جە پاریس-ی پایتەخت، شارەکێ بانلیویا ئیڤری و توولووز-و فەڕەنسای گۆشەگیرکەردەی ڕێبەر عەبدوڵا ئۆجالانی سەرکۆنە کریا و جە ئەڵمانیا ئوزکان ئوزدەمیر مانگێرتەی بێوادەش دژو گۆشەگیریەکەی دەست پنەکەرد.
جە ئەورووپا چالاکییەکێ دژ بە گۆشەگیرکەردەی عەبدوڵا ئۆجالان ڕێبەرو گەلو کوردی بەردەۋامێنێ و جەی چوارچێۋەنە جە ۳ شارێ فەڕەنسای چالاکیێ ئەنجام دریێ.
جە شارو پاریس-ی پایتەخت و شارەکێ بانلیویا ئیڤری و توولووزی بە سەرپەرشتی کۆمەڵە کوردییەکان و بە پێشەنگێ ژەنا، ڕاپیمایی و کۆبییەی جەماوەری ئەنجامێ درێی و هەزاران کوردێ و دۆستێشان بەشدارێشان بیێ. بەشداربییەکێ سەرەڕاو سەرکۆنەکەردەوڕژێمو تورکیای و گۆشەگیری ناحقوقی جە ئیمرالی، بێدەنگی ئەورووپای و ڕای گردی جیهانیشان شەرمەزار کەرد و داۋاشان کەرد؛ بە زوترین کات کۆتایی بە گۆشەگیری باۋریۆنە و داۋاکاری مانگێرەکان کە نزیک بە ٥ مانگێن دژ بە گۆشەگیری ئیمرالی بەپێشەنگی لەیلا گوڤەنێ و ناسر یاگیزی ئینێ مدرامانەنە قبوڵ بکریۆنە. جە چالاکییەکانە ئاماژە بە شەهیدبییەی ۸ کەسان دریا کە دژو گۆشەگیریەکەی چالاکی گیانبازیشان ئەنجام دابێ و سەرنج ۋزیا سەرو تێکشیەو تەندروستی مانگێرەکان کە مەرگ هەڕەشێ جە ژیۉایشان مەکەرۆنە.
جە لایێ تەرەۋە جە ئەڵمانیا ئوزکان ئوزدەمیر کە ٥ ڕۋێ بێ بە شێۋازی نۆبەتی مانگێرتەیش جە واردەی دەست پنەکەردێ بێ، ئاشکراش کەرد، جەی دوما مانگێرتەکەیش بەشێۋازی بێوادە دژو گۆشەگیری ئیمرالی درێژە پنە مەڎۆنە.
ئۆزدەمیر ۋاتەنش: "مانگێرەکێ کە هەزاران کەسێنێ داۋاکاریەکەشان ڕەۋان و مشیۆم قبوڵ بکریۆنە. مشیۆم نەتەوە یۆگێرتەکێ، پارلەمان و یەکێتی ئەورووپای و ڕێکۋستەو سی پی تی، پاشێلکاریەکێ تورکیای بۋینانە و هەڵۋێست دژشان نیشانە بڎانە و ئا ناحقوقییە قبوڵ نەکەرانە کە جە ئیمرالی پەیڕەو مەکریۆنە و گوشار پەی تورکیای باۋەرانە تا کۆتایی بە گۆشگیری ئیمرالی باۋەرۆنە".
