سەرەڕاو ئێربڕی هێزەکێ دوژمنی بەردەۋامێنێ جە هێرشکەردەی

سەرەڕاو ئێربڕی هێزە ئەرەگێرەکێ تورکیای بەردەۋامێنێ جە هێرشی و بۆردمانکەردەی و دەگاو ئوم ئیشیبی سەر بە سەرێکانی و دەگاکێ دربەسپی و عەین عیسای تۆپۋارانێ و بۆردومانێ کریێ.

سەرەڕاو ئێربڕی کە ڕژێمو تورکیای قبوڵ کەردەن، بەڵام هێزە ئەرەگێرەکێ تورکیای و تاقمە چەتەکێش بە هێرشێ و تۆپۋران و بۆردومان دەگاکێ، شارچێ و شارەکانو ڕۆژاڤاو کوردستانی مەکەرانە ئامانج و ئێربڕەکەی پاشێل مەکەرانێ.
جەی چوارچێۋەنە ئارۆ دوو شەممە سەعات ۱٦:۰۰ بە وەختو هەرێمەکەی، دەگاو ئوم ئیشیبی سەر بە سەرێکانی تۆپۋارانە کریا و جە ئاکامشەنە سەرەڕاو یاۋانای زیانی ماددی بە دەگانیشنەکان، شەڕڤانێۋو هێزەکی سوریای دیموکراتی (قەسەد) شەهید بییەن.

جە لایێ تەرەۋە سەرۋێرەگاو ئارۆی، دەگایەکێ خربەت بەکر و کور حەسەن سەر بە دربەسپی تۆپۋارانێ کریێن.
هەرپاسە جە سەرنیشتو عەین عیسا تاقمە چەتەکێ تورکیای هێرشان کەردەن سەرو دەگاکان و هاموەخت جە زەمین و ئاسمانەۋە بە تۆپێ و ۋاۋیەرێ جەنگیێ دەگاکێ بۆردومانێ سەخت کریێنێ. تا ئیسە زیانەکێ بۆردومان و تۆپۋارانەکەی نەزیانیێنێ.

جە ۋەرانۋەرەنە هێزەکێ سوریای دیموکراتی (قەسەده) وەڵامو هێرشەکێ دوژمنیشان دانەۋە و جە ئەنجامشەنە زیانی ماددی و گیانی جە دوژمنی ئەرەگێری کەفتەن، بەڵام جەی بارەۋە ئاماری ورد و دروست بەدەست نەۋزیان.