جە دهۆک دەیان ڕۆچنامەۋانێ و چالاکۋانێ دەستگیرێ کریێ
جە دهۆک هێزە ئەمنیەکێ سەر بە پارتی دەیان ڕۆچنامەۋانێ و چالاکۋانێ-شان دەستگیرێ کەردێ کە گەرەکشان بێ دژ بە داگیرکاری تورکیا چالاکی ئەنجام بڎانە.
ئارۆ جە شارو دهۆکی بڕیار بێ دژ بە داگیرکاری تورکیا و پەی پەشتیۋانی-کەردەی جە سەرهۆردای شیلادزێ چالاکی ئەنجام بڎریۆنە. بەڵام هێزە ئەمنییەکێ سەر بە پارتو دیموکراتو کوردستانی ڕاگیریشان جە چالاکییەکەی کەرد و دەیان ڕۆچنامەۋانێ و چالاکۋانێ-شان جە دهۆک و ناوچەکێ بادینانی دەستگیرێ کەردێ. سەرچەمەکێ هەواڵی جە دهۆک ئاشکراش کەردەن: "گوهدار زێباری ڕۆچنامەوان و ۲ چالاکۋانێ تەرێ ئاکرێیێ، ڕۆچنامەوان شێروان شێروانى و چالاکێ كۆمه‌ڵگه‌ی سیڤیلی تاکۆر زەردەشتى و ڕێکار ڕەشید، دلۆڤان ڕەمەزان و سەباح ئەتروشى، یوسف حسێن دەستگیرێ کریێنێ و دەیان دەستگیرکریێ تەرێچ نامەکێشان نەزانیێنێ".
عه‌لی حه‌مه‌ساڵح سه‌رۆكو فراكسیۆنو جمیەرو گۆڕانی جە په‌ڕله‌مانو هه‌رێمو كوردستانی ئاشکراش کەرد: "جە دهۆک زیاتەر جە ۲٥ کەسێ دەستگیرێ کریێنێ و ۸شان ئەندامێ گۆڕان-یەنێ و نامەکێش پی جۆرە بەردێنێ (حاجی ڕێکانی، ئایهان سه‌عید، كاوار حه‌سه‌ن عه‌لی، زێره‌ڤان ئه‌لادین ئاده‌م، ولید عه‌بدول، عوسمان حه‌مه‌د ئه‌حمه‌د، كوڤان شاهین ئاده‌م، عه‌بدولره‌حمان شكری".
ٚدمابەدمای سەرهۆردای شیلادزێ دژ بە داگیرکار تورکیا و سۆجنای سەربازەگەکێ سپا داگیرکەرەکەو تورکیا و شاربەدەرکەدەی سەربازەکانشان جە دەڤەرەکەنە، هێزە ئەمنییەکێ پارتی پەی دڵنەۋایی تورکیای، جە دووێ ڕۋێ ۋیەردێنە دەیان چالاکوانێ و ڕۆچنامەوانێ و هاموڵاتیێ بادینانی-شان دەستگیرێ کەردێنێ و هەڕەشێ دەستگیرکەردەی و سزادای جە سەرهۆردایا شیالادزێ مەکەرانە. ئاکەسێ دەستگیرێ کریێنێ تا ئیسە کەس هەواڵشان نمەزانۆنە و سەروشۆنێنێ و چارەنۋیسشان نادیارەن.
