سەرچەمە هەرێمیەکێ ئاشکراشان کەردەن: "ئارۆ دووە شەممە، جە خواکورک گەریلاکانو هێزەکانو پارێزنای گەلی (هەپەگە-HPG) و ژەنە گەریلاکێ یەکینەکێ ژەنێ ئازادێ (یەژاستار-YJA STAR)ی چەنی هێزە ئەرەگێرەکێ تورکیای گژیێنێ و جەنگی قورسش میانشانە ڕووەش دان. جە جەنگەکەنە لانی کەم ۱۰ سەربازێ تورکیای کوشیێنێ و ژمارێۋی تەرێ بریندارێ بینێ و زیانی فرە قورسی ماددی جە دوژمنی دریان".

تا ئیسە سەبارەت بە جەنگەکەی دلینەو یاۋنەری و چاپەمەنی  (هەپەگە-HPG)ی ۋەڵاکریای لەشکریش نەدان و چەمەڕایی هەن جە زووتەرین کاتەنە جەی بارەۋە زانیاری پەی ڕایی گردیی ئاشکرا بکەرۆنە.

جە لایێ تەرەۋە (پەدەکە-PDK) بە هەماهەنگی چەنی تورکیا چەکی قورسش ڕەۋانەو شیلادزێ سەر بە پارێزگاو دهۆکی کەردەن. جەی چوارچێۋەنە ژمارێۋی فرێ جە هێزەکانو زێرەڤانی سەر بە پەدەکەی جە نزیکو بنکێ وبارەگاکانو سپا ئەرەگێرەکەو تورکیایەنە جاگیرێ کریێنێ.
جیا جە شیلادزێ، ماۋێۋەن (پەدەکە-PDK) بە هەماهەنگی چەنی تورکیای هێز و چەکی قورس ڕەوانەو دینارتێ، دەرکار، بارزان، سیدەکان، برادۆست و خنێرەی مەکەرۆنە و پێۋەرە ئامادەکاری پەی جەنگی چەنی گەریلاکانو هێزەکانو پارێزنای گەلی (هەپەگە-HPG) و ژەنە گەریلاکێ یەکینەکێ ژەنێ ئازادێ (یەژاستار-YJA STAR)ی مەکەرانێ و ئانێچە ناڕەزایەتی گەلیش جە پانیشتو کوردستانی شۆنیەرە ئومان و خەڵکی وازیارێنێ (پەدەکە-PDK) واز جە خیانەتی و هامکاریکەردەی تورکیای باۋەرۆنە و نەبۆنە هۆکار پەی هۆرگیرسنای جەنگی کورد بە کوردی و ون متەی ڕۆڵەکانو کوردستانی.