چەنڎین شەوانە ڕوێن دارستانەکێ (بوزین و مەڕەخێڵ)ی سەر بە شارو پاوە-ی جە هەورامان ئێرشان گێرتەن و سەدان هکتارێ جە دارستانەکان سۆتێنێ و ٣ ژیوگەپارێزێ کە سەرقاڵێ ئەوەکوشنانی ئێرەکەی بیێنێ گیانشان بەخشان و چەنڎینێ تەرێ بریندارێ بریێنێ.
چەنڎین شەوانە ڕوێن دارستانەکێ (بوزین و مەڕەخێڵ)ی سەر بە شارستانو پاوە-و هەورامانی جە دیمو وەرهۆرز (ڕۆژهەڵات)و کوردستانی ئێرشان گێرتەن. هەر چەنڎە هەینی ویەردەی دەسەڵاتدارێ ئێرانی جە هەرێمەکەنە بانگەشەشان کەردەبێ کە ئایرەکەشان کۆنترۆڵ کەردەن و کوشنانەوە، بەڵام سەرچەمێ هەرێمەکەی ئاشکراشان کەردەن: ئایرەکە تا بە ئیسە کۆنترۆڵ نەکریان و نەکوشیانەوە و زیانی ژیوگەیی فرە و گیانی قورسش بییەن.
سەبارەت بە زیانە گیانیەکەی هەمان سەرچەمێ ئاشکراشان کەردەن: سەروەختو ئەوەکوشنای ئێرو دارستانەکانو (بوزین و مەڕەخێڵ) یەنە ٣ ژیوگەپارێزێ هەورامانی ئەندامێ ڕێکوزیاو ژیوگەپارێزی ژیوای پاوەیەنێ.گیانشان بەخشان و چەنڎین ئەندامێ تەرێ بریندارێ بیێنێ کە شناسنامێ گیان جەدەستدایەکان بە ئی جۆرە ئاشکرێ کریێنێ:
موختار خەندانی
یاسین کەریمی
بیلال ئەمینی
جەی ئی بارەوە بەشو گردیی ئەرەیاونای ئەنجومەنو ژیوای ئاشکراش کەردەن: سەروەختو ئەوەکوشنای ئێرو دارستانەکانو (بوزین و مەڕەخێڵ) یەنە ئەندامی ئەرەمەرزنەر و ئەندام جە ڕاوەبەری ڕێکوزیاکەیشان موختار خەندان خەڵکو شارچەو نوسوڎێ و دوێ ئەندامێ تەرێشان بە نامەکێ، یاسین کەریمی خەڵکو دەگاو شمشێری و بیلال ئەمین ئێناخی ئەرەنیشتەو پاوەی گیانشان بەخشان.
سەبارەت بە زیانە ژیوگەیەکێ ئێرەکەی، هەمان سەرچەمە هەرێمیەکێ باسشان جە سوتەی و دلێنەشیەی سەڎان هکتارێ جە دارستانەکێ ناوچەکەی کەردەن کە ناوچێوی پارێزنیای ژیوگەیەن و ڕووبەرەکەش ٢٣ هەزار هکتارێن.
جە ئوستانو کرماشانیەنە ٣ ناوچێ ژیوگە پارێزیێ هەنێ کە بە ئی جۆرەنێ:
بێستون ٥٤ هەزار هکتارێ
بوزین و مەرخێڵە (هەورامان) ٢٣ هەزار هکتارێ
قەڵاجە ٤٣ هەزار هکتارێ
پەرێ وێرەگاچ دارستان و لەوەڕگاکێ سەردەری سەر بە دەگاو نجار-و شارو پاوە-ی هە جە هەرێمو هەورامانی ئێرشان گێرتەبێ و
سەرەڕاو هەوڵ و تەقەلاو هاموڵاتیانو دەگاکێ، بەڵام ئێرەکە دمای چەنڎین ڕوان کۆنترۆڵ کریان و کوشیانەوە و جە ئاکامشەنە دەیان هکتارێ جە دارستانەکەی و لەوەڕگاکێ دەگاکێ سوتێنێ و زیانی فرەێچ بە ژیوگەی یاوان.
نجاریەکێ گومانشان هەن ئێرەکە بە ئەنقەست نربابۆ دارستانەکانشاوە و هامکات کاربەدەستێ ئێرانی بە کەمتەرخەمێنێ مزانان جە ئەوەکوشنای ئێرەکەیەنە.
ئێساڵ ئینە چەنڎەمین جارێن کە دارستانێ ناوچە جیا جیێکێ هەرێمو هەورامانی ئێرشان گێرتەن و سوتێنێ و سەدان هکتارێشان زیانی فرەشان پنە یاوان و دلێنەشیێنێ.
هاموڵاتیێ هەرێمەکە فرە جارێ بە گومانێنێ جە ئەوەکەوتەی ئێرەکا و پەیوایشان ئانەن کە بە ئەنقەست ئێر منریۆنە دارستانەکاوە و ڕەخنەشان جە دەسەڵاتو ڕژێمو ئێرانی هەن کە دەمودەست هەوڵ پەی ئەوەکوشنای ئایرەکەی نمڎۆنە و فرە جارێچ ئاسەنگیێ پەی هاموڵاتیان دروست مەکەرۆنە کە هەوڵ پەی کنترۆڵ کەردەی و ئەوەکوشانی ئێرەکەی مڎانێ.
