هونەرمەندی گۆرانۍواچ فەرزاد مەھدۍنیا کە ماوێوەن جە وڵاتو سویدی و دوور جە هەورامانی ژیوای بەسەر مەبەرۆنە، جە ئی دیمانەنە چەنی بەشو هەورامی ئاژانسو هەواڵو فورات (ANF)ی باس جە وێش و کارە هونەریەکانش و ئامانجیش جە ئایندەنە بەئی جۆرە مەکەرۆنە.

فەرزاد مەھدی نیا کێن و جە کۆ جەئەڎێ بییەن؟

من فەرزاد مەھدی نیا گۆرانۍ واچێوی ھەورامی زوانانەنان جە یەکوو ژۆئەنوو ساڵوو ١٩٨٧ی و جە دەگایێوە بە نامێ ژیواری کە ئینا بەشوو ھەورامانوو تەختی سەر بە ئۆستانو سنە-ی جە دیمو وەرهۆرزو کوردستانی ( وەڵاتوو ئێران)ی جە ئەڎێ بینان و هامتەریب چەنی وانای و وانگەی و زانشتگەی، ھەرمانێ ھونەریێ مەکەرونە. 

بێجە جە گۆرانیێ جە بواری تەری هۆنەریەنە کار مەکەری و ئامانجت چێشەن؟

پاڵوو گۆرانۍواتەۆیەنە نەوازەندەو سازوو تار-یەنا، وازیارەنا پاڵوو گۆرانی واتەیەنە، پنج ھەزارێ گورانیێ ھەورامانی تازێ بکەروە و چەنی ئۆرکستری بەرگە تازە کەرۆ وەروو ئا گۆرانیارە و وێچم مێلودێ تازێ سازێ بکەرونە.

کەی دەستت بە کاری هونەری و گۆرانی واتەی کەردەن و بەرهەمەکێت کامێنێ؟

جە ساڵوو ٢٠١٣ی هەرمانە و کۆشای هونەریم دەست پەنەکەردێنە. ھەوراروو یارا یوەمین ئالبوم-ـەن، ئی ئالبومە جە ٩ تراکان پێکئاومان کە ھەرمانوو موسیقایش جە ئۆرکستروو شاروو مەھابادی مامۆسا کاوە فەقیەزادە(سنتوور) ،  کاک رێباز سادق جە سلێمانی (ویالون)، کاک خەلیل عبداللە(شمشاڵ)، فراز مەعروفی نوازەندەو (کەمانچەی)، پوریا وەزیری (سەنتوور)، فازڵ نیك رەفتار (عود)،سیما تەکیەخواە(تار)،میلاد شەمس الدینی(شمشاڵ) ،کەسرا کاوە (ویالون) و چن دانە ھۆنەرمەندێ تەرێ ئەرکشان کێشان و بەشدارێش بینێ.

کلیپ پەی گۆرانیەکانت کەردەن؟

دوێ جە گۆرانیەکانو ئالبوم ھەوراروو یارا  کلیپ-شان پەی کریان و  و پێشکەشێ ھونەدۆسان و خەرمانوو ھونەری ھەورامانی کەریێنێ کە ئاڎێچێ گۆرانیەکێ ھەوراروو یارا و پەروانە-یەنێ. هەووبەتە ئامانجمەن جە ئایندەی نزیکەنە گردوو ئالبومەکەی کەریۆ بە کلیپ و بگنۆنە وەروو چەما هۆگرەکام.

بەشداریت جە کام چەژنەوارە و بەرنامێوی نامی هونەری کەدەن؟

جە بەرنامەو کورد ئایدڵ-و ساڵوو ٢٠١٧ی بەشدار بیانی و تاوام پلەو دوەهەمینی بە دەست باروەرونە کە دەیانی هونەرمەندێ هەر چواربەشێ کوردستانی بەشدارێش بێنێ.
هەرپاسە جە جەشنوارەو موسیقی ئێرانی کە جە شاروو برۆجنی ڕێکوزیا بێ، یوەمو جەژنەوارەکەیم بەدەست ئاورد  و لۆحی زەرین-م ئاوەردەوە پەی ھەورامانی.

بێجگە جە کاری هونەری سەرقاڵو چێشی تەریەنی؟

*فەرزاد پاڵوو گۆرانیێ و کاری هونەریەنە و وانایەنە، کەسێوی فەرھەنگی و ئەدەبی-نا و چوار ساڵێ ھائیەت مۆدیرەو ئەنجمەنوو فەرھەنگی ئەدەبی بێسارانی یاگێم گێرتێنە
جە کارە فەرھنگی و ئەدبیەکام متاونە باس جە فێرگاو کلاسوو زوانوو ھەورامی جە دەگایەکانە بکەرونە. هەرپاسە جە جەمئاوەری ئاساروو مامۆسا مەڵا وەھابوو ئاریانی بەشدار بیەنا ، جە دروستکەردەی یوەمین کتێبخانەو تەمام ھەورامی جە شارەدەگاو ھەورامانی بەشدار بیەنا. دیسان چوار ساڵێ بەشدارو ئەنجمەنو قەڵەموو ھەورامانی بیەنا و ھەرمانێ جوراوجورێ فەرھنگیێ و  ئەدەبیێم بەردێنەڕاوە.
هاموەخ ئاسارو گۆرانی واچوو ھەورامانی مامۆسا حەسەن خاوەر-یم کۆکەردەنەوە و کە یەکەمین ھەنگامەو ئەرەنیاو شناسنامەو موسیقی ھەورامانی جە ئاگەوە دەستش پەنەکەردەن.
هەرپاسە جە ٤٥ بەرنامێ ساڵانەو نەوروزی و ھەرمانە فەرھەنگیەکانو ھەمامە داستانەکان بەشدار بیەنا و
جە دوە کۆنفرانسێ گەورەێنە سەروو ئەشناسای ھەورامانی کە جە شارو سنە-ی و شارو ھەڵبجە-یەنە لوێنێ ڕاوە بەشداریم کەردەن. جە ئا ھەمامەنە کە یەەرە دەگایەکێ ھەورامانی سەبتێ تاریخی بیێ و بڕیارەن جە سازمانوو یۆنسکۆ-یەنە سەبتێ جیھانی بکریانە، کارا ئامادەییم بییەن.
 
چەنی هەرمانێ هونەری چالاکوانێوی سەر سەختوو ژیوگەیەنی؟

بەڵێ ڕاسەن، جە پاڵوو ھەرمانێ فەرھەنگی و ئەدەبیەنە چالاکوانو ژیوگەیەنا و  پەی ئەوەکۆشنایۆ ئاویروو کەشوو کۆەکانو ھەورامانی وێبەخشانە ھەرمانەم کەردێنە.
دژ بە شێونای هانەو بڵ-ی و دوستکەردەی پەنگئاوو داریانی چالاکیێم بینێ و چەنی خەڵکانێویتەری بەشداریم جە کەمپەنی کەردەن، کە دەنگداری و کاریگەری فرەش بێ.

 ئامانجو ھونەرمەند فەرزاد مەھدۍنیا چێشەن؟

ئامانجم ئەوەژیونای زوان و هونەری ھەورامین و هەڵبەتە جە پاڵیچشەنە خزمەت کەردەیەن بە گلێرگە و ژیوگەو هەورامانی.