جە هەولێر، سەرێکانی و تربەسپی سه‌دان دۆنمێ خەلە و خەرمان سۆچنیا
جە هه‌ولێر، سەرێکانی و تربەسپی سه‌دان دۆنمێ جە خەلە و خەرمانی ئێر دریێ و سۆچنیێ.
جە دەگاو سفه‌یه-ی کاکەیی-نشینی سەر بە شارچەو خه‌بات-ی جە پارێزگاو هه‌ولێری سه‌دان دۆنمێ جە خەلەو خەرمانی و کاڵگە کشتوکایەکان ئێر دریێ و جە ئاکامەنە سەرجەمشان سۆتێنێ و زیانی فرەی ماددییش بە هیتیارێ ناوچەکەی و ژیۋگەی یاونان.
جە لایێ تەرەۋە، جە دەگاو گەشتۆی سەر بە شارو سەرێکانی ڕۆژئاڤاو کوردستانی سەربازە ئەرەگێرەکێ تورکیای بەئەنقەست ئێرشان نیان خەلە و خەرمانو هیتیارە کوردەکانەۋە و جە ئاکامشەنە دەیان دۆنمێ جە کاڵگە کشتوکاڵیەکان بە تەمامی سۆچنیێنێ. ئەگەر تیمەکێ ئێرکوشانی فریا نەکەوتێنۍ و ئێرەکەشان کۆنترۆڵ نەکەردەبیێ زیانەکە چەندین قاتێ زیاتەر بێنە.
هەرپاسە جە پانیشتو ناوچەو تربەسپی، خەلە و خەرمان و کاڵگە کشتوکاڵیەکێ جە چەندین دەگێنە ئێر دریێنێ و جە ئاکامشەنە ڕووبەرێۋی سەدان دۆنمی سۆتەن. چاگێچە تیمەکێ ئێرکوشانی فریا هیتیارەکان کەوتێنێ و ڕاشان جە تەشەنەکەردەی زیاتەرو ئێرەکەی و زیانەکانش گێرتەن.
یاگێ بەیادئاۋردەیەن، کە ماۋێۋەن جە مەخمور، کەرکوک، خانەقین، خورماتوو، داقوق سەر بە کوردستانی وارینی و جە حەسەکە، عەفرین، کۆبانێ، سەرێکانیێ، تربەسپی و ناوچە جیا جیاکێ سەر بە ڕۆژئاڤاو کوردستانی، دارستانێ و خەلە و خەرمان و کاڵگە کشتوکاڵیەکێ هیتیارە کوردەکان بە ئەنقەست ئێر مەدریانە و سۆچنیانە. ئێردای و سۆچناکەی جەلاو داعشی، هێزەکێ سوپا و چەتەکێ تورکیای و عەرەبە شۆڤینیەکێ ئێراقی ئەنجام دریان. جە ڕۆژئاڤاو کوردستانی بڕیا دریان تا قەرەبوو زیانۋنەدریاکان بکریۆۋە، بەڵام جە کوردستانی وارین و ناوچە کوردستانیەکێ چێرو دەسەڵاتداری ئێراقی تا ئیسە هیچ باسێ جە قەرەبووکەردەی نییەن و ئانێچە هیتیارە کوردەکێش نیگەرانێ کەردێنێ.
