دەوڵەتی تورکی داگیرکەر سەرلەبەیانیی ئەمڕۆ بە فڕۆکەى بێفڕۆکەوانی هێرشبەر هێرشی کردە سەر باشوور و ناوەندی کۆبانێ. لەو هێرشەدا ئەکرەم ئیستەکی تەمەن ٥٠ ساڵ خەڵکی باکوری کوردستان شەهید بوو.

ئەکرەم ئیستەک لە ساڵی ٢٠١٤دا لە کاتی هێرشی چەتەکانی داعش بۆ سەر کۆبانی، لە چوارچێوەی هەڵمەت و بانگەوازی سەفەربەریی گشتی بۆ رزگارکردنی کۆبانێ خۆی گەیاندە کۆبانێ لە رۆژئاوای کوردستان و بەشداریی لە بەرخودانی کۆبانێ دا کرد.

ئەکرەم ئیستەک کەسایەتییەکی وڵاتپارێز بوو و هاوسەری هەبوو و باوکی ٢ منداڵ بوو و خۆی تەرخانکردبوو بۆ خزمەتکردن بە  تەڤگەری ئازادیی کورد.

 ئەکرەم ئیستەک لە ساڵانی ١٩٩٠دەکان دا لەلایەن دەوڵەتی تورکەوە دەستگیرکرا و بۆ ماوەی ١٠ ساڵ زیندانی کرا. ئێستاش کوڕێکی ئەکرەم ئیستەک لە زیندانەکانی دەوڵەتی تورکدایە.

تەرمی ئەکرەم ئیستەک کاتژمێر ١٤:٠٠ی سبەی پێنجشەممە ١٢ی ئایاری ٢٠٢٢ لە مەزارگەى شەهیدانی شەهید دیجلە بەخاک دەسپێردرێت.

ژ.ت