جە هەڵەبجە پانێلۋە سەبارەت بە وەرهۆرزی دلین و کوردستانی ڕێکۋزیا

جە شارو هەڵەبجەی بەسەرپەشتی کەنەکەی پانێلێۋە سەبارەت بە وەرهۆرزی دلینی و کوردستانی و یەکێتی نەتەوەیی پەی ۸ کەسایەتیێ کوردستانی ڕێکۋزیا.

ئارۆ سەعات ۱۰:۳۰و ۋەرنیمەڕۆی، جە هۆڵ-و پڕۆفیسۆر دکتۆر مستەفا زەڵمی جە شارو هەڵەبجەی، کۆنگرەو نەتەوەیی کوردستانی-کەنەکە، پانێڵێۋەش پەی ۸ کەسایەتیێ سیاسیی و ڕۆژنامەوان و چالاکوانێ هەر چوار بەشێ کوردستانی ڕێکۋست. پانێلەکێ بە نامنیشانو "ڕۆڵ-و کوردی جە ئارامی و سەقامگیری ۋەرهۆرزی دلین"یەنە ڕێکۋزیا.

جە بەشو یەکەمینو پانێڵەکێنە، موحسین ئەدیب مامۆستاو زانستگەی، باسش چانەیە کەرد کە، گەلێ وەرهۆرزی دلینی باجو نەتەوەپەرستیشان دان و ۋاتش: "تاوەکو وتارو نەتەوەپەرستی جیانازمێنە، نمەتاومێنە بە ئاشتی بژیومێنە و کێشەکێ میانیمان چارەسەر بکەرمێنە".

هەرجە یەکەمین بەشو پانێلکێنە موزەیەن گونەش هامسەرۆکو هەدەپەی جە پانیشتو کوردستانی بابەتش پێشکەش کەرد و  ئاماژەش بە ڕەشبگیری ڕژێمو تورکیای دا و ۋاتش: "جە سەرنیشت (باکور)و کوردستانی سیاسەتمەدارێ، چالاکوانێ و ڕۆچنامەوانێ فرێ دەستگیرێ کریێنێ و دەرفەت پەی کار و هەرمانێ سیاسیێ، مەدەنیێ و دیموکراسیێ نەمەندەن و ڕژێم سیاسەتو دلێنەبەردەی کوردیش پررکتیزە کەردەن". 

دیسان هەر جە بەشێ تەر جە یەکەمین پانێلەنە، دکتۆر کامیران بەرواری مامۆستاو زانستگەی بابەتێۋش سەبارەت بە سیستەمێ کە جە وەرهۆرزی دلین پەیڕەو مەکریۆنە کەرد و ۋاتش: "سیستەمەکە نەتاوانش ئاشتی پەی ناوچەکەی بەدی باۋەرۆنە، بەڵکو بەپێچەوانەۋە بییەن بایسو ون-متەی و کوشتوکوشتاری. پەوچی پنەۋازەن تا عێراق، ئێران، سوریا و تورکیا دەرۋازەشان پەی سیستەمو ۋێڕاۋەبەری دیموکراتیکی بکەرانەۋە و جە ڕاشەۋە کۆتای بە ون-متەی و کوشتوکوشتاری باۋەرانە و چارەسەری و پێۋەرە ژیۋای خولقنانە".

دمایین کەسە کە بەشدارەو یەکەمین پانێلێ بییە خاتوو قومریە بەرزنجی پەرلەمانتارەو ۋەڵینەو پەرلەمانو پانیشتو کوردستانی بێ و ئاڎە باسش جە ڕۆڵ-و ژەنێ کەرد جە شۆڕش و کار و چالاکییەکێ جە هەر چوار بەشێ کوردستان-یەنە و ۋاتش: "مشیۆم ئیسەیچ ژەنێ کوردی پێسەو ۋیەردەی، جە سەرجەم بوارەکانە بەتایبەتی سیاسی و شۆڕشگێڵیەنە، بەهێزێ بانە و چینەکێ گلێرگەی جە یۆتری نزیکێ بکەراۋە".

جە دوەمین بەشو پانێلەکێنە کە دمانیمەڕۆی ڕێکۋزیا، یەکەم جار خاتوو نیاز عەبدوڵا ڕۆچنامەوانە قسێش کەردێ و ئانەشە پەی ئامادەبییەکان باس کەرد، کە جە پانیشتو کوردستانی دەستگەکێ یاۋنەری و میدیای و ڕۆچنامەوانی ئازادی، دەسەڵاتی کپێ کەردێنێ و جەی بوارەنە نمونێ کوشتەی و تەرۆرکەردەی چنڎین ڕۆچنامەوانێش ئاۋردێۋە، کە بکوشەکێشان ئازادێنێ و دەستگیرێ نەکرینێ".

دماتەر ئاوات محەمەد چالاکوان قسێش کەردێ و ۋاتش: "ڕێکۋزیاکێ کۆمەڵگەو مەدەنی هەر چند گردشان سەربەوێ نییەنێ ،بەڵام دیسان تاوانشان تا ڕادێ ڕۆڵی ئەرێنی جە سەقامگیرکەردەی کۆمەڵگەیەنە بگێڵنانە".

دمایین قسەکەرو دووەمین بەشو پانێلەکەی سلێمان عارەب نمایندەو ڕۆژئاڤاو کوردستانی جە پانیشتو کوردستانی بێ و ئاڎ باسش جە شۆڕش و مدرامان و قارەمانی گەلو کوردی و گەلەکێ تەرێ جە ڕۆژئاڤاو کوردستانی و سەرنیشتو سوریای کەرد، کە ئیسە یاوان بە سیستەمو وێڕاۋەبەری دیموکراتیکی و ۋاتش: "بەڵام بەداخەۋە جەلاو ڕژێمو تورکیای و بەکرێگێرتەکانش هەمیشە دژبەری ڕۆژئاڤای و سەرنیشتو سوریای و دەستکتوتەکانش مەکریۆنە و پیلانێ دژش ئەنجامێ مدریانە. بەڵام بە ئیرادە و قارەمانیەتی یەپەژە، یەپەگە و هەسەدەی سەرجەم پیلانەکێشان مایەپووچێ کریێنێ و دەستکەوتەکێچ پارێزیێنێ".

پانێلەکە تا سەعات ۱٦:۰۰ سەروێرەگایش خاینا و بە پرسیارێ و وەڵامێ ئامادەبییەکان دماییش ئوما.