ۋەرپەرسەو کۆمیتەو دیپلۆماسی کژاری؛ ڕۆزەرین کەمانگەرە بۆنەو دووەمین ساڵیاڎو شۆڕشوو ژەنۍ، ژیۋای، ئازاڎیی جە ۋەرکۆتوو کورڎەسانی و ئێرانی پەی ئاژانسوو هەواڵوو فوراتی (ANF)ی قسێش کەردۍ.

'ژەنی جوانۍ بیۍ بە مەڵامەتوو وەڵابیەیۆ شۆڕشوو ژەنۍ، ژیۋای، ئازاڎیی'

ڕۆزەرین کەمانگەرە ئاماژەش پانەیە کەرد کە جە دووەمین ساڵیاڎو شۆڕشوو ژەنۍ، ژیۋای، ئازاڎیی نزیکۍ بیمێوە کە ئا شۆڕشە سەرو بنەماو زهنی، کۆمەڵایەتی و کلتووری بە سەرمەشقایەتی ژەنا وەش بی پی جۆرە دوا: "بە سەرمەشقایەتی ژەنە جوانا کە بیۍ بە مەڵامەتوو ئانەی ئا شۆڕشە جە تەماموو ئێرانی و نەتەوەکانە وەڵا بۆوە. بۆ بە مەڵامەتوو جەمۍ  فاڕیای گرنگی چونکی بنەماو شۆڕشەکەی زهنی و کلتووری و کۆمەڵاتی بۍ، فاڕیایەکێچ هەمان شێوازەنۍ و هەرپۊکەی چنی دەسش پنەکەردەن هەتا ئیساتێچ هەمان کاریگەریش سەرو گلێرگەی جیائاستەن و بەردەواما.

شۆڕشەکە فرە ڕادیکاڵ بۍ بە پەیامی ڕادیکاڵانە دەسش پنەکەرد و هەرپۊکەی هەتا ئیساتێچ بە شێوێوە ڕادیکاڵانە بەردەواما. گەورەتەرین کاریگەریش سەرو گلێرگەی؛ فاڕیای زهنییەتی و شێوازو ئەرەکۆشای بۍ، واتا شۆڕشوو ژەنۍ، ژیۋای، ئازاڎیی سەرکوت نەکریان و بەردەواما تەنیا هێزەکە بەشێوێوەتەر کەناڵیزە بیەن. یۆ جە هەڵوێسە ڕادیکاڵەکا گەلی، نەلاین پەی دەنگدای چونکی ئا دەسەڵاتیە قبوڵ نمەکەرۆ و بە چارەسەرش نمەزانۆ وە گەل ویستوو فاڕیایش نیشانەدا و ۋێش سەرمەشقی مکەرۆ."

'کۆمارو ئیسلامی ئێرانی جە سەرمەشقایەتی ژەنا متەرسۆ'

جە درێژەو قسەکاشەنە ڕۆزەرین کەمانگەرە باسش چانەیە کەرد هرووژمەکۍ کۆمارو ئیسلامی ئێرانی کە ڕووانە مکەرۆشا سەرو گەلی و ژەنا، نیشانۍ تەرسیشەنە جە سەرمەشقایەتی ژەنا و گەلی پۊکەی هەوڵو سەرکوتکەردەیش مڎۆ و واتش: "دووۍ ساڵۍ سەرو شۆڕشو ژەنۍ، ژیۋای، ئازاڎیی-رە موییەرۆ، یۆ جە سیاسەتە دژە مرۆڤەکا دەسەڵاتوو کۆمارو ئیسلامی ئێرانی قەنارەن و بەتایبە جە دماو شۆڕشوو ژەنۍ، ژیۋای، ئازاڎیی زیاتەر پەرەش ئەسان، پەی دلێنەبەردەی هێزە سەرمەشقەکا گلێرگەی پەی ئانەی گلێرگە هیوا و ئیراڎەش نەبۆ ڕۆ بە ڕۆ جە قەنارەدایش زیاتەر کەرد. ژەن و پیا جە زیڼانەنە ڕووبەڕوو ئی هرووژمەیە بیێنێوە.

جە ماوەو ئی دووە ساڵەو شۆڕشوو ژەنۍ، ژیۋای، ئازاڎیینە ژەنی پېسە هێزی سەرمەشقو گلێرگەی زیاتەر جە گرڎوو بەشەکا تەرو گلێرگەی بیۍ بە مەراموو ئی هرووژما دەسەڵاتی. ماوەو مانگێنە حکومو قەنارەدای پەی ژةنا سیاسی بەرشیەن و ئیساتۍ چوار ژەنۍ مەترسی جە قەنارەدایشا سەرا.  ژەنی سەرمەشقۍ شۆڕشوو ژەنۍ، ژیۋای، ئازاڎیینۍ پەیامی ڕادیکاڵانەشا بۍ. حکومەتو کۆمارو ئیسلامی حەقە جە سەرمەشقەکا مکەرۆوە، چونکی مزانۆ ئا سەرمەشقۍ کاریگەری فرەشا سەرو گلێرگەی هەن و بانۍ بە مەڵامەتوو فاڕیای ئەرێنی جە گلێرگەنە. جە ئیساتێنە سیاسەتوو جە قەنارەدای وەش بیەن پەی حەقکەردەیۆ جە شۆڕشوو ژەنۍ، ژیۋای، ئازاڎیی".

'جە نامەکاو پەخشان عەزیزیۍ و وەریشە مورادیێنە پەرسوو چارەسەری کوردی و ژەنۍ دەسنیشان کریان'

ڕۆزەرین کەمانگەرە ئەرەیاۋناش جە نامەکا پەخشان عەزیزیۍ و وەریشە مورادیێنە پەیامی ڕادیکاڵیش چنە بۍ پی جۆرە بەردەوامە بیە: "نامەکۍ پەخشان عەزیزیۍ و وەریشە مورادیۍ هامتەریبێنۍ چنی پەیامەکاو شۆڕشوو "ژەنۍ، ژیۋای، ئازاڎیی" باسو کێشەو گرفتە کۆمەڵایەتیەکا، کێشەو ژەنۍ و نەبیەی دیموکراسی و جیاوازی نەتەوەیی، هرووژمەکۍ کە جە قاڵبوو سیستەمو سەرمایەداری جیهانی و دەوڵەت نەتەوەکانە مکریۆ. سەڕەڕاو ئانەی کە کۆو ئی گرفتا دەس نیشانێکریێنۍ جە هەمانکاتەنە بەدیلەکەیچش باسکریان، کە کۆنفیدراڵیزمی دیموکراتییا کە چارەسەرش پنەن پەی ۋەرکۆتوو مېیامینی و کۆو جیهانی. جە نامەکانە کە باس جە پەرسو ژەنۍ و نەتەوەو کوردی مکریۆ کە ڕەگەزێوە پەنا وزیان، جە هەمانکاتەنە باس جە گەلێوە جە نەتەوەکا مکریۆ کە دەسەڵاتوو ناوەڼی هرووژم مکەرۆ سەرش.

 ئا دووە نامە جە ئەساسەنە قسۍ جەمۍ جە ژەنا کۆششکاری بێنۍ بە گرڎوو جیاوازییە نەتەوەیی و ئاینییەکاشاوە. ئا نامۍ بیۍ بە دەنگو ژەنێوە کە ئەرەکۊشای مکەرۆ و ڕوانە ڕووبەڕوو مەترسی مبۆوە. جە نامەکانە پەرسوو چارەسەری پەی کۆو گرفتەکا باسکریان، فرە عال ڕاو چارەسەری ئازاڎیی موینمۍ، باس چانەی کریان کە سنوورەکۍ نمەتاوا بانۍ بە مەڵامەتوو بێدەنگ بیەی ژەنا، سنوورەکۍ نمەتاوا بانۍ بە ۋەربەس ۋەردەم و ئا گەلانە کە چەوەسیێنۍ.

 دماو وەڵابیەیۆ ئی ناما هەڵوێسی فرە ڕادیکاڵما دی بەتایبەت جە زیڼانەنە بە سەرمەشقایەتی جەمێوە جە ژەنا، پاڵپەشتیێوە فرە جە کەیسوو پەخشان عەزیزیۍ و وەریشە مورادیێنە کریا. ئینۍ گرڎ ئانەما نیشانە مڎا کە دەنگوو ئازاڎیوازی ژەنا یۆن و ئەرەکۊشای هامبەش ڕاوەبەر مکەرا. ئا سیاسەتو ئەشکەنجەی کە دەسەڵات جە زیڼانەنە ڕاوەبەرش مکەرۆ ئیتر داڎش نمەڎۆ. زیڼان بیەن بە شۊنێوە کە دەنگوو ئازاڎیش چنە بەرز بۆوە وە گرڎوو گلێرگەیچ بەشدارو ئا پرۆسەیە بیەن. وەختۍ ماچوو شۆڕشوو "ژەنۍ، ژیۋای، ئازاڎیی" سەرکووت نەکریان و بەردەواما ئانەنە کە سەرمەشقەکۍ ئا شۆڕشەیە هەڵای زیڼانەنە ئەرەکۊشای مکەرا. کەسایەتیێوە پېسە زەینەب جەلالیانۍ جە ئاستو دنیێنە دەنگش دانۆ ۋەروو ۋێڕاگریش. جە زیڼانی ئێڤینینە دماو وەڵابیەیۆ نامەکا مانگێرتەی ئینا فراوانبیەینە."

جە دما دمایی قسەکاشەنە ڕۆزەرین کەمانگەرە ئاماژەس پانەیە کەرد کە شۆنەو وەڵابیەیۆ نامەکارە جە ۋەرنیشت و سەرنیشتەنە پاڵپەشتیێوە فرە ئاماو واتش: "کەسانێوی پېسە پەخشان عەزیزیۍ، وەریشە مورادیۍ و شەریفە موحمەدیۍ کە ئەرەکۊشای پەی ئازاڎیی و مرۆڤبیەی مکەرا بێگومان پاڵپەشتیشا پەی مۍ. بەڵام ئەرکی سەرەکیما ئانەنە کە دمایی بە سیاسەتی دژە مرۆڤانەی بارمێنە و بیمۍ بە سەڎاو پەخشان عەزیزیۍ و وەریشە مورادیۍ و جەمۍ جە کەسا ئازاڎیوازی جە زیڼانەنە.

پەنەوازا کار و خەبات ۋەرفراوان بکەرمۍ، کەمپینی فرە کریان پەی زیڼانیا سیاسی ئەگەر ئیمزا کۆمکریۆوە با بەشدارۍ بیمۍ و ئەگەر چالاکی مکریۆ با جاڎەکا پەڕۍ بکەرمۍ جە دەنگی، بە هەرجۆرۍ مکریۆ ڕۆژەڤ  سازبکەرمۍ پەی ئانەی بیمۍ بە دەنگوو ئی ژەنە کۊششکارا. پېسە ژەنا نیشانەما دا کە خاوەنوو چ هێز و ئیراڎێوەنمۍ، شۆڕشوو "ژەنۍ، ژیۋای، ئازاڎیی" ئی حەقەتینەشە سەلەمنا."