مووراد کارایلان ئەندام جە کۆمیتەو ڕاۋەبەری پەکەکەی و فەرماندەو بڕیارگەو نەپەگەی ئاشکراش کەرد: "بەڵگێمان هەنێ کە ئەردۆغان ڕێککەوتەو دۆڵمەباخچە-یش هۆرشانانەۋە و گۆشداری داودئۆغلویش نەکەردەن و چەندین کۆمەڵکوشیێش ئەنجامێ دێنێ".
مووراد کارایلان ئەندام جە کۆمیتەو ڕاۋەبەری (پەکەکە)ی و فەرماندەو بڕیارگەو ناوەندی پارێزنای گەلی-(نەپەگە)ی، جەدێمانێۋەنە چەنی ڕادیۆ دەنگی وڵات کە بارەگاکەش ئینارە بەلجیکا پرسیارەکێ ڕۆچنامەۋانە ئارژین فورات-یش وەڵام دێنێۋە و سەبارەت بە دمایین ئاژە و ڤییەرەکێ ئارۆ و ۋیەردەی هۆرسەنگنایێ گرنگێش کەردێنێ.
"قۆناخێۋی گرنگ و ستراتیژی ئینا جە ئارانە"
کاریلان سەرەتا ۋاتەنش: "ئارۆ کۆشای ئازادی کوردستانی ئینارە سەردەمێۋی گرنگەنە.ڤییەرێ کە ئەی ساڵ و ساڵێ ئایندێ ڕووەشان دێنێ و مدانێ، (ئاژە و ڕۆژەڤ)و ئایندەو گەلەکەیمان دیاریێ مەکەرانێ. بێگومان پەیوەست بە ئانەیە، جمیەر و ڕابەرەکەمان (ڕێبەر ئاپۆ) ڕۆڵی گرنگ و سەرەکی و دیارەکەشان هەن. قۆناخێۋی بەی تەورە و ستراتیژی ئینا جە ئارانە".
"جەنگی هەمەلایەنە دژواتەرە ببۆنە"
ئەرەگێرتەیی دژ بە جمیەرو ئازادی کوردستانی، جەنگی سەرتاسەری و هەمەلایەنەش دەست پنەکەردەن. ڕژێمەکەو ئاکەپە-مەهەپەی درێژەش بە ئەرگەنەکۆنی دان و دلێنەبەرەدی جمیەرو ئازادی کوردستانی و دەستکەوتەکێ کوردی بە زامن پەی درێژەدای بە دەسەڵاتداریش مزانۆنە. سەرەڕاو ئانەیە کە قەیرانێ و کێشێ فرێش هەنێ و لاۋازی باڵش کێشان سەرشەرە، دیسان سەرجەم دەرفەتێ وێش سەفەربەرێ کەردێنێ هەوڵ مەدۆنە بەجەنگ و دژایەتیش ۋەرانۋەرو گەلەکەیمان بەردەوامیدای بە دەسەڵاتداریەکەیش مسۆگەر بکەرۆنە و سیستەمە فاشیسەکەیش مایندە (هەمیشەیی) بکەرۆنە. هەر پۆکەی میانو ئێمە و دەوڵەتە ئەرگێر و فاشیستەکەو تورکیایەنە جەنگی دژوار هەن و جە ئایندەنە جەنگەکە دژوارتەریچ ببۆنە.
"ئەردوغان و داودئۆغلو و دۆڵمەباخچە و کۆمەڵکوشیەکێ"
ڕێککەوتەو دۆڵمەباخچەی دمایین قۆناغ بێ پەی چارەسەری پەرسو کوردی جە تورکیانە. بەڵام ئەردۆغان پەی یاوای بە سەرۆکایەتی کۆماری ڕێککەوتەکەش هۆرشانانەۋە و جەنگش دەست پەنەکەردەۋە. ئەردۆغان پەی ئانەیە کۆمەڵگە هەمیشە ناکۆک بۆنە و فاشیزم و شۆڤەنیزم پەرەبسانۆنە چێشش جە دەست ئوما درێخیش نەکەرد و کەردش. گۆشداری سەرۆکوەزیری ۋەرین ئەحەمەد داودئۆغڵویش نەکەرد. ئانە کە ئارۆ داودئۆغڵو باسش مەکەرۆنە و ئاشکراش کەردەن، ئانەنە. ئەردۆغان پەی یاوای بە مەرامەکەیش سەرەتا جە کۆبییەو هەدەپە-یەنە جە ئامەد بۆمبش تەقناۋە، دماتەر کۆمەڵکوشی پرسوسیش ئەنجامدا، شۆنیشارە کۆمەڵکوش ئەنقەرەی ڕووەشدا. کریۆنە ئا کەردێ بە داعشی ئەنجامێ دریێ بانە، بەڵام بە پڕۆژە و پیلان و فەرمان و ئاگاداری ئەردۆغانی ئەنجامێ دریێنێ. ئەردۆغان و داودئۆغلو سەروەختو مدرامانو شارەکانە بەتایبەتی جە جزیرە پێۋەرە کۆمەڵکوشیەکێشان ئەنجامێ دێنێ. وەختێ کە هەدەپە سەرقاڵ بێ بە میانجیگەری و هەوڵ دێنە تا خەڵکی جە چێر زەمینەکانە ڕزگارێ بکەرۆنە، گەورە ۋەرپرسیارەکێ دەوڵەتی و فەرماندە پلە باڵاکێ ئەرتەشی کە جە دەڤەرەکانە ئامادێێ بێنێ و بە هاندای هەدەپەی سەرقاڵێ بەرۋستەی خەڵکی و بریندارەکانو چێرزەمینەکان بێنێ. بەڵام ئەردۆغان ئانەشە قبوڵ نەکەرد و جە ڕاو هاکان فیدان سەرۆکو میتی ئەی هەوڵەشە جە باربەرد. ئیتر بە فەرمانو ئەردۆغانی گرد کۆمەڵکوشێ کریێ. بەشێۋی گرنگ جە خەڵکی و بریندارەکان جە چێرزەمینەکانە لامێ (جەوانێ) و وانکارێ زانستەگەکانو تورکیای بێنێ و پەی هامکاری خەڵکو جەزیرەی لۋێ-بێنێ. پۆلیسەکێ ئەردۆغانی دەبە بەنزینێ فڕە دێنێ دلێ چێرزەمینەکان، خەڵکیچ کە چێرزەمینەکانە تەژەنە و ئاۋرێ بێنێ ئەجیابێشان ئاۋیشان پەی کیاستێنێ و وێشان یاونابێ دەبەکان، هاموەخت پۆلیسەکێ ئاکەپەی ئێرۋاران و گولـلەۋانو چێرزەمیەنەکانشان کەردەبێ و فەرە نامەردانە، نامرۆڤانە، زاڵمانە و دڕندانە و زیندە زیندە خەڵکەشان ئێردا و سوچنا. قسەکێ داودئۆغلوی سەبارەت بە ئەردۆغانی ڕەنگەن مەبەستش جە ئا دڕندەییە بۆنە.
"جە ئەردۆغانەۋە پەی میتی و جە میتەۋە پەی جەنەراڵەکان"
پێسە کە ۋاتم؛ ئێمە بەڵگێمان هەنێ کە سەلەمناش کۆمەڵکوشیێ و تاۋانەکێ بە فەرمانو ئەردۆغانی و بەدەستو دەستگاو سیخوڕی و هەۋاڵگری میتی ئەنجامێ درێنێ. ڕاۋێژکارو میتی هاکان فیدان بە نامێ ئەردۆغانی بە جەنەراڵەکانش ۋاتەبێ؛ پێشنیارو هەدەپەی پەی ڕزگارکەردەی و بەرۋستەی خەڵکەکەی جە چێرزەمینەکانە جە کۆشکو سەرۆکایەتی قبوڵ نەکریان و فەرمان پەی کۆکوشیشان دریان و شمەیچ مشیۆم کەردەییش کەردێنە. دمای جەزیرەی هەمان ڕێباز جە ناوچێ و شارەکێ تەرێ کوردستانی کەردەیی کریا و بەسەدان زارۆڵێ، جەوانێ و مەدەنیێ بێتاونێ دڕندانە کۆمەڵکوشێ کریێ. ئانێ گرد بە فەرمانو ئەردوغانی کریێ.
"سەرجەم سازیێ و ڕێکۋزیێکێ بە پەکەکە-یێ و ناقانونیێ نیشانە دریێ"
پەی ئانەیە سەرجەم دەستکەوتەکێ کوردی بکەرانێ ئامانج، هەرچی سازیێ و ڕێکۋزیێ بێنێ کریێ بە پەکەکە-یێ و کار و خەباتشان ناقانونی نیشانە دریا. پەی نمونەی ئەرەمەرزیێ و ڕێکۋزیێ قانونیەکێ جە تورکیا و ئەورووپانە، هەدەپە و لایەنە دیموکراتەکێ کە لایەنگرێ چارەسەری بێنێ، هێزە شۆڕشگێڵەکێ ڕۆژاڤاو کوردستانی، جمیەر ومدرامانو ئێزیدی جە شەنگال گرد پێسەو پەکەکەی نیشانە دریێ و کریێ ئامانج و بە سیناریۆیێ درۋینێ هەوڵشاندا تا ئەتمۆسفەرێۋی پی جور و ڕەنگە خوڵقانانە. کە جە ڕاستینە پەکەکە جیان و ئا سازیێ و ڕێکۋزێ جینێ و پەیوەندیشان بە هەنتریەۋە نییەن. پەکەکە هیچ پەیوەندیش بە هەدەپە- یەۋە نییەن، کۆشای ئازادی و دیموکراسی کوردی جە هەمان وەختەنە کۆشای دیموکراسی گەلانو تورکیایەن و چەنی کۆشای دیموکراسی تورکیای یاوێنێ هەنتری. جەی چوارچێۋەنە ژمارێۋی فرێ کەسایەتیێ، سازیێ و ڕێکۋزیێ دیموکراتیێ جە تورکیا کۆبیێۋە و کۆنگرەو دیموکراتی گەلان - (هەدەکە)شان مەرزنارە. (هەدەپە)یچ بەرهەمێۋ جە ڕێککەوتەی دیموکراتی (هەدەکە) یەن. هەوڵدای پەی پەیوەستکەردەیش بە پەکەکە-ی ناڕاستەن و شێونای ڕاستییەن. ئەگەر بەڵگەشان هەن پەی چێشی مدرێنێ با ۋزاشان ڕووە. پەی ئانەیە هەدەپەی بکرانە ئامانج و دلێنەبەرانێش ئا ناڕاستی و درۋانە ۋەڵێ مەکەرانێۋە.
"با سەلەمنانەش کە شارەۋانیێ و شاردارەکێشان پوڵشان کیاستەن"
ئەردۆغان کە سەرجەم دامودەستگایەکێ دەوڵەتی، لەشکری، هەواڵگری و هێزە ئەمنیەکێش ئیێنێ چێرو ڕکێفیشەنە و پەی بەرژەوەندی وێش بەکارشان مەبەرۆنە، مەۋاچۆنە؛ (شارەوانیەکێ و شارەدارەکێشان پۆڵشان پەی قەندیلی کیاستەن)! ئەردۆغان کە سەرجەم جۆمگەکێ دەوڵەتیش گێرتێنێرە و هێز و تواناش هەن با سەلەمنۆنەش کە پوڵ کیانیان، بەڵام ئەگەر نەسەلەمنۆنەش دیارەن درۆزنی مەزننەن. چەنی بۆنە سەرۆکۆمار درۋێ پاسنێ گەورێ بکەرۆنە و ڕاستیەکان پێچەۋانێ بکەرۆنەۋە؟ ئەردۆغان ئاشکرا پەی ڕاو گردیی درۋێ مەکەرۆنە و شۆنیشەرە دەستگاکێ یاۋنەری (چاپەمەنی، ڕادۋین، تەلەفزۋێن) ئۆرگانەکێ تەرێ درۋەکانش دووبارێ مەکەرانێۋە و پڕوپاگەندێ بێبنەمێ مەکەرانێ. هاموەخت جەنگی دەروونی پەشتبەستە بە ناڕاستیێ و درۋێ مەبەرانێ ڕاۋە. ئەگەر تاواش سەلەمنۆنەش یەک لیرە پەی ئێمە کیانیان، ئا وەختە ئێمە قبوڵش مەکەرمێنە، بەڵام هەرگیز نمەتاوانە ئانەیە سەلەمنۆنە، چوونکە ئەسڵ و ئەساسش نییەن.
