دما بەدمای ئانەیە جە چنڎ ڕۋێ ۋیەردێنە ئاکۆ مارانی نۋیسەر و چالاکۋان جە ئەنتەرنێت و ئایتی و زۋانەۋانی هۆرگێنای هۆرامیش تێلەگرامی کەرد و بەفەرمی کیاستش پە ڕاۋەبەرانو تێلەگرامێ تا زۋانی هۆرامی پەی تۆڕە کۆمەڵایەتیەکێشان زیاد بکەرانە، دەرنجام ڕاوەبەرێ تۆڕە کۆمەڵایەتیەکێ داۋاکاریەکە مارانیش قبوۆ کەرد و  زۋانی هۆرامی جە "تێلەگرام" بە فەرمی نریارە.

جەی بارەۋە ئاکۆ مارانی بە ئاژانسەکەیمان فوڕات نیوزیش ۋات: " هەر ئیسە متاۋی زۋانو تێلەگرامو ئایفۆنەکەیت، هەر پاسە جە ( ویندوز ) و ( لینووکس ) زۋانو تێلەگرامەکەو وېت فاڕی بە (زۋانی هۆرامی) و تۊیچ پېسەو گرڎ کەسی متاۋی بەرنامەو تێلەگرامی بە زۋانی ئەڎایی وېت (زۋانی هۆرامی) بەکاربەری".

مارانی ئی زانیاریێشە سەبارەت شێۋازوبەکاربەردەی تێلەگرامی هۆرامی ۋستێ ڕووە:

١- پەی فاڕای زۋانو تێلەگرامەکەیت سەرو ئەندرۆید مۆبایل-فۆنیۆ ( ئا مۆبایلۍ کە سیستەمو هەرمانەکەرڎەیشا 'ئەندرۆید'ا، پېسە سامسوونگ گەلەکسی یان گرڎو سمارت-فۆنەکۍ تەرۍ ) ، سەرو ئی لینکەیە کلیککەرە و وۍ_بەوۍ زۋانو تێلەگرامەکەیت فاریۊ بە هۆرامی.                                                             https://t.me/setlanguage/horami

٢- پەی فاڕای زۋانو تێلەگرامی چە (ئایفۆن)ەنە، بەرنامەو تێلەگرامی کەرۆ، لۋە بەشۊ ڕېکۋستەی (settings)، سەرو زۋانی کلیککەرە و ( horami ) هۊرۋچنە.

٣- پەی فاڕای زۋانو تێلەگرامی چە (کۆمپیوتەر)ەنە، ئەر سیستەمەکەش ( مایکرۆسۆف ویندۆز ) یان ( لینووکس) بۊ، بەرنامەو تێلەگرامەکەو وېت چە (کۆمپیوتەر/ لێپتۆپ)ەنە کەرۆ،  ئینجا ئی لینکەیە کلیککەرە
https://t.me/setlanguage/horami
 ئاکۆ مارانی داۋاش کەرد: "پێسەو پشتېۋانی و جیاتی کۊمەکی و دەسوەشانەی، ئی پەیامەیە پەی گرڎو پەیۋەندییە تێلەفۆنییەکاو وېت بکیانە، چە شار و  دەگاو وېتەنە ئی هەۋاڵەیە ۋەڵاکەرۆ،  چە تۊڕە کۊمەڵایەتییەکا ( فەیسبووک ) ، (تێلەگرام) ، (تویتەر) ، (ئێنستاگرام) و چە مەسینجەرەکا (ڤایبەر) و (وۆتسئێپ) و ...تد ئی هەۋاڵەیەۋەڵاکەرۆ و پەی پەیۋەندییەکاو وېت بکیانە، بەکابەرڎەی زۋانی ئەڎایی پەی هۊرگېڵنو تێلەگرامی، خاستەرین کۊمەکو دەسوەشانەن"

جە دمایینە ئاکۆ مارانی نۋیسەر و چالاکۋان جە ئەنتەرنێت و ئایتی و زۋانەۋانی ئاشکراش کەرد:"جە ئیسەنە سەرقاڵەن پەی فاڕای فەیسبوکی بە هۆرامی و جە ئایندەی نزیکەنە فەیسبوک مەکریۆنە بە هۆرامی".