هەپەگە: ١٨ ئەندامێ تیمە تایبەتەکان و ۱ سەرباز کوشیێ

گەریلاکانو هەپەگەی و ژەنە گەریلاکێ یەژا-ستاری جە ڕحا، مێردین، سەمسور و جۆلەمێرگ گورزێ قورێشان جە هێزە ئەرەگێرەکانو تورکیای دێنێۋە و جە ئاکامشانە ١٨ ئەندامێ تیمە تایبەتەکان و ۱ سەرباز کوشینێ.

میانگەو یاۋنەری و چاپەمەنی هێزەکانو پارێزنای گەلی -(هەپەگە) بە ۋەڵاوکریای لەشکری ئاشکراش کەرد: "گەریلاکانو هەپەگەی و ژەنە گەریلاکێ سەر بە یەکینەکێ ژەنی ئازادێ - (یەژا-ستار)ی جە پارێزگاکانو ڕحا، مێردین، سەمسور و جۆلەمێرگ سەر بە سەرنیشتو کوردستانی جە زنجیرە چالاکیێۋەنە گورزێ فرە قورێشان جە هێزە ئەرەگێرەکانو تورکیای دێنێۋە و جە ئاکامشانە ١٨ ئەندامێ تیمە تایبەتەکان و ۱ سەرباز کوشینێ  و ۱ ماشین و ۱ زرێپۆش دلێنەبریێنێ".
 
تەمامی ۋەڵاوکریاکەی:

جە چەلێ/جۆلەمێرگ ۱ سەرباز کوشیا

جە ٢٧و تشرینو یەکەمی سەعات ١٨:٣٠ دەیەقێ ئێۋارەگای، جە بەرزایی سەرزەری سەر بە ناوچەو چەلێ-ی جە پارێزگاو جۆڵەمێرگ-ی گەریلاکێمان چالاکیشان دژ بە پایەگا و سەنگەرەکێ دوژمنی ئەنجام دان و جە ئاکامشەنە ۱ سەرباز کوشیان و زیانی فرەی ماددی جە پایەگا و بنکە سەربازیەکانو دوژمنی دریان.

جە ڕحا/سەمسوور ٤ ئەندامێ تیمە تایبەتەکان کوشیێ

جە ٢٧و تشرینو یەکەمی، جە ڕاو میانو شارەکانو ڕحا-ی و سەمسور-یەنە گەریلاکێمان دژ بە ماشینێۋی سەربازی سەر بە تیمە تایبەتەکانو ڕژێمو تورکیای چالاکیشان ئەنجام دان. جە چالاکییەکەنە ٤ ئەندامێشان کوشیێنێ و ماشینەکەشان بەتەمامی دلێنەبریان.

جە ڕحا/مێردین ۱٤ ئەندامێ تیمە تایبەتەکان کوشیێ

جە ۲۰و تشرینو یەکەمی جە ڕاو میانو شارەکانو ڕحا-ی و مێردین-یەنە هێزە ئەرەگێرەکێ تورکیای ئۆپەراسیۆنشان ئەنجام دان. هەمان ڕۆچ هێزەکێمان جە میانو دەگایەکانو عەربەتێ و سماکێ-یەنە جە ئۆپەراسیۆنکارەکانشان دان و جە درەنجامشەنە ۱٤ ئەندامێ تیمە تایبەتەکان کوشیێنێ و ۱ زرێپۆش بە تەمامەتی دلێنەبریان.
هاموەخت ۳ هامڕێمان دمای جەنگی قارەمانانەی شەهیدێ بیێنێ و جە زووتەرین کاتەنە شناسنامەکانشان پەی ڕای گردینیی ئاشکرا مەکەرمێنێ.