عەفرین، کە جە سەردەمو وێسەری دیموکراتی ڕۆژئاڤاو کودستانیەنە ئارامتەرین هەرێم بێ جە سوریانە و سەدان هەزار پەنابەرێ سوریاش جە وێ گێرتێبێنێ، ئارۆ جە سایەو داگیرکاری تورکیای و تاقمە چەتەتەرۆریستەکانشەۋە بییەن بە نائارامتەرین هەرێم جە سوریا و وەرهۆرزی میانییەنە و فرەتەرو خەڵکەکەیش کۆچبەر بیەن. ۲ ڕۋێن جە عەفرین و دەوروبەرشەنە هێزە داگیرکەرەکێ تورکیای و تاقمە چەتەکێش گژیێنێ و جەنگشانە و ئانێچە دەیان کوشیێ و بریندارێش جە هەردۋی لای ۋنە کەوتێنێۋە.
 
ڕژێمو تورکیای بانگەشەش کەردەن، گوایا ئۆپەراسیۆنشان دژ بە تاقمە چەتەکانو ئەحرار ئەل شەرقیەی پەی ڕێکۋستەی بارودۆخی ئەمنی عەفرینی ئەنجام دان و داۋاش کەردێنە، تا تاقمە چەتەکێ ئەحرا ئەلشەرقیەی بە وێشان و چەک و چۆڵەشانەۋە بکێشاۋە پەی سەرنیشتو حەلەبی. ئا تاقمە چەتێچە داۋاکاریەکەشان قبوڵ نەکەردەن و ۋەراۋرش مدرێنێۋە. سەرچەمکێ هەۋاڵی جە عەفرین ئاشکراشان کەردەن، دمای ئانەیە کە تورکیا تاقمە چەتەکێش پێسەو بەکرێگیریای پەی داگیرکەدەی عەفرینی بەکاربەردێنێ، ئیسە ئیتر کارش پنەشان نەمەن و تەسفیەشان مەکەرۆنە. 

زانیا، جە عەفرین باری نائاسایی هەن و شارەکە بییەن بە وێرانە و هیچ خزمەتگوزرایێ پێشکەش بە هاموڵاتیان نمەکریۆنە و خاڵێ کۆنترۆڵی دلێ شاریانە هەنێ و هەر هێز و تاقمێ پەی وێش حوکمڕانی مەکەرۆنە و هامۆشیەی پەی دلێ و بەرو شاری قەدەغەکریێنە و تاڵانکەردەی زیاتەر جە جارانی پەرەش سەندەن.