍ، هەر نمونەو ئا هەرمانۍ ڕژێمو ئاخونەکا ئێرانی جە ٢٣ۍ تەمموزینە کە سزاو جە قەنارەدایش پەی ڕۆنامەوانۍ پەخشان عەزیزیۍ و چالاکوانە شەریفە موحەمەدیۍ بەرکەرد."

هەر جە ئەرەیاۋناکەینە ئاماژە پانەیە کریان سەرۆککۆماری تازەو ئێرانی درێژە پنەدەرو سیاسەتەکا جە قەنارەداین.

'هەنگامە هۊربگێرمۍ '

جە ئەرەیاۋناکەینە داواو ئینەی کریا:

"پېسە جەمۊ ڕۊنامەوانا ژەنۍ (ڕۆژین) ئانەی واوەی مکەرمېوە کە پەنەوازا پېسە ڕۆنامەوانا ژەنۍ دژوو سیاسەتو جە قەنارەدای مردمېوە، جە ئەرەکۊشای و ویستەکاما پەشیمانۍ نەبیمێوە. وە هاوهەڵوێسۍ گرڎوو ئا ژەنانمۍ کە پەی ئازادیی ئینۍ ئەرەکۊشاینە. جە کەسایەتی پەخشان عەزیزیۍ و شەریفە موحەمەدیێنە سڵام جە چالاکا و ڕۆنامەوانا ژەنۍ مکەرمۍ، کە جە دژوو فشارەکا دەوڵەتا فاشیزمی سەرەشا نەنامنارە، پەی ئەرەیاۋنای مڎرامانەکا ژەنۍ بە ڕای گرڎینی قوربانیۍ گۊرێشا دێنۍ. داوا جە گرڎوو دەزگاکا ئەرەیاۋنای و ڕێکوستەیەکا ژەنۍ مکەرمۍ بە زانابیەیۆ بە ئەرەکۊشای دژوو جە قەنارەدای کە ئەرکێوە مرۆڤانەن' هەنگامە بنیا پەی مردنای سزاو جە قەنارەدای."