ئارۆ ۱ شەممە، جە عەفرین جە ۱مین ساڵیادو داگیرکەردەیشەنە  زنجێرێ تەقینەۋێ گەورێ ڕووەشان دێنێ.
سەرچەمەکێ هەۋاڵی جە عەفرین ئاشکراشان کەردەن: "تەقینەۋەکێ جە مێڎانو کاوەی ئاسەنگەری، مێڎانو وەتەنی و پردەو میانو عەفرینی و عەفرینی نوی ڕووەشان دێنێ و جە ئاکامشانە ژمارێۋی فرێ چەتێ تورکیای کوشیێ و بریندارێ بیێ".

ساڵێ جەی وەڵتەر جە ۲۰۱۸/۰۱/۲۰ یەنە، هێزە داگیرکەرەکێ تورکیا بە بەشداری دەیان هەزار سەربازێ و چەتێ داعشی، نوسرەی و ئەلقاعدەی و بە نام سپاو ئازادو سوریای و بە پەشتیوانی دەیان باڵەپڕێ و هەلیکۆپتەرێ جەنگیێ و تانک و تۆپی فرێ پەلامارەو عەفرینیش دا. پەلامارەکێ ڕووبەروو مدرامانی قارەمانەو شەڕڤانان و خەڵکو عەفرینی بییەۋە و ٥۸ ڕووێ پەیاپەی گورزێ فرە قورسێ جە دوژمنی دریێ و هەزاران سەربازێ و چەتێ داگیرکەرێ کوشیێ. 

جە عەفرین هێزەکێ تورکیای و تاقمە چەتەکێش وەحشیانەتەرین تاوانێ دژە ئینسانیشان ئەنجامێ دێ و سەدان هاموڵاتیێ مەدەنیێ کە فەرەتەرشان ژەنی و زارۆڵێ بێنێ کۆمەڵکوشێ کەردێ و ژیۋگە و باغە زەیتونەکێ و شۆنەۋارێ و یاگە پیرۆزەکێ وێرانێ کریێ. هامکات سەدان هەزارێ عەفرینی بە زۆر کۆچبەرێ کریێ و عەرەبێ و تورکمانێ و بیانیێ جە سەرتاسەرو دنیای بریێ عەفرین و یانە و مولکو عەفرینیەکانشان دریا پنە. ئی تاۋانێ گرد دیارو چەمانو جیهانیانی ئەنجامێ درێ و ڕای گردی جیهانی ۋەرانۋەرشانە بێدەنگ بێ و بی بە هامبەشو تاوانەکانو تورکیای.

ئارۆچ سەرەڕاو دەربازبییەی ساڵێ سەرو داگیرکاری تورکیا-یەرە، بەڵام مدرامان بەردەۋامەن و سەرەتا هێزەکێ غەزەبو زەیتونی مەرزیێرە و ماۋێ جەی وەڵتەریچ هێزەکێ ڕزگاری عەفرینی مەرزیێرە تا عەفرینی جە داگیرکاری ڕزکار بکەرانە. بە درێژایی یەک ساڵ داگیرکاری، هێزەکێ غەزەبو زەیتونی و ڕزگاری عەفرینی سەدان چالاکیێشان دژ بە سپا داگیرکەرەکەو تورکیای و تاقمە چەتە هەمکارەکانش ئەنجامێ دێنێ و جەئاکامشانە دەیان سەربازێ و سەدان چەتێ کوشیێنێ و بریندارێ بیێنێ و ئا هێزێ بڕیارشان دان تا ڕزگارکەردەی عەفرینی درێژە بە چالاکییەکانشان بدان.