جە هۆرۋچنا شارەۋانیەکەو تورکیایەنە کە ۳۱و ئاداری ۋیەرەردەی ئەنجام دریابێ، جە شارو قەرسی کاندیداتۆرو هەدەپەی ئەیهان بیلگەن سەرکەوتەیش مسۆگەر کەدەبێ، بەڵام مەهەپە تانەش جە سەرکەوتەکەی دابێ و کۆمسیۆنو هۆرۋچنای تورکیای تانەکەش قبوڵ کەردەبێ و سەرو ئانەیە جارێۋتەر دەنگەگێ ۱٦۷ سندوقان ئەژماریێۋە. دمابەدمای ئەژمارای دەنگەکێ دلێ سندوقەکان، دەنگەکێ هەدەپەی نەک کەمشان نەکەرد، بەڵکو ۱۷ دەنگێ زیادشان کەرد.

جە لایێ تەرەۋە هەدەپە جە شارو موشی و شارچەو مەلازگری تانەش جە ئەنجامو هۆرۋچنای دابێ و ئاشکراش کەردەبێ کە ۲ هەزارێ و ۹۳۲ دەنگێ هەدەپەی ئەژمارێ نەکریێنێ. سەبارەت پانەیە هەدەپە جە کۆمیسیۆنو هۆرۋچنای سکاڵاش تۆمار کەردەبێ، بەڵام کۆمسیۆنەکە تانە و سکاڵاکەش ڕەت کەردەۋە و ئامادە نەبی جارێ تەر دەنگەکێ موشی و مەلازگری ئەژمارێ بکریاۋە.

جە موش هامپەیمانی ئاکەپە و مەهەپەی سەرەڕاو فێڵێ و ساختەکاری، ١٥ هەزارێ و ٩١٩ دەنگێ و هەدەپە ١٥ هەزارێ و ٣٨١ دەنگێشان بەدەستۋستبێنێ. بەڵام ۲ هەزارێ و ٥۰۰ دەنگێ هەدەپەی  جە ۱۰۳ سندۆقێنێ سۆچنیێ بێنێ و ئەژمارێ نەکرێبێنێ. 
هەرپاسە جە مەلازگر ئاکەپە و مەهەپە تەنها بە ۳ دەنگێ ۋەڵێ هەدەپەی کەوتێبێنێ، چاگێچە ٤۳۲ دەنگێ هەدەپەی سۆنچنیێنێ. پی جۆرە هەم جە موش و هەم جە مەلازگر بە ئاشکرا کۆمسیۆن بییەن بە بەشێ جە ساختەکاری و شارەۋانیەکێش پەی کاندیداتۆرەکێ ئاکەپەی مسۆگەرێ کەردێنێ.