شەهیدکەردەی دکتۆر سیروان-ی و هامڕاکێش ٢٤ ساڵێش دەرباز کەرد

٢٤ ساڵێ جە وەڵتەر جە ئاغجەلەر دکتۆر سیراون و هامویرەکێش (حاجی قامشلۆیی، بابان، دیلان ماردینی و عەگید گەرمیانی) جە کەردێوی خایەنەتکارانە و دژە گەلیی (پەدەکە)یەنە شەهیدێ کریێ.

کاوە عەلی ساڵح، ئەشناسیا بە دکتۆر سیروان و هامڕێ و هامۋیرەکێش (حاجی قامشلۆیی، بابان، دیلان ماردینی و عەگید گەرمیانی) ٢٤ ساڵێ جە وەڵتەر جە ئاوایی قەڵاچوغەی سەی کەریم سەر بە شارچەو ئاغجەلەری، جە کەردێۋی خیانەتکارانە و دژە گەلیی کە پەدەکە پەشتیشەوە بیێ شەهیدێ کریێ و پەیوەستێ کارەوانو ئازادی بیۍ.

کاوە عەلی ساڵح، شناسیا بە دکتۆر سیروان ساڵەو ١٩٦٤ ئاۋایی چەمیاڵەی سەر بە ناوچەو شارباژێڕو پارێزگاو سلێمانیێ جەئەڎێ بییەن. قۆناغەکێ وانای سەرەتایی و ئامادەییش جە سلێمانییە تەمام نێنۍ. دکتۆر سیروان هەر جە ۱٦ ساڵییەنە پەیوەست بە کاری سیاسیی بییەن و پەیوەندیش بە (کۆمەڵەی ڕەنجدەرانی کوردستان)ی کەردەن. ساڵە ۱۹۸۳ی پەی درێژەدای بە وانای بەرزی شییەن بەغداد و زانشتگەنە زۋانی ئینگلیزیش وانان و تا ساڵەو ۱۹۸٤ی بە هۆکاری سیاسیی، ڕژێمو بەعسی فشارش پەی ئاۋردەن و ناچار بە کۆچبەری ئێرانیش کەردەن. تا ۱۹۸٥ جە ئێران مەنەنەۋە و دماتەر شییەن دانیمارک و ئەورووپا. هامتەریب چەنی سیاسەتی ڕۆڵش جە ڕۆشنگەری و ڕۆچنامەگەری بییەن. ساڵەو ۱۹۹٤ی جە ڕۆچنامەو (وڵات)یەنە دەستبەکار بییەن و بە نۋیستەکانش ڕۆڵی فرەش بییەن جە ۋەڵێۋستەی ڕۆچنامەکەی و وشیاری نەتەوەیی.

دکتۆر سیروان جە ئەورووپا جە ڕاو (بەرەی ڕزگاریی نەتەوەیی کوردستان) یەۋە ئاشنا بییەن بە خەبات و کۆشای ئازادی پەکەکەی و ڕێبەر عەبدوڵا ئۆجالانی و جە ۱۹۹۰ ڕووەش نیان سوریای و  دماتەر لوبنانی چەمش بە ڕێبەر ئاپۆی کەفتەن و ئۆجالان پەروەردەی سیاسیی و ڕێکۋزیایی و کۆمەڵایەتییش دان و جە ئەکادیمیاو مەعسوم کۆرکمازی پەروەردەی گەریلاییش دییەن و دماتەر جە پەی درێژەدای بە خەباتی گێڵانەۋە پەی کوردستاای و جە ساڵەو ۱۹۹۱ی جە خواکورک چەنی هامڕاکانش ( پارتی ئازادیی کوردستان - پاک)شان مەرزنانەرە. دکتۆر سیروان جە ئاخێز و سەرهۆردای ۱۹۹۱ینە ڕۆڵی کاراش گێڵنان و جە بادیان پێشەنگایەتی جەماۋەریش کەردەن دژ بە ڕژێمو بەعسی. دمای سەرکەوتەی سەرهۆردای باشوری، پەی ڕووبەڕووبییەی داگیرکاری تورکیای ڕووەش نیێنە هەفتانینی و جە جەنگەنە بە قورسی بریندار بییەن. دمای چارەسەری کۆڵش نەڎان و درێژەش بە کۆشاییشی ئازادی دان و ساڵەو  ١٩٩٥ی چەنی ژمارێۋ جە هامڕێ و هامۋیرەکانش (یەکێتی نەتەوەیی دیموکراتی کوردستان -یندک)شان مەرزنانەرە و بە سکرتێر هۆرۋچنیان. دمای ئانەیە ئیتر کاراتەر جە ۋیەردەی دکتۆر سیروان مەیدانی سیاسییەنە کۆشان و نامودەنگش جە پانیشتو کوردستانی ۋەڵاۋبییەنەۋە. ئانەیچ پارتە دەسەڵاتدارەکێ بپانیشیش نیگەرانێ کەردێبێنۍ. 

دمای خیانەتەکەو ۳۱و ئاب-و ۱۹۹٦ و شکستەکەو یەکێتیی نیشتمانیی کوردستانی، دکتۆر سیروان بارەگاو پاراتەکەیش جە چەمی ڕەزان سەر بە سلێمانیێ مەرزنۆرە و سەرقاڵ مەبۆنە بە کاری سیایی و ڕێکۋزیایی. 

جە ٤-١٠-١٩٩٦ی کاوە عەلی ساڵح شناسیا بە دکتۆر سیروان چەنی هامڕێ و هامویرەکێش (حاجی قامشلۆیی، بابان، دیلان ماردینی و عەگید گەرمیانی) جە ئاۋایی قەڵاچوغەی سەی کەریم سەر بە شارچەو ئاغجەلەری سەرقاڵێ خەباتی بێنۍ جە کەردێۋی خیانەتکارانە و دژە گەلیەنە شەهیدێ کریێ و پەیوەستێ کارەۋانو ئازادی بیۍ.

بەداخەوە جە دمای ٢٤ ساڵان جە شەهیدکەردەی دکتور سیروانی و هامڕاکێش، هیشتای پەدەکە دەستوەردارو خیانەتی و هامکاری کەردەی ڕژێمە ئەرەگێرەکێ کوردستانی بە تایبەتی تورکیا نەبییەن و بەڵکو فراونتەر جە ویەردەی بەردەوامەن جە خیانەتەکەی.