چەنی شۆڕش و سەرهۆردای جەماوەری جە وەرنیشت (ڕۆژاڤا)و کوردستانی تا ئازادکەردەی ئا بەشە جە وڵاتی و ئەرەمەرزنای ڕاۋەبەری دیموکراتیی و شکستدای داعشی و تا بە ئارۆچ بیاوۆنە، ڕووانە تورکیا بە بەهانێ جۆراوجۆرێ ڕۆژاڤاش کەردەن ئامانج و هەوڵ پەی دلێنەبەردەی دەستکەفتەکانش مڎۆنە. هەمیشە بانگەشەش کەردەن و مەکرۆنە گوایا جە ڕۆژاڤاۋە هەڕەشێ جە سنوریش مەکریانە و بە بەردەۋامی وازیار بییەن تا ناوچەی ئارام بە حەز و ئارەزوو وێش دروست بکریۆنە. جە ۋەراۋەرەنە هەمیشە ڕاۋەبەری ڕۆژاڤای هەم بانگەشەکێ تورکیای و هەم بە ئارەزوو تورکیای دروستکەردەی ناوچە ئارامش ڕەت کەردەنەۋە. ڕاۋەبەریەکە بەردەۋام ئامادە بییەن تا بە گفتوگۆ پەرسەکێ  میانیش و تورکیای چارەسەرە ببانە و ناوچەی ئارامیچ بە ڕێککەوتەی دروست بکریۆنە. 

تورکیا ناوچێۋی ئارامی چنینش گەرەکەن

تورکیا دوور جە پڕەنسیپی دبلۆماسیی و ڕێزگێتەی جە هامسایەتی و یاسا میاندەوڵەتیەکان و حسابکەردەی پەی ۊەرانۋەرەکەیش، هەمیشە هەوڵش دان بە ملهوڕی و زۆرداری داۋاکاریەکانش بسەپنۆنە و بە حەز و ئارەزوو وێش ناوچەی ئارام دروست بکریۆنە. ڕژێمو تورکیای بەردەۋام پافشاریش کەردەن تا: 

۱- ناوچەی ئارام بە بە درێژایی سنورەکێ ڕۆژئاڤای و تورکیا و ۳۰ کیلۆمەترێ بە قوڵایی خاکو ڕۆژاڤای دروست بکریۆنە. 

۲- سەرجەم هێزەکێ قەسەدەی، یەپەگەی، یەپەژەی، ئاسیش و ڕاۋەبەری ڕۆژاڤای جە ناوچەی ئارامەنە بکێشیاۋە و هیچ ڕۆڵێشان پنە نەدرێۆنە.

۳- ناوچەی ئارامەنە هێزەکێ تورکیای باڵادەستێ بانە.

٤- تاقمە چەتێ سوریێ سەر بە تورکیای و تاقمە چەتە میاندەوڵەتیەکێ کە ئینێ سوریانە و فەرمان جە تورکیای مەگێرانێ، فاڕیاۋە پەی ناوچەی ئارامی.

٥- نزیکە بە ۳ ملیۆنێ پەنابەرێ سوریێ کە ئینێ تورکیانە قۆناخ بە قۆناخ فاڕیاۋە پەی ناوچەی ئارامی و یاگەگیرێ بکریان.

٦-بە سەرپەرشتی تورکیای ڕاۋەبەریی ئیداری و سیاسیی و مەدەنی پەی ناوچەکە دروست بکریۆنە.

تورکیا چ ئامانجێش جە دروستکەردەی ناوچەی ئارامی هەن

 تورکیا گەرەکشەن بە دروستکەردەی ناوچەی ئارامی بە ئی ئامانجەیە بیاوۆنە: 

۱- ڕۆژاڤا و (باکور)و کوردستانی پەی هەمیشەی جە هەنتری ببڕۆرە.

۲- دیموگرافیا سنوری پەی هەمیشەی بفاڕۆنە و کورد بەتەمامی جە ناوچەی ئارامەنە کۆچبەر بکریۆنە.

۳- قۆناخ بە قۆناخ ناوچەکە بەتورک بکریۆنە و بوزیۆنە سەرو خاکو تورکیای و پەی هەمیشەی گێریۆرە.

٤- ناوچەی ئارامی چوون کارتێۋی فشار دژ کورد، سوریا، ئەمەریکا، ڕووسیای بەکارباۋەرۆنە.

بەڵام سەرجەم پیلان و ئامانجەکەو تورکیای هەم جەلاو ڕاۋەبەری ڕۆژاڤاو کوردستانی و هەم جە لاو ئەمەریکایەۋە قبوڵ نەکریان و ڕەت کریانەۋە و جە جیاتیش ڕۆژاڤا و ئەمەریکا نەخشەی تەرشان پەی ناوچەی ئارامی هەن.

ڕۆژاڤا چ جۆرە ناوچێۋی ئارامش لاۋە پەسەندەن

جە ٥ تا ۸و ئابی ۋیەردەیەنە، هێزەکێ سوریای دیموکراتیکی-قەسەدە بە فەرمی داۋاش کەرد تا ناوچەی ئارام دروست بکریۆنە. قەسەدە جە ۲٦و ئابیەنە بەۋەڵاکریای فەرمی ڕازمەندی وێش پەی دورستکەردەی ناوچەی ئارامی وست ڕووە و ئاشکراش کەرد:

۱- ناوچەی ئارام جە سەرێکانی تا گرێ سپی بەدرێژایی ۱۰۰ کیلۆمەتران و بە قوڵایی ٥ کیلۆمەترێ هاڵی جە هێزی پیادەی و بە قوڵایی ۱٤ کیلۆمەترێ هاڵی جە چەکێ قورسێ قەسەدەی دروست مەکریۆنە.

۲- دمایە ئەۋەکێشیای قەسەدەی، ئەنجوومەنێ سەربازیێ هەرێمیێ سەر بە ڕاۋەبەری ڕۆژاڤاو کوردستانی ناوچەی ئارامی پارێزنان.

۳- ناوچەی ئارامەنە بە هیچ شێوازێ هێزێ تورکیای بییەیشان نییەن.

٤- بە هیچ شێوازێ ڕا بە هێزە بەکرێگیریاکێ تورکیا نمەدریۆنە دەربازێ ناوچەی ئارامی ببانە.

٥- بە هیچ شێوازێ ڕا بە نیشتەجاکەردەی پەنابەرە سوریەکان نمەدریۆنە کە ئیسە ئینێ تورکیانە و قبوڵ نمەکریۆنە بفاڕیانێۋە پەی ناوچەکەی.

٦- فاڕای دیموگرافیای و جە یۆتری ئەۋەبڕیەی سەرنیشت و وەرنیشت (باکور و ڕۆژاڤا) هەرگیز قبوڵ نمەکریۆنە.

۷- هێزەکێ هامپەیمانی میاندەوڵەتی بە سەرکردایەتی ئەمەریکای چەمداری ناوچەی ئارامی مەکەرانێ، نەک هێزێ تورکیای.