پەکەکە: بە نامێ ڕاۋەبەری ناوەندی پارتیمان جە ۱۳هەمین ساڵیادو چالاکییە گیانبازیەکەو ڤیان سۆران-ێنە یاد جە چالاکییەکەیش و کەسایەتییە ئازادۋازیەکەیش مەکەرمێۋە و بەڵێن مڎێمێنە ئامانجەکەیش بەدی باۋەرمێنە.
ڕاۋەبەری پارتو کارکەرانو کوردستانی-پەکەکە، جە ۱۳مین ساڵیادو چالاکییە گیانبازیەکەو فەرماندارەو یەکینەکێ ژەنێ ئازادێ (یەژەئا ستار)ی و گەورە کۆشیەرەو پەکەکەی (لەیلا والێ حسێن ئەژناسیێ بە ڤیان سۆران یان ڤیان جاف)ێنە ۋەڵاکریاش دان.
پەکەکە جە وەڵاکریاکەنە ئاشکراش کەردەن: "ڤیان سۆرانە داواش جە هەر کەسێ بە تایبەتی هاۋەکەکێش، ژەنی، گەنجێ و خەڵکی جە پانیشتو کوردستانی بەگردیی و سلێمانیێ بە تایبەتی کەردەبێ تا زیاتەر خاوەنداری جە ڕێبەر ئاپۆی بکەرانە و دژ بە ئەشکەنجەی و گۆشەگیری جە ئیمرالی گۆڕ و تینی بە خەباتی بڎانە".
ڕاۋەبەری پەکەکەی دەستنیشان مەکەرۆنە: "جە سەرەتا ۷مین سالیادو گەلەکۆمەو میاندەوڵەتی دژ بە ڕێبەر ئاپۆی جە ۲۰۰٦، هەڤاڵ ڤیانە ئیتر نەتاواش جارێ تەر ئەشکەنجە و گۆشەگیری ئیمرالی جە ۱٥و شوباتی بۋینۆنە، پۆکەی چالاکی گیانبازیش ئەنجامدا و ئێرش جە جەستەیش ۋەردا تا جە ڕاشەۋە گەلەکۆمەو میاندەوڵەتی و گەلەکۆمەکارێ شەرمەزارێ بکەرۆنە".
ڕاۋەبەر پەکەکەی سەبارەت بە سیستەمو ئەشکەنجەی و گۆشەگیری جە ئیمرالی ئاشکراش کەردەن: "دمای ۲۰ ساڵان جە سیتەمو ئەشکەنجەی و گۆشەگیری ئیمرالی، ئارۆ مدرامان دژ بە سیستمەکەی و پەی بەدەستئاۋردەی ئازادی کوردی و ڕێبەر ئۆجالانی ئینا قولەنە و ئیتر کورد بە گردیی و ژەنی بە تایبەتی گەرەکشانە کۆتایی بە سیستمەکەی بەیۆنە. جەی چوارچێوەنە لەیلا گۋڤەنە پێشەنگەنە و جەی بارەۋە ۋاتەنش؛ ❞هەرگیز سیستەو ئەشکەنجەی و گۆشەگیری ئیمرالیمان قبوڵ نەکەردەن و نمەکەرمێنە و مشیۆم دماییش بێنە❝. جە ۲۰ ساڵێ ۋیەردێنە گەلەکەمان زیاتەر جە ۱۰ هەزار شەهیدێش دێنێ و کوڕێ، کناجێ، زارۆ تا پیر، ژەن و پیا، قوربانیشان دان و گەلەکۆمەی میاندەوڵەتی و سیستمەکەشان قبوڵ نەبییەن و نییەن و دژش کۆشێنێ و مەکۆشان. گەلەکۆمە کە جە ۱٥ شوباتی ئاما ئارا، ئەنجامو سەودا و مامەڵەو میانو ئەمەریکا و تورکیای بێ. پۆکەی ئەمەریکا شەریکە گەلەکۆمە و تاوانەن".
ڕاوەبەری پەکەکەی ئاماژەش دان پانەیە، کە (لەیلا والێ حسێن ئەژناسیێ بە ڤیان سۆران)ـە، ئەندامەو ئەرەمەرزنای کۆمیتەو پارتەکەیشان بیێنە، پۆکەی بەنامێ سەرجەم ئەندامێ کۆمیتەکەی جارێ تەر سەرو ڕێزی و نەوازشی ئاستشەنە نامنمێرە و بەڵێن مڎمێنە؛ درێژەدەرێ ڕێبازەکەیش بمێنە و ئامانجەکەیش بەدی باۋەرمێنە. ئێمە داۋا جە گەنجێ و ژەنی جە پانیشتو کوردستانی مەکەرمێنە تا جە ڕاستینەو ڤیانێ بیاوانە و درێژە بە ڕێباز و کۆشاییشە ئازادیەکەیش بڎانە و زیاتەر جە ۋیەردەی بەشدارێ کۆشای ئازادی ببنانە".
