دمابەدمای ئانەیە کە جە چەنڎ ڕووێ ۋیەردێنە ڕەجەب تەیب ئەردۆغان هەڕەشێ هێرشبەردەیش پەی سەرو ڕۆژاڤاو کوردستانی  چەندین بارە کەردێەۋە، جە ۋەرانۋەرەنە وەزارەتو ۋەرگیری ئەمەریکای (پنتاگۆن) جە وەڵامەنە ئاشکراش کەردەبێ: "ڕا بە هێرشکەردەکەی نمەڎانە و هێزە هامپەیمانەکێشان (قەسەدە)ی مەپارێزنانە". بەڵام شەۋێ ۋیەردێ دۆناڵد ترەمپ سەرۆککۆمارو ئەمەریکای و ئەردۆغان سەرککۆمارو تورکیای پەیوەندی تەلەفۆنیشان بییەن و جە میانشەنە ڕێکێکەفتێنێ تا ئەمەریکا هێزەکانش جە سنورو ڕۆژئاڤای بکێشۆنەۋە و تورکیا بەزوویی هێرشی سەربازی وێش بە مەبەستو دروستکەردەی ناوچەی ئارامی دەست پنەبکەرۆنە. سەرو ئا بنەمایە ئارۆ سەرسەبای هێزەکێ ئەمەریکای جە سنورەکێ میانو ڕۆژاڤاو کوردستانی و تورکیای کێشیێنێۋە.

جەی بارەۋە سکرتاریەتو چاپەمەنی و یاۋنەری کۆشکێ چەرمێ ئەمەریکای ۋەڵاکریاش دان و ئاشکراش کەردەن:

 "سەرۆک ترەمپ  بە تەلەفۆن قسێش چەنی سەرۆک ئەردۆغانی کەردێنێ و ڕێکێکەفتێنێ تا تورکیا بە زوویی ئۆپەراسیۆن دژ پە سەرنیشتو سوریای دەست پنە بکەرۆنە کە پاسە وێش نەخشەش پەی کێشان و هێزەکێ ئەمەریکای بەشدارێ و پشتیۋانێ ئۆپەراسیۆنەکەی نمەبانێ و  جە دەڤەرە سنوریەکانە مەکێشیانێۋە. ئەمەریکا دمای شکستدای داعشی داۋاش جە فەڕەنسا، ئەڵمانیا و ئەورووپای کەردەبێ تا چەکدارە دەستگیرکریێکێ داعشی هۆربگێرانێۋە و ۋەرپرسیاری قبوڵ بکەرانێ، بەڵام ڕەتشان کەردەۋە و ۋەرپەرسیاریشان قبوڵ نەکەرد. ئیتر جەی دمای ئەمەریکا ئا ۋەرپەرسیارییە قبوڵ نمەکەرۆنە کە خەرجیش هەن و تورکیای ئا ئەرکەیە جە ئەستۆش مەگێرۆنە".

جەلایێ تەرەۋە ئارۆ، هێزەکی سوریای دیمۆکراتیکی - قەسەدە سەبارەت بە بابەتەکەی ۋەڵاکریاش پەی ڕای گردیی دان و دلێشەنە ئومان:

"بە ڕێککەوتەی و میانجگەری ئەمەریکای فرە نەرمیمان چەنی تورکیای ئەرمانا تا جەنگ میانمانە نەقۆمیۆنە و هێزەکێمان و چەکە قورسەکێمان جە سنور کێشتێۋە. بەڵام ئەمەریکا پابەند نەبی بە ڕێککەوتەکەی و ئارۆ سەرسەبای هێزەکێش جە سنور کێشتێۋە. جە ئیسەنە تورکیا ئامادەکاری پەی ئەرەگێرتەی سەرنیشت و وەرهۆرزو سوریای مەکەرۆنە. ئەرەگێرتەکەی کاریگەری نەرێنێش مەبۆنە سەرو جەنگیمان دژ بە داعشی و هامکات دەستکەوتەکێ و ئارامی و سەقامگیری کە جە دووێ ساڵێ ۋیەردەێنە بەدەستۋزیێنێ جەبارمەبەرۆنە. ئێمە بەبێ یەک سات دوودڵی دژ بە هێرشە ئەرەگێرەکەو تورکیای تا دمایی مدرامان مەکرمێنە و وازیارێنمێ جە سەرجەم پێکئاماکان کورد، عەرەب، سریان و ئاسوری پەشتیۋانێمان ببانێ و دژ بە ئەرەگێرتەکەی بمدرانێۋە".