جە ئێران کەم ئاۋی ۲۰ ملیۆن کەسێ کۆچبەرێ مەکەرۆنە

جە پانیشتو ئێرانی وشکەساڵی و ئیدارەی خراپ جە بەکاربەردەی ئاۋێ-نە هەڕەشێ جە ۲۰ ملیۆن کەسان مەکەرۆنە و ئەگەر هەن کۆچبەرێ ببانە.

جە ئێران سەرەڕاو ئانەیە کە ئێساڵ  ۋاران و ۋەرۋە فرێ ۋارێنێ، بەڵام بە هۆکارو خراب ئیدارەدای ئاۋێ و نەبییەی پلانێ پەی گلدای و خاس بەکاربەردەی ئاۋێ، دیسان باس جە وشکەساڵی و کەم ئاۋی و کۆچبەری ملیۆنان کەسی بە تایبەتی جە پانیشتو وڵاتی مەکریۆنە.

عەلی ئەسەدی نمایندەو خەڵکى شارو بابەک-ی سەر بە پارێزگەو کرمانی جە پەرلەمانو ئێرانی جەی بارەوە هۆشداریش دان و ئاشکراش کەردەن: "پانیشتو ئێرانی ڕووبەوو قەیرانو ئاۋێ و کەمی ئاۋێ بییەن و ئەگەر قەیرانەکە بەردەۋام ببۆنە و چارەسەر نەکریۆنە، ۲۰ ملیۆن کەسێ بە ناچاری کۆچبەرێ ببانە، کە ئانێچە کێشێ و قەیرانێ تەرێ کۆمەڵایەتیێش ۋنە بگناۋە.

ئەسەدی ڕەخنەش جە شێوازو ئیدارەدای ئاۋێ گێرتەن و ۋاتەنش: "ئاۋی جە پارێزگەو کرمانی جە ڕاو بیرێ دابینە مەکریۆنە، بەڵام فرەتەرین ئاۋی پاکە جە پارێزگەکەنە پەی کارگەو مسی و کارگەکێ تەرێنە بەکارە مەبریۆنە. ئانێچە هۆکارەن پەی کەم ئاۋی و هەدەردای ئاۋێ بە گردیی و ئاۋو واردەی بە تایبەتی".