«مەم و زین» یان «مەمی ئالان»، کە داستانێ تراژیدی وەشەویسین و سینە بەسینەی یاۋان تا ئارۆ و زیاتر  پێسە بەرهەمێۋی ئەدەبی شاعرو گەورەو کوردی (ئەحمەدی خانی) ئەشناسیان. داستانەکێ کە شاکارێ ناوازەی شعریەنە، جە ئەحمەدی خانی کە بە کرمانجی نۋستەنش تا ئیسە بە چنڎین زۋانێ زینڎێ جیهانی هۆرگڵنایش پەی کریان. بەڵام جە ئیسەنە بەرکەوتەن مەم زین یان مەمی ئالان شاکارە داستانێ بیێنێ کە جە هەورامان و لوڕستان و کوردستانەنە باۋە و ۋەڵا بیێنێ و سەرەڕاو دەقە کرمانجیەکەی چنڎین دەقێ مەموزینی بە (هەورامی-گۆرانی) بینێ و جە دمایەنە مەموزینەکە بە هەورامی جەلاو نامق هەورامی ۋەڵاکریابێۋە و چنڎ نوسێخێ خەتییێ مەم و زینی هەورامی کە مێژووەکەش دیار نییەن، جەلاو مامۆستا کەیومەرس نیک ڕەفتاری جە کەنەدا هەنێ. ئینە ڕۆو شەممەی جە شارو کۆڵن-و ئەڵمانیای، مەم و زین جەلاو نویسەر و شاعرو هەورامانی (سدیق بابایی)، کە نوسخەو (میزایی لوڕستانی ۱۲٦٦ی کۆچی مانگی نۋیستەنش) هۆرگێڵنان پەی زۋانی ئارۆی هەورامی و چاپ و ۋەڵاش کەردەۋە. پەی ئا مەبەستەی مەڕاسیمێ پەی ئەژناسای پەڕتوکەکەی ڕێکۋزیا و ژمارێۋ جە هۆگرانو زۋان و ئەدەبیاتی هەورامی و کوردی بەشدارێش بیێ.

جە مەڕاسیمەکەنە، بابایی ئاماژەش بە گرنگی داستانەو مەم و زینی و هۆرگڵناییش پەی زۋانی ئارۆی هەورامی دان و واتەنش: نوسخەکەو میرزایی لوڕستانیش جە یانەو کتێبی ئەڵمانی دەستکەوتەن و باسش جە گرنگی و دێرینی زۋانی هەورامی و ئەدەبیاتەکەیش و کەسایەتیێ و ئاسەۋارێ فرێ هەورامانی و گرنگی و پیرۆزی ژمارە ۹۹یش کەردەن و جە پەراۋێزو مەم و زین یەنەکەیە ۋەڵێش کەردێنێ. ئینەو ئامادەبییەکێ مەراسیمەکەی ستاییش و سپاسگوزاری وێشان ئاڕاستەو ماموستا سدیق بابایی کەرد و ڕێزشان بە مانیابییەش و ئەرکێشایش نیان.