جە کەرکوک یاگەگیرو ئەبوبەکر بەغدادی قوڵبەست کریا

هێزە ئەمنیەکێ ئێراقی ئاشکراشان کەرد: جە کەرکوک ئەبو خەلدون یاگەگیرو ئەبوبەکر بەغدادی-شان قوڵبەست کەردەن.

ئێشەۋ، شانەو یاۋنەری سەر بە ئاساییشو ئێراقی جە ئەرەیاۋنایێۉەنە دەستگیرکەردەی گەورە سەرچەتە حامد شاکر سەبع ئەلبەدری ئەشناسیا بە ئەبو خەلدون یاگەگیرو سەرچەتەو داعشی ئەبوبەکر بەغدادی-ش ئاشکرا کەرد.
شانەکە ئەرەیاۋنانش: "سەرچەتە ئەبوخەلدون جە گەڕەکو واحد حوزەیران-و شارچەو حەویجەی کەسەر بە پارێزگاو کەرکوک-یەن دلێ ئاپارتمانێۋیەنە گەمارۆ دریان و دماتەر قوڵبەست کریان کە شناسنامەی ساختەش پنە بییەن نامێ شەعلان عەبید-ی".

یاگێ ۋیرۋستەیەن، سەرسەبای ۲۷و ئۆکتۆبەرو ئەی ساڵی میدیا ئەمەریکیێ و جیهانیەکێ هەۋاڵو کوشیای ئەبوبەکر بەغدادی سەرچەتەو داعش-یشان ۋەڵاوکەردەبێۋە، دمای ئانەیە مەزلۆم عەبدی فەرماندەو گردیی هێزەکێ سوریای دیموکراتیکی - قەسەدە جە ۲ تویت-ێنە جە تویتەر ئاشکراش کەردەبێ: "هێزەکێشان چەنی هێزەکێ ئەمەریکای جە کەردێۋی هەۋاڵگیری هامبەشەنە چالاکیی مێژوویی و سەرکەوتەشان  دژ بە ئەبوبەکر بەغدادی سەرچەتەو داعشی ئەنجام دان و جە ئاکامشەنە نامبریا کوشیان".  

فەرماندە عەبدی دەستنیشانش کەردەبێ: "چالاکییەکە دمای ٥ مانگان جە پەیجوری وردی هەۋاڵگری جە ئدلب ئەنجام دریا بێ".


سەرچەمەکێ هەۋاڵی ئاشکراشان کەردەبێ: "ئەبوبەکر بەغدادی جە دەگاو بریشیای سەر بە ئدلب-ی کوشیان و یاگەکێش تەنها چەند سەد مەترێ جە بارەگاو میتی تورکی و بنکە سەربازییەکێ تورکیای دوور بییەن".
وەزارەتو ۋەرگێری ئەمەریکای - پەنتاگۆن ئاشکراش کەردەن: "پەی کوشتەی بەغدادی و یاوەرەکانش هەماهەنگیشان چەنی تورکیای نەکەردەن و دەسەڵاتدارێ تورکیایشان ئاگادارێ نەکەردێنێۋە".

جە ۋەرانۋەرەنە دەسەڵاتدارێ تورکیای پێسەو پاکانەکەردەی بانگەشەشان کەردەن: "بەغدادی و یاۋەرەکێش ۋەڵێ ٤۸ سەعاتان جە کوشتەیش دەربازێ دەگاو بریشیای بیێنێ و ئادێ ئاگادارێ ئاماییش نەبینێ".