جە شارو هەڵەبجەی و بە ئامادەبیە جەماروەری و چنڎین کەسایەتیێ سیاسیێ و حزبیێ، ڕۆشنویرێ هەورامان و هەڵەبجە و پانیشتو کوردستانی، مەڕاسیمو یەرەمین ساڵیادو وەفاتو پێشمەرگە، ڕۆشنویر و نۋیسەرو هەورامانی "کەمال هەورامی" بریاڕاوە.
جە مەڕاسیمەکەنە مامۆستا جەمال، براو مامۆستا کەمالی کۆچکەردەی وتێوەش پێشکەش کەرد و باسش جە خەبات و کۆشای کەمال هەورامیش کەرد، کە بە گەنجی بییەن بە پێشمەرگە و هەوڵ و کۆشایش دژ بە ڕژێمو بەعسی دەس پەنە کەرد و چی پێناوەیچەنە بە برینداری و جە لاو بەکرێگیراکانو بەعسی دەستگیر کریان و جە زیندانەنە قارەمانە ڕووبەڕوو ئەشکەنجەی و  سەختیەکان بییەنەوە و هیچ وەخت تەسیلیم نەبییەن. تەنانەت قارەمانانە ڕووبەروو جەداردای بیینەوە، تا دماتەر بە چنەۋیەردەی گردیی ئازاد کریان.

هەر پاسە باسش چانەیە کەرد، کە مامۆستا کەمال جگە جە پێشمەرگایەتی هەمیشە خەمو کۆمەڵگەیش بییەن و بە قەڵەمە بەڕشتەکەش چنڎین بابەتێ کۆمەڵایەتی و ڕۆشنویریش و شانۆنامێش نویستێنێ و دلێشانە باسش جە نمونەیی بییەی کۆمەڵگە و خەڵکو هەورامانی کەردەن، کە دماتەر جە لاو کاروانی برازایش بەرهەمەکێش چێرو نامێ "کلتوری هەورامان، بەرهەم هێنەری مرۆڤی نەرمونیان" چاپ و ۋەڵا کریێنێ.
جە مەراسیمەکەنە کتێبێۋ جە کتێبەکانو کۆچکەردەی بە خەڵات دریا بە ئامادەبییەکان.

کەمال هەورامی جە ساڵەو 1962 جە ئەدێ بییەن و جە ساڵەو 1984 هامپەیوەندی و هامژیۋاش چەنی ڕوناک فەرەجی پێۋەرە نیان  و دماتەر پێۋەرە بەشدارێ پێشمەرگایەتی بانە و دۋێ زاڕوڵێشان هەنێ بە نامێ کوردۆ و ڕێژوانە.
مامۆستا کەمال هەورامی جە 24/12/2015 کۆچیی دماییش کەرد و تەرمەکەش بە مەراسیمی شایستە و جەماوەریانە ئەسپەردە کریان.