ئێشەو جە شارەکێ ئێراقی چوون بەغدادی پایتەخت، ناسریە و بەسرە هێزە ئەمنیەکێ ئا وڵاتەیە پەی کۆتایی ئاوردەی و سەرکوتکەردەی یەکجارەکی بە وێنیشاندایە جەماوەرەیەکان، هێرشێشان کەردەنێ سەرو وێنیشاندەرەکان.

جەی بارەوە سەرچەمێ و ئاژانسەکێ هەواڵی وەڵاوشان کەردەنەوە: "جە هێرشەکەنە لانی کەم ٤ وێنیشاندەرێ کوشیێنێ و دەیانی تەرێ بریندارێ بیێنێ و هامکات دەیان وێنیشاندەرێ دەستگیرێ کریێنێ و خێمێ و یاگێ کۆبییەی وینیشاندایەکان سۆچنیێنێ و تێکێ دریێنێ".

هاموەخت وێنیشاندەرێ و جەماوەری ناڕازی جەختشان کەردەنەوە: "سەرەڕاو هێرش و سەرکوتکەردەکەی بەڵام سورێنێ سەرو درێژەدای بە اڕەزایەتی تا یاوای بە ئانجەکەیشان".

 
جە لایێ تەرەوە، ڕێکوزیاو چنەویرەدەی میاندەوڵەتی (ئەمەنیستی ئەنتەرنەشناڵ Amnesty International)  ئاشکراش کەرد: "جە ۳ مانگێ وینیشاندایەکانو ئێراق-یەنە بە تەقەو هێز ئەمنیەکان ٦٦٩ کەسێ جە وێنیشاندەرەکان کوشیێنێ و زیاتەر جە ٢٥ هەزارێ تەرێ برندارێ بیێنێ. هاموەخت ژمارێوی فرێ وێنیشاندەرێ دەستگیرێ کریێنێ و جە زندانەکانە بە دژواری ئەشنکەنە دریێنێ".

ئێراق بە تایبەتی جە پارێزگاکێ پانیشتو ئا وڵاتەیە زیاتەر جە ٤ مانگێن وێنیشاندایێ و ناڕەزایەتیێ جەماوەریێ دژ بە حکومەتی، گەندەڵی و نەبییەی خزمەتگوزاری بەردەوامێنێ و هێزە ئەمنیەکێ ئێراقی بە چەکی گەرم و تونڎوتیژی ڕووبەڕوووشان بیێنێوە و هەوڵ مڎانی کۆتاییشان پنە باوەرانە.

چوار مانگێ ویەردێنە سەرەڕاو کوشیای سەڎان وێنیشاندەرێ و برینداربییەی هەزاران وێنیشاندەرێ تەرێ و هاووەخت بە شێوازی پلانپەیکریا چەنڎین چالاکوانێ و پێشەنگێ ناڕەزایەتیەکان و ڕۆژنامەوانێ کوشیێنێ و چەنڎینی تەرێ ئەڕفانیێنێ و بێسەروشۆنێنێ کریێنێ.