ئەگەر خەڵکوو هۆرامانی پەی رزگاربییەی جە چەڵەمەکا ئابووری دۆڵەتی، ڕووە جە ئابووری کۆمەڵگەی بکەرۆوە ، هەم وێشا جە سەر ئێشەکا سیستمی ڕزگار بکەرا، هەم بە پەشتگێرتەو بەرهەموو لادەگایەکا، هەر پاسە بەرهەمەکا تەروو هەرێمەکەی مەتاوانە خاڵەوو زەفەربەردەو دۆڵەتی پەی سەروو کۆمەڵگەی لاواز بکەرا . 
جە وەختێ پسۆ ئارۆینە، یاگێ وێشەنە کە خەلکوو هۆرامانی وێر جە ئابوورییە بکەراوە کە ڕەنگدای فەرھەنگی کۆنشا بۆ، کە بنەرەتەکەش، هەرەوەزی، سۆز و سەربەوێ بۆنە. هەروەوەزی بە واتاو ئانەی کە دەگاو و شار پەردێ پێ گێڵای ئابووری جە ڕاو خزمەت و کالڵن ڕێکوزا .

هەرەوەزی ئابووری:

 مزاندێ ئەگەر هەر کارمەندێ بەرهەمەکا شۆتەمەنی و سۆزە و چەرەساتوو وێش جە دەگاکا تەمین بکەرۆ، ئابووری هەرێمەکەی جە ڕاو وەشکەردەو کاری بەرز بۆوە. هەر پاسە خەڵکی پەی بەدەس وستەو ئابورییە، کە رەنجوو ئینسانەکا دلێشەنە نەقشی بنەرەتیش هەن، فرەتەر جە ڕاسی کۆمەڵگەی نزیک بۆوە و لەزەت جە ژیوای بەرۆنە.

ئابووری سۆز:

بەشێ تایبەت کە سەرەراو ئانەی کە ئامانجوو کۆمەڵگەی جە بەشوو ئابورینە دابین کەرۆ ، کۆمەڵگەی جە نەوەشیەکا مۆدرنیتەی سەرمەداری پارێزنۆ . ئابوری سۆز ئا ئابووریەنە کە سەرەراو پالپەشتی ژیوگێوە سۆزی ، هەر هەنگامێ کە بە ئامانجوو ئابووری هۆرگریۆ و زەرەر جە ژیوگەی دۆ , مدریۆ . یۆ چا خالا کە ئابۆری دۆلەتی دائی سەرشۆ ئیسرار کەرۆ ، تێکداو ژیوگەیا پێ دەس وستەو قازانجی . بە جۆرێ دەسدرێژیا سەروو ژیوگەی . هۆرامان بە بۆنەو تایبەتمەندیە سرووشتیەکاش ، زەرفیەتوو ئانەیش هەن کە جە بەشوو ئابووری سۆزینە ، قەیرانەکا سیستمی جە رۆحوو کۆمەڵگەی دوو وزۆوە . یۆ جە قەیرانەکا سیستموو دۆلەتی بە کار بەردەو جۆراوجۆروو مادە شیمیائیەکان جە بەشوو باغ و باغاتی و هەر پاسە وەی کەردەو حەیوانە گۆشتیەکا ، یا فرە بەرهەمێ کە بە مەوادی شیمیایی وەش کریا و بێیەنێ بە سەرچەمەو فرەو نەوەشیەکا بە ئامانجوو گەرم کەردەو بازاروو دەواو دەرمانی . 

ئابوری سەر بەوێ :

بەداخەوە ئارۆ فرەو کۆمڵگەیەکا تێکێ شێیەنێ ، راسی وێشا ویرشییەنۆ . بە جۆرێ بە بۆنەو سیستموو مەسرەفی بازاری ، تواناکا وێشا پێ دەس وستەو داواکاریەکا روانەیش وستێنێ دەسوو دۆڵەتی . جە دەگێوەنە کە وەلتەر بە شێوە فرە ئینسانی خەلکی ژیواو وێش بەردەن راوە ، ئارۆ فەرهەنگوو مەسرەفگەرایی پاسەش کەردەن ، کە خەلکی ماس و دۆ وێش جە شارەنە مسانۆ . سۆزەو وێش جە مارکێتەکانە ، بە جۆۆرێ سەرمایەداری و سیستمی دۆلەتی مەژگش داگیر کەردەن . گەر هەر هۆرامییە ، تاوۆ زەروو وێش جە چەرخەو ژیواو کەسێ تەروو هۆرامینە خەرج کەرۆ ، یا هەر هۆرامییە تاوۆ هەرمانە پێ هام وەڵاتییە وێش رێکوزۆ ، یا هەر هۆرامییە تاوۆ وێش جە زهنیەتوو ئابووری دۆڵەتی کە پەرا جە نەوەشییە رۆحی وجەستەئییە ، رزگار کەرۆ ، جە ماوێوە کەمەنە فرەوە گرفتەکا کە روانە جە سیتموو شارنشینی ، کە ئابووریش کەردەن بە هەدەفەو و ژیواوی و نرخوو ئینسانەکاش کەردەن کە کەرەسەو قازانجی رزگارش بۆ . 

جە ڕووێ پسۆ ئارۆینە کە دۆڵەتوو ئێرانی دوچاروو چەڵەمە ئابووریەکا بیەن ، خاستەرین وەختا پێ خەلکوو هۆرامانی کە بە گێڵایۆ پێ ئەسلوو وێشا و ڕاوەبەری کۆمەڵگەی ، پێ هەمیشەی جە سیستموو زاڵوو دۆڵەتی و سەرمایەداری وێشا رزگار کەرا . وەختشا کە قازانج و سەرمایە جە خزمەتو ژیوای و ئینسانییەتینە بۆ ، نە ئانە ئینسانییەت و ژیوای کریا بە کەرەسەو قازانجی و سەرمایەی.