ئێران مووشه‌كی چێرده‌ریاییش تاقی كەرده‌ۋە

ئێران ئاشکراش کەرد: جە بەردەۋامی گەشەدای بە توانا جەنگیێ و سەربازیەکانشەنە مووشه‌كێۋی چێرده‌ریاییش تاقی كەردەنەۋە.

جەی بارەوە ئاژانسە هەۋاڵیە فەرمیەکێ ئێرانی ۋەڵاۋشان کەردەنەۋە: "جە تاقی-کەردێۋی سەرکەوتەنە، هێزە سەربازیەکێ ئێرانی جە تەنگەو هورمزی دلێ کەنداو فارسییەنە، مووشەکێۋی چێردەریایی دوورشان-شان تاقی کەردەنەۋە". 

بانگەشە کران، موشەکەکە جە چێردەریایی غەدیری ڕووبە ئۆقیانوسی هندی تەقنیان و ئامانجی دیاری کریاش پێکان.
تاقیکەردەی مووشەکە چێردەریایەکەی، جە چوارچێۋەو گەشەدایەن بە توانا جەنگیێ و سەربازیەکێ سپا و ئەرتەشو ئێرانی. ئانێچە دەوڵەتە هەرێمیەکێ بە تایبەتی ئیسرائیل و عەرەبستانی سعودی و زلهێزە جیهانیەکێش بە تایبەتی تەر ئەمەریکاو ئەورووپاش نیگەرانێ کەردێنێ. 

دەوڵەت و زلهێزەکێ فرە جارێ داۋاشان جە ئێرانی کەردەن، تا کۆتایی بە تاقیکەردەی مووشەکە دوورشانەکێ و چەک و چۆڵەی ئەتۆمی باۋەرۆنە و ئێرانشان ڕووبەڕوو گەمارۆی سەختی کەردەنەۋە. بەڵام سەرەڕاو ئانەیە ئێران سورەن جە تاقیکەردەی مووشەکی و گەشەدای بە توانا سەربازیێ و جەنگییەکانو وێش و دەستبەردارشان نمەبۆنە.