سزای تەمەللی: با تورکیا و ڕووسیاچ جە سوریا بکێشاۋە
سزای تەمەللی هامسەرۆکو هەدەپەی سەبارەت بە ئەوەکێشای ئەمەریکای جە سوریای واتش: با ڕووسیا و تورکیاچ جەسوریا بکێشاۋە.
جە شارو ئامەدی، سزای تەمەللی هامسەرۆکو گردیی هەدەپەی سەبارەت بە بڕیارو دۆناڵد ترامپ سەرۆک کۆمارو وڵاتە یۆگێرتەکێ ئەمەریکای پەی ئەۋەکێشیای هێزە سەربازییەکێ وڵاتەکەیش جە ڕۆژئاڤاو کوردستانی و سوریای، جە کۆنگرێ ڕۆچنامەۋانییەنە هەڵۋێستو وێش و هەدەپەیش ۋست ڕووە.
"مانگێرتەی پەی ئاشتی و دیموکراسیی تورکیای گرنگەن"
تەمەللی سەرەتا ئاماژەش بە مانگێرتەی جە واردەی دا، کە دژ بە گۆشەگیرکەردەی ڕێبەر ئۆجالانی ڕێکوزیان و کە مانگێرتەکەو لەیلا گیوڤەنێ ٤۳ ڕووێش پەڕ کەردەنەۋە و واتش: « مانگێرتەکەی پەی کۆتایی-ئاوردەی بە گۆشەگیری ئیمرالییەن و فرە گرنگەن پەی بەدی ئامای ئاشتی و دیموکراسیی جە تورکیانە».
"لەیلا گیوڤەنێ تەندروستیش تێکشییەن"
هامسەرۆکو هەدەپەی ئاشکراش کەرد: «پزیشکێ لەیلا گیوڤەنێ واتەنشان، مانگێرتەی جە واردەی کاریگەری خرابش کەردەنێنە سەر و تەندروستیش تێکشیەن. کێشش کەمش کەردەن و بارودۆخش مەترسیدارەن. گەرەکەن گرد کەس و لایێ بە ۋەرپرسیاری وێش هۆربێزۆنە و مشیۆم کۆتایی بە گۆشەگیرکەردەی بەڕێز ئۆجالانی باۋریۆنە و بەخێرایی پارێزەری سەردای ئیمرای بکەرانە، کە داواکاری لەیلا گیوڤەنێ-ن تا کۆتایی بە مانگێرتەکەیش باۋەرۆنە».
«با تورکیا و ڕووسیاچ جە سوریا بکێشیاۋە»
سەبارەت بە ئەوەکێشیای ئەمەریکای جە سوریای سزای تەمەللی واتش: «دمای ئەۋەکێشیای ئەمەریکای جە سوریا، بە تورکیا و ڕووسیاۋە، با سەرجەم هێزە بێگانەکێ جە سوریا بکێشاۋە و دەرفەت ڕەخسیۆنە تا گەلێ سوریای بڕیار سەرو ئایندە و چارەنۋیسو وێشان بڎانە. مشیۆم نەتەوە یۆگێرتەکێ پەی دمایی ئاۋردەی بە جەنگی جە سوریا کۆببۆۋە و هەڵوێستی جدی نیشانە بڎۆنە».
