جە ئامەد هەزاران کەسێ بە دروشمو ”لەیلا گۋڤەنە شکۆمانە“ ڕاپیماییشان کەرد و جە مێڎانو ستاسیۆنی کۆبیێۋە. جەماۋەر داۋاشان کەرد، ژیۋای لەیلا گۋڤەنێ پارێزیۆنە کە ۷۳ ڕۋێن دژ بە گۆشەگیری ئیمرالی مانش جە ۋاردەی گێرتەن.
دمابەدمای بانگەۋازی هەدەپە و کەجەدەی پەی پەشتیۋانی-کەردەی جە لەیلا گۋڤەنێ هامسەرۆکەو کۆنگرەو گلێرگەی دیموکراتیکی(کەجەدە) ، کە پەی کۆتایی ئاۋردەی بە گۆشەگیریێ کە سەپیان سەرو ڕێبەر ئۆجالان-یەرە ۷۳ ڕۋێن مانش جە واردەی گێرتەن و جە ئیسەنە ئیتر ژیۋایش کەوتەن مەتەرسی جددی، ئارۆ سەر سەبای جە شارو ئامەدی هەزاران کەسێ ڕاشان پیما.
ڕاپیمەرێ بە دروشمێ چوون "دیموکراسی، ئازادی و دادپەروەری"، ”لەیلا گۋڤەنە شکۆمانە“، جە چنڎین قۆڵێۋە تا مێڎانو ستاسیۆنی ڕاشان پیما. هەر چنڎ پۆلیس و هێزە ئەمنیەکێ تورکیا ئاستەنگیشان دروستکەرد و گەمارۆو جەماوەریشان دا، بەڵام سودش نەبێ و بەشداربیەکێ زیاتەر سورێ بێنێ جە ئەنجامدای چالاکییەکەیشان.
جە ڕاپیمایی و کۆبیەکەنە پۆستەرێ و لافیتێ بەرزێ کریێۋە، کە سەرشانەۋە نۋیسیابێ، "گفتوگۆ تاکە ڕانە پەی ئاشتی و چارەسەری"، "لەیلا گیوڤەنە مافدارەنە"، "نمەبۆنە حساب پەی ئیرادەو گەلی نەکریۆنە"، "بە دڵنیایی جە ۋەراۋەرو جەنگی و باری نا ئاسایی ئاشتی سەربگنۆنە"، "دادپەروەری و ئاشتیی پەی گردی". بەشدربییەکێ ئاڵاکێ هەدەپەی و بەدەپە-یشان بەرزێ کەردێبێنێ و پەیتا پەیتا دروشمەکێ، "بێ سەرۆک ژیۋای نمەبۆ"، "زیندانیێ ئازادی شکۆ و کەرامەتمانێ"، ”لەیلا گۋڤەنە شکۆمانە“ ۋاتێۋە.
جەماۋەر بە یەک دەنگ و ڕەنگ داۋاشان کەرد، ژیۋای لەیلا گۋڤەنێ پارێزیۆنە، کە ۷۳ ڕۋێن دژ بە گۆشەگیری ئیمرالی مانش جە ۋاردەی گێرتەن و کۆتایی بە گۆشەگیری ئیمرالی باۋریۆنە و دایوئەسای سیاسیی پەی چارەسەری و ئاشتی دەست پنە بکەراۋە و ڕێز جە ئیرادە و دۋاکاری مانگێرانی و گەلی بگێریۆنە.
جە چالاکییە جەماۋەریەکەنە چنڎین کەسایەتیێ قسێشان کەردێ چانیشان: پەرین بوڵدان هامسەرۆکەو هەدەپەی و بەردان ئۆزتورک هامسەرۆکو کەجەدەی و محەمەد ئاسلان هامسەرۆکو دەبەپەی و جە قسەکانشانە جەختشان جە پەشتیۋانیکەردەی جە لەیلا گۋڤەنێ و سەرجەم مانگێرەکان و کۆتایی ئاۋردەی بە گۆشەگیری ئیمرالی کەردەۋە.
