جەی ماۋەی دمایەنە هەم جە وەرنیشت و هەم جە وەرهۆزو هەورامانی، پڕۆسێسو چاپ و ۋەڵاکەردەی کتێبێ بە زۋانی هەورامی پەرەشان سەندەن و کەم هەفتە و مانگ هەن گۆشدارێ چاپ و ۋەڵابییەی کتێبێ نەبێمێنە و ئانێچە بێگومان هەم یاگێ شادمانییەن و هەم کتێبخانەو هەورامانیش پنە دەوڵەمەند و زەنگین مەکریۆنە. جە بەردەۋامی پڕۆسێسەکەیەنە، زایەڵە کە دەستگایێ چاپ و پەخشکەردەیەن ئاشکراش کەردەن: " دەستگەکەشان بەزوویی کتێبێ بەنامێ”گوژمانە”ی چاپ و ۋەڵا مەکەرۆنەۋە و کتێبخانەی هەورامیش پنە دەوڵەمەند مەکریۆنە".

جەی بارەۋە پاۋە پرێس زانیار زیاترش دان و  ۋەڵاشکەردەنەۋە: "گوژمانە” کتێبێ ئەدەبین جە نۋیستەی (ڕەئووف مەحموود پووری)ـەن و دەستگەو زایەڵەی چاپ و ۋەڵاش مەکەرۆنەۋە. جە "گوژمانە”نە کە ۱۷۰ لاپەلێن، مەحموود پوور هۆرسەنگنای و ئەۋەوانای و شەی-کەردەی پەی شێعرێ هەورامیێ بەشێۋازێ زانستیانە مەکەرۆنە و بە گردی یەرێ بەشێ جەوێ مەگێرۆنە. 
بەشی یەکەم: باس جە یەکەم بەیانیەو شێعرەی نۊی هەورامیێ مەکەرۆنە.
بەشی دووەم: باسێۋەن سەروو تئوری شێعرێ بە ۋەرچەمگێرتەی تایبەیە فەرهەنگیە بوومیەکانو هەورامانی و بە سوودبەردەی جە ڕەوتی ڕوو بە گەشەو ئەدەبیاتی مرۆیی(ئانزانی).
بەشی یەرەم: ئەۋەوانایەن سەبارەت بە دەقە شێعریەکان بەتایبەتی پەی شعرێ نۊی هەورامی.

”گوژمانە” بەرهەمو چنڎین ساڵێ جە مانیای و زەحمەتین و نۋیسەرەکەش ئامانجشەن تا بە شێۋازێ سەردەمیانە گوژمی و گەشەی زیاتەر بە ڕەوتی ئەدەبی و زۋانی هەورامی بڎریۆنە.