لیرەی تورکی هاڕەی زیاتەرش کەرد

لیرەی تورکی جە ئەرەوەستەی و هاڕەکەردی بەردەوامەن و هەر ١ دۆلاری ئەمەریکی بە ٧.٥١٤٥ لیرێ فاڕیاوە.

سات بەسات ئابوری تورکیای ڕوو بە وڕای و ئەرەتەپای زیاتەریەن، ئانەیچە کاریگەریش کەردەن سەرو پوڵی نیشتمانی ئاو وڵاتەیە کە لیرەن و زوو زوو وەرانوەر بە پوڵە جیهانیەکان زیاتەر بەهاکەیش جەدەست مڎۆنە.
جە ئی چوارچوەنە، ئارۆچ دیسان لیرەی تورکی جە ئەرەوەستەی و هاڕەکەردی بەردەوام بی و جە بازارەکانە هەر ١ دۆلاری ئەمەریکی بە ٧.٥١٤٥ لیرێ فاڕیاوە و مامەڵەش پۆوە کریا.
هیزی چوارشەممە، هەر ١ دۆلاری ئەمەریکی بە ٧.٤٥٥٠ لیرێ فاڕیابێوە و مامەڵەش پۆوە کریابێ.

شارەزاێ بوارەکەی، سیاسەتە جەنگەرانەکێ دکتاتۆر و فاشیست ڕەجەب تەیب ئەردۆغانی بە هۆکاری سەرەکی پەی جەدەستدای بەهاو لیرەی و ئەرەتەپای ئابوری تورکیای مزانانێ و هۆشداری مەڎانێ کە "ئەگەر بە زوویی سنور پەی ئەردۆغانی نەنریۆنەرە، ئاوەختە کەرەتەکێ ئابوری، دارایی، پیشەسازی و بارزگانی بەتەمامەتی بۆوڕانێرە و تورکیا و گەلەکێش ڕووبەڕووێ چارەنویسی تەرسناکی ببانێوە".
شارەزاکێ باس جە ئانەی مەکەرانێ، "ئەگەر بە خێرایی چارەسەر پەی گرفتە ئابوری و دارایەکێ تورکیای دەستنیشانێ نەکریانێ و بە کەردەیی هەوڵ پەی ئا چارەسەریەیە نەدریۆن، ئەگەرش فرەن کە تورکیا تاپول (ئیفلاس) بکەرۆن.