دمای ئانەیە کە هەفتەی ۋیەردە هێزو پارێزنای جەوهەری پانیشتو کوردستانی ئەرەمەرزنای وێش ئاشکرا کەرد، جە ئیسەنە پەی ڕووبەڕووبییەی ئەرەگێرتەیی تورکیای و خایەنەتی دلێوێیی، جە هەرێمو برادۆستی بە مەڕاسیمۋی لەشکری کەتیبێۋی لەشکریش مەرزنارە.
جە مەڕاسیمەکەنە ئاشکرا کریا، "جەنگاۋەرەکێ کەتیبەکەی لامێ (گەنجێ) هەرێمەکەیەنە و ئامانجشان پارێزنای هەرێمەکەیشانە جە ئەرەگێرتەیی تورکیای و مدرایەۋەن دژ بە دوژمنی".

"ئامانج پارێزنای هەرێمەکەیشانە جە ئەرەگێرتەیی تورکیای"

یۆ جە جەنگاۋەرەکێ کەتیبەو برادۆستی سەر بە هێزو پارێزنای جەوهەری پانیشتو کوردستانی بە ئاژانسەکەیمان (ANF)یش ۋات: "ئێمە لامێ برادۆستی و بادینانی جە چۋارچێۋەو پارێزنای جەوهەری-یەنە وێمان ڕێکۋستەن تا خاک و ئەرەنیشتێ هەرێمەکەیمان جە هێرشێ و ئەرەگێرتەیی تورکیای پارێزنمێنە. ۋازیارێنمێ جە گەل، هۆزێ و عەشیرەتێ، لایەنەکێ، لامێ (گەنجێ)، نۋیسەرێ، ڕۆشنۋیرێ و کەسایەتیێ برادۆستی تا هامکارێمان ببانە و شان بە شانەمان دژ بە ئەرەگێرتەیی تورکیای بمدرانێۋە و ڕا نەڎانە خاک و ئاۋیشان بگنۆنە چێردەستو دوژمنی، چونکە بە درێژایی تاریخی برادۆستیەکێ سەرەشان پەی دوژمنی و ئەرەگێرتەیی نەنامنانەرە".

"سیخوڕەکێ تورکیای سزا مەڎێمێنە"

جەنگاۋەرە لامە برادۆستیەکە ۋاتیچش: "جە هەرێمەکەمانە کەسانێ هەنێ کە هامکارێ و بەکرێگیرێ و سیخوڕێ دوژمن-یەنێ، ئاگادارێ و ورێشان شان مەکەرێمۋە تا دەستبەردارێ هامکاریکەردەی دوژمنی و خیانەتی ببانە و  بگێڵانێۋە پەی خەتێ نەتەوەیێ و نیشتمانیێ، ئەگینا بە قورسی سزاشان مڎێمنە".

"با کناچێ و کوڕێ پەیوەستێ کەتیبەکەیمان ببانە"

جەنگاۋەرە لامە برادۆستیەکە ۋازیارەن، "کناچێ و کوڕێ برادۆستی و کوردستانی وارینی و پەیوەستێ کەتیبەو برادۆستی بە تایبەتی و هێزو پارێزنای جەوهەری پانیشتو کوردستانی بەگردیی ببانە و کوردستانی جە ئەرەگێرەیی پارێزنانە و ڕا نەڎانە دوژمن و خائینێ دلێوێیی بە مەرام بیاۋانە".

"کار پەی ئارامیی کوردستانی وارینی مەکەرمێنە"

جەنگاۋەرەکەو برادۆستی ماچۆنە: "بە پێچەۋانەو بانگەشەکەردەی بەشێ جە میدیاکان کە بێشەرمانە ئامانجەکەیمان لاڕارە مەبەرانە و مەشێونانەش، جەخت مەکەرمێنەۋە؛ ئێمە بە بەخشای هون و جەستە و گیانمان کار پەی  بەرقەراری ئاساییش و ئارامیی کوردستانی وارینی و پارێزانی گەل و خاکەکەیش مەکەرمێنە. پۆکەی داۋاکارێنمێ جە گرد کەس و لایێ بە تایبەتی برا پێشمەرگەکۍ تا بە ڕۆحیەتو ٤۰ ساڵێ جەی ۋەڵتەری گۆڕ بە کۆشایی ئازادی بڎانە و پێۋەرە گەل و وڵاتی جە دوژمنی و ئەرەگێرتەیی بپارێزنمێنە".

جە دامایەنە جەنگاۋەرەکەو برادۆستیەکەو کەتیبەو پارێزنای جەوهەری ۋاتەنیچش: "با هیچ کەس و لایێ و پارت و لایەنێۋ بە پاو فکر و پەیلۋای وێش هۆرسەنگنای هەڵە پەی ئێمە و کۆشایشی  ئازادیمان نەکەرۆنە، چونکە ئێمە کوڕێ و کناچێ و ڕۆڵێ ئەی گەل و خاک-یەنمێ و بەدڵنیایی بە ئیرادەو گەلی و بە مدرامانمان دوژمنی ئەرەگێرەری شکست بڎێمێنە".

یاگێ بەیادئاۋردەیەن ٥ شەممەی ۋیەردە، جە ڤییەرێ گرنگەنە جە کەشە سەرکەشەکێ کوردستانی (هێزو پارێزنای جەوهەریی پانیشتو کوردستانی) بە بەیاننامێ ئەرەمەرزنایش ئاشکرا کریا بێ و  پا ئامانجە جە پانتایی کوردستانی وارین-یەنە دژ بە ئەرەگێرتەیی، عەرەبکەردەی، تاڵانکەردەی، کوشتەی و ئەڕفانای هاموڵاتیان و سۆچنای خەلە و خەرمانیبە تایبەتی جە ناوچە ئەرەبڕیێکێ کوردستانی بمدرۆنەۋە.