جە ئەمەریکا پڕۆسێسو هۆشداری خێرای، بە هامکاری مۆزەخانەو یادکەردەی هۆڵۆکوستی، سەبارەت بە وڵاتان، کە جە ۲۰۱۹نە توانایی ئەنجامدای کۆمەڵکوشیشان هەن پەیجۆرێش کەردەن و جە ئاستی جیهانییەنە ئا وڵاتێشە ڕێزبەندێ کەردێنێ و دماتەر جەی بارەۋە ڕاپۆرتێش دان.
جە ڕاپۆرتەکەنە تورکیا کە هەمیشە وێش بە وڵاتێ دیموکرات و ئازاد جە قەڵەم مڎۆنە، جە ڕیزبەندیەکەنە بە ١١.٢% بە هەشتەمین وڵات دەستنیشان کریان، کە مەترسیدارەن و "ماتەهازی"ش هەنە تا جە ۲۰۱۹نە کۆمەڵکوشی ئەنجام بڎۆنە. هەر جە ڕاپۆرتەکەنە نیگەرانیی سەبارەت بە نەمەنەی دیموکراسیی و بییەی ستەم و زۆرداری جە تورکیای دریان، کە تا ئارۆچ بەردەۋامیش هەن. 

جە پەیجۆر و ڕاپۆرتەکەنە ڕیزبەندی وڵاتەکان، کە جە ۲۰۱۹نە توانایی ئەنجامدای کۆمەڵکوشیشان هەن پی جورە ئاشکرا کریان:

۱-کۆنگۆی دیموکراتیی
۲-ئەفغانستان
۳-میسر
٤-پانیشتو سودانی
٥-پاکستان
٦-یەمەن
۷-ئانگۆلا 
۸-تورکیا
۹-سودان
۱۰-سۆماڵ
۱۱-کوت دیڤوار
۱۲-لیبیا
۱۳-بەنگلادش
۱٤-هندستان

پرۆسێسو هۆشداری خێرایجە ۲۰۱۱ دەستش پنە کەردەن و بەشێوازێ ورد و فراۋان شیکاری پەی ئەنجامدای دڕندەیی و کۆمەڵکوشی و تەقەلا پەی ئەنجامدای کودەتایی و پاوانۋازی دەسەڵای و تاۋانێ سیاسیێ جە وڵاتان مەکەرۆنە. 
ڕاۋەبەرێ پڕۆسێسەکەی ئاشکراشان کەردەن:"ئێمە سەبارەت بە کۆمەڵکوشی و دڕندەیی بەکۆمەڵی پەیجۆر مەکەرمێنە. ئێمە مزانمێنە کە هەرگیز تاوانێ و کۆمەڵکوشیشێ وێ-بەوێ ئەنجامێ نمەدریانە، بەڵکو بە ئەنقەست و پلانە ۋەڵینە ئەنجامێ مدریانە. ئەگەر ۋەڵتەر کار سەرشان بکریۆنە و ڕاوشۆن بگێریۆنەۋەر، کریۆنە ژمارێۋی فرێ مرۆڤێ جە کۆمەڵکوشی ڕزگارێ بکریانە".