مەلا تەها گەرمیانی ئیمام و خەتیب جە مزگی شارچەو ڕزگاری سەر بە ئیدارەو گەرمیانی جە کوردستانی وارین دژ بە تاۋانەکێ ئەردۆغانی و ئەرەگێرتەیی تورکیای بەدەنگ ئومان و هەڵۋێستش نیشانە دان. گەرمیانی جەی بارەۋە پەی ڕۆژنیوزی قسێش کەردێنێ و ۋاتەنش: "جە سەرۋەختێۋەنە کە ڕژێمە ئەرەگێرەکەو تورکیای خاکمان مەگێرۆرە و خەڵکە بێتاۋانەکەێمان مەکشۆنە و کۆمەڵکوشش مەکەرۆنە، پنەۋازەن گەلەکەمان دژش بەدەنگ بەیۆنە و گەل و نیشتمانمان چنەش پارێزنمێنە. ئێمە چوون موسڵمان ئەرکمانە جە هەر کۆ و لایێ دونیای ئانزانێ بە ناهەق بکوشێنە جە دڵەۋە پنەمان ناوەش بۆنە. ئەی پەی سەڎان ئانزانێ کە جە کوردستان بە بێتاۋان کوشیانە مشیۆم چی بێدەنگێ و بێهەڵۋێستێ بێمێنە؟".

مەلا تەها گەرمیانی بانگەۋازیش جە سەرجەم کوردی و ئازادیۋازان کەردەن: "مشیۆم هیچ کەس و لایێ پەشتیۋانی و هامکاری ئەردۆغانی و ئەرەگێرتەیی تورکیای نەکەرۆنە، چونکە ئەردۆغان و ڕژێمەکەش تاۋانێ ئەنجامێ مڎانە، هەر کەس و لایێ پەشتیۋانی و هامکاریش بکەرانە هامبەشێ تاۋانەکانشەنێ و نامێش جە لاپەلێ سیاۋێ تاریخیەنە تۆمار مەکریۆنە و جە دونیا و پەسەڵان (قیامەت)ـەە شەرمەزار مەبۆنە. پنەۋازەن تا خەڵکی بە گردیی، لامێ (گەنجێ) و ڕۆشنۋیرێ بە تایبەتی دژ بە تورکیای و ئەرەگێرتەیی و کوشتەی ژەن و زارۆڵەی بێگوناحی بمدرانێۋە".

مەلا تەها گەرمیانی جە کۆتاییەنە ۋاتەنیچش: "ئەردۆغان و پەشتیۋانێ و هامکارەکێش بە پاو دەقەکێ قورئانی پیرۆزی نەفرەت-کریێنێ و جاشان دۆزەخەن و نەفرەت و نەفرینی خوڎای سەرشارە بۋارۆنە".