جە ئێران و وەراسانو کوردستانی نزیک بە 35 هاموڵاتیێ کوردێ دەستگیرێ کریێنێ

جە ئێران و وەراسانو کوردستانی جە بەردەوامی تەنگکەردەی خەباتی مەدەنی و فشار وستەی سەرو و چالاکوانە مەدەنییەکان و هاموڵاتیان، دەیان کەسێ ڕووبەرووێ قوڵبەستکەردەی و پەیجۆری و زیندانیکەردەی بیێنێوە.

چەندین ڕوێن جە ئێران و وەراسانو کوردستانی پیاکێ ڕژێمو کۆماری ئیسلامی، دەستشان دان تەنگکەردەی خەباتی مەدەنی و فشار وستەی سەرو هاموڵاتییانی و چالاوانە مەدەنییە کوردەکێ ئاو وڵاتەیە و جە ئی چوارچوەنە دەیان کەسێشان قۆڵبەستێ و دەستگیرێ و زیندانیێ کەردێنێ. جە ئی بارەوە کۆمەڵەو مافو مرۆڤو کوردستانی ئاشکراش کەردەن: "تا ئیسە چە شارێ و ناوچە جیا جیاکێ چوون، سنە، هەورامان، سەڵواوا ، مەریوان، رەبەت، نەغدە، بۆکان، مەهاباد، کرماشان و ئورمیە، کەرەج، تاران،  نزیک بە 35 کەسێ دەستگیرێ کریێنی و ڕووبەڕووێ ونەپەرسای و پەیجۆری بیێنێوە و ژمارێوشان چارەنویشان نادیارەن و تا ئیسە هۆکارێ دەستگیرکەردەیشان نەزانیێنێ".
کۆمەڵەکە جە ئی بارەوە ئی زانیاریێشە دێنێ:

- یەرەشەمەی ویەردە، هێزەکێ ئیدارەو ئیتڵاعاتو مەریوانی 2 چالاکوانێ مەدەنیێ خەڵکو دەگاو سڵینێ سەر هەرێمو هەورامانی بەنامێ ئەکرەم ئەدوایی ٣١ ساڵان و سیامەک ئەدوایی ٢٤ ساڵانشان  بەبێ هیچ هۆکارێ قۆڵبەستێ کەردێنێ و چەنی وێشانبەردێنێشان تا ئی ساتەوەختە چارەنویسشان نادیارەن.

- چوارشەممەی ویەردە، 2 هاوڵاتی مەدەنیێ بە نامەکێ، ئارام مورادیان و کامیل نووری خەڵکو دەگاو تەنگیسەری سەر بە هەرێمو هەورامانی، جە ئیدارەو ئیتلاعاتو سنەی داوا کریێنێ و هاککات بە تەلەفۆن ڕووبەڕووێ پەیجۆری و ونەپەرسای بیێنێوە و دماتەر دەستگیرێ کریێنێ و تا ئیسە نەزانیان چ هۆکارێ دەستگیرێ کرێنێ.

- هامکات هەر جە هەورامان بەڵام جە دەگاو نێ، هاموڵاتی عەلی پەروازە بەهۆکاری نادیار جەلاو ئیلاعاتو مەریوانی دەستگیر کریان و تا ئیسە چارەنویسش نادیارەن.

- هەر چوارشەممەی ویەردە، جە سنە، هاموڵاتی ئەمیر ڕەزایی تەمەن 25 ساڵان، دەستگیر کریان و تا ئیسە نەزانیان بە چ هۆکارێ دەسگیرکریان و چارەنویسش نادیارەن.

- هاموەخت جە نەغەدە، 5 هاموڵاتیێ بە نامەکێ، عەبدوڵڵا حاجی ئەحمەدی، پەیمان حاجی ئەحمەدی و گەلاوێژ عەبدوڵڵاهی دەستگیرانەو (پەیمان حاجی ئەحمەدی)ی، بە هۆکاری نادیار دەستگیرێ کریێنێ.

- دووە شەممەی ویەرده، جە بۆکان، حسێن گەردشی چالاکی مەدەنی بەهۆکاری نادیار دەستگیر کریان و پەی ونەپەرسای و پەیجۆری ڕەوانەو ئورمیەی کریان.

- هامزەمان جە مەهاباد، هاموڵاتی حەسەن عەبدی قوڵبەست کریان و چارەنویش نادیارەن.

- شەممەی ویەردە، جە سنە هاموڵاتی ئارام مەحەمەد یوسفی تەمەن 30 ساڵان دیسان بە هۆکاری نادیار قۆلبەست کریان و بریان  یاگێوە نادیارە.

- هەرپاسە جە شارەکێ تاران-ی و کەرەج-ی 7 مسیارێ (وانکارێ) و چالاکوانێ کوردێ بە نامەکێ، سوهەیب بادرووج خەڵکو مەریوانی، فەرزاد سامانی، سالار ڕەهەوی، دەریا تاڵەبانی، شەپۆل خزری، ئەفشین مام ئەحمەدی و سیروان نووری کە سەرجەمشان مەهابادیێنێ، جە زانستگاو خواڕەزمی تارانی دەستگیرێ کریێنێ جە تا بە ئارۆ چارەنویشان نادیارەن.
 
- دیسان هەر جە ئەی هەفتەنە، جە شارو مەهاباد-ی 2 هاموڵاتیێ بەنامەکێ، ئیمان عەبدی و سۆران حسێن زادە-ی دەستگیرێ  کریێنێ و فاڕیێنێوە پەی یاگێوێ  نادیارێ.

- هەمزەمان جە شارچەو ڕەبەتی سە بە شارستانو سەردەشت-ی،  ٣ کەسێ بە نامەکێ، بەهمەن یووسف زادە، فەرهاد مووساپوڕ و فەرەیدوون موساپوڕ، جەلاو ئیتلاعاتو سەر بە سوپاو پاسدارانی دەستگیرێ کریێنێ.

- هەرپاسە جە مەریوان دەستگیرکەردەی بییەن و جە چوارچوەشەنە 5 هاموڵاتیێ بەنامەکێ، دانا سەمەدی، زانیار موعتەمدی، سیروان کەریم نەژاد، کاروان مینویی و کارۆ عەلیداد-ی قۆڵبەستێ کریێنێ و فاڕیێنە پەی ناوەندە بەنام ئەمنییەکان.

- جە بۆکان پیاکێ کۆماری ئیسلامی ٤ کەسێشان دەستگیرێکەردێنێ کە تەنیا نامێ یوێشان ئاشکرابیێنێ کە ئە ئی جۆرەنە؛ عەزیمە ناسری کە هیچ  هۆکارێ پەیدەستگرکەردەکەیشان نەوزیان ڕووە.

- جە نۊتەرین ڤییەرەنە، ئارۆ هەینی (جومعە)، هاموڵاتی ئەنوەر چاڵشی کە ماوێو جەی وەڵتەر جە ورمییە دەستگیر کریا بێ، جە دمای ونەپەرسای جەزیندانو سوپاو پاسدرانی، فاڕیانەوە پەی قاوشی سیاسی جە زیندانو ناوەندی شارەکەی.

- یەرە شەممەی ویەردە، فەریدە وەیسی و هامسەرەکەش سیروس عەبباسی کە هەر دووێ چالاکوانێ مەدەنیێنێ خەڵکو شارو  (دێولان)یەنێ، جەلاو لقو یەکو دادگاو ئینقلابی ئیسلامی جە سنەی، بە چەندین ساڵێ زیندانی سزا دریێنێ.
 
بە پاو دمایین زانیاری تەنها جە ئی هەفتەنە، جە شارێ و ناوچەکێ وەراسان (ڕۆژهەڵات)و کوردستانی و چەند شارێ ئێرانیەنە بەگردی نزیک بە 35 چالاکوانێ و هاموڵاتیێ کوردێ بەبێ نیشاندای هۆکاری قۆلبەست و دەستگیرێ کریێنێ. زانیان کەسێ کە ساتەوەختو دەستگیرکەردەیشانە سوکایەتیی و بێڕێزیشان پنە کریان و جە وەپەرسایەنە هەڕەشێ و توندوتیژی دژشان ئەنجام دریان.