هیزی یەکشەممە، جە گەورە شارو ئەستەنبوڵی پەی هورۋچنای سەرۆک شارەۋانی هۆرۋچنای دووبارە کریاۋە و جە سەعات ۰۸:۰۰و سەرسەبای تا سەعات ۱۷:۰۰و سەرۋێرەگای نزیک بە ۹ ملیۆن دەنگدەرێ لۋێ سەرو سندوقەکێ دەنگدای.
جەی بارەۋە کۆمسیۆنو هۆرۋچنای تورکیای ئاشکراش کەرد: "١٠ ملیۆنێ و ٥٧٠ هەزارێ و ٣٥٤ دەنگدەرێ مافشان بییەن بەشدارێ هۆرۋچناکەی ببانە، بەڵام ٨ ملیۆنێ و ٩٢٥ هەزارێ و ٦٣ دەنگدەرێ بەشدارێ بیێنێ. دەرەنجام  ٨ ملیۆنێ و ٧٦٤ هەزارێ و ٤٦٤ دەنگێ ئەژمارێ کریێنێ و ١٧٨ هەزارێ و ٥٩٩ دەنگێچ پووچەڵێ کریێنێۋە".

کۆمسیۆنەکە دەستنیشانش کەردەن: "جە هۆرۋچنای گەورە شارەۋانی ئەستەنبوڵ-یەنە، کاندیداتۆرو (جەهەپە-CHP)ی ئەکەرەم ئیمام ئۆغڵو بە مسۆگەرکەردەی ٤ ملیۆنێ و ٧٤١ هەزارێ و ٨٦٨ دەنگێ (٥٤.٢١%) سەرکەفتەن و بەردەنشەۋە. جە ۋەرانۋەرشەنە کاندیداتۆرو (ئاکەپە-AKP)ی، بنعەلی یڵدرم بە ٣ ملیۆنێ و ٩٣٥ هەزارێ و ٤٥٣ دەنگێ (٤٤.٩٩%) ڕووبەڕوو شکستی قورسی بیەنەوە و دۆڕیان".

ئاشکرا کریان: "نەجدەت گۆکچنار کاندیداتۆرو حیزبو سعادەتی ٤٧ هەزارێ و ٨٢٩ دەنگێش بەدەست-ئاۋردێنێ و موستەفا ئیلکەر یوجەل کاندیداتۆرو حزبو وەتەن-ی، ١٤ هەزارێ و ٥٤٥ دەنگێش پنە دریێنێ".

جە لایێ تەرەۋە، سەعدی گیوڤەن سەرۆکو کۆمسیۆنو هۆرۋچنای تورکیای جە کۆنگرێۋی ڕۆچنامەۋانییەنە سەبارەت بە هۆرۋچنای گەورە شارەۋانی ئەستەنبوڵی و تانەدای جە ئەنجامەکەیش بە دەستگاکێ یاۋنەریش ۋات: "جە پرۆسێسەکەنە ٨ ملیۆنێ و ٩٢٥ هەزارێ و ٦٣ دەنگێ دەنگدەرە بەشداربیەکان پەسەندێ کریێنێ و ١٧٨ هەزارێ و ٥٩٩ دەنگێ پووچەڵێ کریێنێۋە و ڕێژەو بەشداربییەی جە هۆرۋچناکەیەنە ٨٤.٥% بییەن. لایەنە بەشدارەکێ هۆرۋچنای شارەۋانی ئەستەنبوڵی پێشان هەن تا سەعات ۱٥:۰۰و دمانیمەڕۆو ۳ شەممەی ئایندەی تانە جە ئەنجامەکەی بڎانە".