جە دهۆک ژمارێۋ ئەندامێ سەر بە (نەوەی نوێ)ی دژ بە ئازادنەکەردەی ئازادیۋازە دەستگیرکریێکێ بادینانی چالاکیشان ئەنجامدا و چنڎین ئەندامێشان چنڎ سەعاتێ دەستگیرێ کریێ و دمایی چنڎ سەعاتان ئازادێ کریێۋە.
ئارۆ ٤ شەممە، جە شارو دهۆکی، ژمارێۋ ئەندامێ سەر بە (نەوەی نوێ)ی دژ بە ئازادنەکەردەی ئازادیۋازە دەستگیرکریێکێ بادینانی چالاکیشان ئەنجامدا. بەڵام جەلاو هێزە ئەمنیەکێ سەر بە پەدەکەی پەلامار دریێ و چالاکییەکەشان ئاستەنگ کریا. هێزە ئەمنیەکێ پەدەکەی ٦ ئەندامێ (نەوەی نوێ)شان دەستگیرێ کەردێ و بەڵام دمایی چنڎین سەعاتێ جە زیندانیکەردەی ئازادێ کریێۋە.
جە ۲٦و کانوون-و دووەم-و ۲۰۱۹ی، جە شیلادزێ و سیرێ و دەوروبەرشان، گەل یەک پارچە دژ بە داگیرکاری ڕژێمو تورکیای سەرهۆردایشان کەرد و بنە و بارەگە سەربازیەکێ تورکیاشان سوچنێ و سەربازە داگیرکەرەکێشان شاربەدەرێ کەردێ. هەر پاسە ۲ ڕۋێ دمای ئانەیە، جە دهۆک پەی پەشتیۋانی جە سەرهۆرداکەی، بانگەۋازی پەی پەنجامدای کۆبییەی جەماوەری کریابێ، بەڵام ۋەر جە ئەنجامدای کۆبیەکەی، هێزە ئەمنیەکێ پەدەکەی ئاستەنگیشان دروست کەردەبێ و ڕەشبگیرشان ئەنجام دابێ. دەرنجام جە ڕەشبگیریەکانو شیلادزێ و دهۆکی-یەنە نزیک بە ۱۰۰ کەسێ دەستگیرێ کریێ-بێنێ. دمای ئانەیە کە دژ بە ڕەشبگیری و دەستگیرکەردەکەی ناڕەزایەتی فرە نیشانە دریا، فرێۋ جە دەستگیرکریاکان بە کەفالەت ئازادێ کریێ، بەڵام تا ئیسە ۱٦ جە دەستگیرکریاکان ئازادێ نەکریێنێ و چارەنۋیسشان نادیارە.
بە پاو دمایین زانیاری کە جە بادینان-ـەوە، بە ئاژانسەکەیمان فوڕات نیوز(ANF)ی دریان، ۳ جە دەستگیرکریاکان جە زیندانەکێ دهۆکی و ۱۳یچشان جە زیندان-و سیرکای زیندانیێ کریێنێ.
