ئێشەو یەک شەممە، وەزارەتو وەرگیری ئەمەریکای (پنتاگۆن) جە ئەرەیاونایێوەنە ئاشکراش کەرد: "سەعات ۰۸:۰۰ بە وەختو ئێراقی جە شارچەو قائم-ی سەر بە پارێزگا ئەنباری باڵەپڕە جەنگییەکێ ئەمەریکای هێرششان کەردەن سەرو بنکێ و بارەگا لەشکریەکانو حزبوڵای ئێراقی. 
وەزارەتەکە هۆکارو ئەنجامدای هێرشەکەیش پێسەو وەڵامێوی پەی هێرشە چەکداریەکەی کە دژ بە سەربازگەو کەیوانی جە کەرکوک ئەنجام دریابێ بەنامێ کەردەن کە جە ئاکامشەنە ۱ سەربازی ئەمەریکی کوشیا بێ.

سەبارەت بە زیانەکێ هێرشەکەی فەرماندێوی حەشدی شەعبی بە فراس پرێس-ی فەڕەنس-یش واتەن: "جە ئاکامشەنە ۱٥ چەکدارێ حزبوڵای کوشیێنێ و ژمارێوی فرێ بریندارێ بیێنێ".

بەڵام شانەو یاونەری ئەمنی ئێراقی ئاشکراش کەردەن: "هێرشەکەو ئەمەریکای کە بارەگاکێ لیواو ٤٥وحەشدی شەعبی- ش کەردێنێ ئامانج، کوشیای ٤ سەربازان و برینداربییەی ۳۰ سەربازێ تەرێش ونە کەفتەنەوە".

ئەمەریکای حزبوڵای ئێراقی سەر بە ئێرانی جە قەڵەم مڎۆنە و وەرپرسیاری هێرشەکەو ئەی دمایەو کەرکوک-یش مەوزۆە ئەستۆ کە جە ئاکامشەنە ۱ سەرباز کوشیابێ و زیانی ماددیچش شۆنیەرە ئۆمابێ.

قائم مەگنۆنە سنورو میانو ئێراق - سوریای و سەر بە پارێزگاو ئەنبار-و ئێراق-یەن و جاگەی ستراتیژی و جیولەشکری گرنگش هەن جە ناوچەکەنە و هێزە ناوچەیێ، هەرێمیێ و جیهانیەکێ بە تایبەتی ئێران و ئەمەریکا هەوڵ پەی کۆنترۆڵ کەردەیش مڎانێ. هامکات ئیسرائیل ناڕازیەن هێزە چەکدارەکێ حزبوڵای و حەشدی ئێراقی نزیک جە ئێرانی ناوچەکەشان کۆنترۆڵ کەردەن و بە زیان پەی ئاساییشی نەتەوەییش مەزانۆنە.

هەرچی ئێران-ـەن حەشدی شەعبی بە گردی و حزبوڵای ئێراقی بەتایبەتی بە ئەرەمەرزیایێوی لەشکری سەر بە ئێراقی جە قەڵەم مەڎۆنە و ڕەتش مەکەرۆنەوە کە سەر بە ئێرانی بانە یان جەلاو ئێران-یەوە هامکاری و پەشتیوانی بکریانە.