فێنککەرەوەکۍ زەمین سۆچنا و کۆمپانیا قازانجویستەکۍ حیچ دەربایزۍ ئا سۆچنایە نیەنۍ، کەحیچێوە چانەش جە سۊچنای جەنگەکا کەمتەر نیا، بەخشای ئا گرڎوو گڕۍ و گەرمیە بە بەری پاسە مکەرۆ تەنانەت ژیۋگەو سروشتیچ زیاتەر جەمەرگی نزیکتەرۍ باوە.
پارێزنای ژیۋگەی پەنەوازش بەشۆڕشێوەن دژوو ئا کۆمپانیاو کارگەو کارخانەو مانیفاکتۆرا کە بەردەوام ئامێرۍ گۆرە گۆرۍ فێنککەرەوەی وزانە بازاڕۆ، ئا ئامێرۍ ژورەکا فێنک مکەراوە بەڵام بەری سۊچنا، هیچ یۆ چا ئامێرا بەجۆرێ وەشۍ نەکریێنۍ کە زەرەر بەژیۋگەو ژیۋای نەیاۋنۆ، ئینسانی ۋۍ پەرس و ئی سەردەمیە، جیای ئانەی فێنکی سروشتی و ژیۋگەی پارێزنۆ و ژیۋگەو دارسانەکا جە گڕەو ئێرو سۆچنای پارێزنۆ، گرڎ چێوۍ بۊنەو ۋێشۆ و جە دژوو ژیۋگەی و ژیۋای گرڎینی مکەرۆ.
کریۆ پەی زانای کاریگەری ئا ئامێرا سەرو پیس بیە و گەرمبیەی زەمینی یەک ڕۊو هامنی گرڎوو ئا فێنککەرەوا کوشنمێوە ڕۊی دماتەر یان وەڵتەر کە گیسیێنێنە پلەو گەرمیەکەی مقارەنە بکریۆ، تا بزانمۍ ئێمە چ دەورێوە گێڵنمۍ جە سۊچنای ژیۋگەینە، ژیۋگەکەو ۋێما.
فێنککەرەوەکۍ زەمین سۆچنا و کۆمپانیا قازانجویستەکۍ حیچ دەربایزۍ ئا سۆچنایە نیەنۍ، کەحیچێوە چانەش جە سۊچنای جەنگەکا کەمتەر نیا، مرۆڤایەتی بەجۆرێوە جە سروشتی و زەریفی دوورکەوتەنۆ، کە هەر ئانڎەش لاوە گرنگا ۋێش جە چوار چێوەو دیوارو ئیانەکەیشەنە گەرمش نەبۆ و چەولاتەرۆ چێش مبۆ بابۆ، ئانا ڕۆ بە ڕۆ ئا ئامێرۍ زیاتەرۍ با و وەڵێکۊتەی زیاتەر بە ۋێشاوە مۋینا سەرو حسابوو زیاتەر گەرم بیەی، بەخشای ئا گرڎ گڕو گەرمیەی بە بەری پاسە مکەرۆ تەنانەت ژیۋگەو سروشتیچ زیاتەر جەمەرگی نزیکتەرۍ باوە، ئایا سەڎ ساڵۍ تەر چنین بۆ، ئینە ئا پرسیارێنە کەپێویسا جە ئیساتێوە شۆنەو جوابەکەیشەر گێڵمۍ، جوابی گونجیا نە نەگێڵاین، نە نمەزانووا، نە ئانەنە ئینسان بواچۆ خراپتەر مبۆ، جوابی گونجیا ۋیر کەردەیۊن جە نەجات دای زەمینی و ئینسانی چی ئاژەو ئیساتۍ.
فێنککەرەوە ساختەچیەکا کوشندۍ و گێڵدێوە پەی سەردەموو ژیۋگەی سروشتی، ئی ژیۋگە دەسکردە ژیۋگېوە ساختەو پەڕ جە نەوەشی و شێۋنای ژیۋای ئینسانیا، هەوای پاک و بێ ساختەو سروشتی ئینا دەشتە و دەرە و ڕوبارو کەش و کۊکانە، ڕووە گەرم و تاقەت بڕەکانە فێنککەرەوەکا کوشندێوە لوودۍ بەرۆ پەی دلۍ سروشتی، هەوا پاک و سازگارەکەی هۊرلوشدۍ، مرۆڤایەتی جە سۊچنای پارێزندۍ، ئینە تەنیا ڕانە پەی ئانەی ژیۋگە گنۊوە سەرو پەیا ۋێش و گژو گیواو دارو درەخت و باخچەکۍ هەست بەبیەو ۋێشا بکەراوە هەوای بێ دەسکردو بێ دەسکاری کریا هۊرلووشا.
مەسڵەحەت چانەینە نیا کۆمپانیەکۍ چنڎشا دەس گنۆ و متاوا چڼی تەر دۆلارۍ کەڵەکە بکەرا، مەسڵەحەت ئینا چانەینە ئینسان جە نەوەشی و ناوەشی و ژیۋگەی وێرانی دوور بوزیۆوە، زەمین پەڕ کریان چا کەرەسا کە دەوری مەترسیڎار مۋینا جە شێونای و داخکەردەی سروشتینە، پۊکاتی پێویسا گرڎما پېوەرە ۋیر جە چارەسەری بکەرمێوە، چارەسەر پا مەعنایە بەزەیما بەدارو گوڵ و باخچەکارە بێوە، بەزەی ئامایۆ پا مەعنۍ کە هەست بە ۋەرپرسیاری بکەرمۍ ۋەرا ۋەر بە مرۆڤی و ژیۋگەی، ئینە جەنگی دەسەویەخەو بەینوو ئاکاریو بێئاکاریا، جەنگوو بەینوو مەسڵەحەتی گرڎیی و قۆرخکاریا، چینەینە نمەکریۆ کەس بەهانێش با، چونکی عیلاقەدارا بە سەوایۆ، سەوای نەوەکاما و گرڎوو ئا بونەوەرو زیندەوەرا تا ئیساتۍ جە یانەو زەمینینە مژیوا.
